Ши җинпиң фирансийәгә йетип келиши биләнла күчлүк қаршилиққа учриди

Вашингтондин мухбиримиз нуриман тәйярлиди
2024.05.05
frandiye-namayish-01-1024 Фирансийә париждики мадөлән мәйданида елип берилған намайиш көрүнүши. 2024-Йили 5-май, париж
Явропа уйғур институти

Хитай рәиси ши җинпиң 5-май күни явропа зиярити үчүн фирансийәгә йетип барған. Ши җинпиң фирансийәгә йетип кәлгән күни фирансийәниң һәр қайси җайлирида уйғур вә тибәт паалийәтчилири ши җинпиңниң фирансийә пирезиденти макрон тәрипидин күтүвелинишиға қарши намайиш елип барған.

Фирансийәдә яшайдиған уйғурлар вә уйғурларни қоллайдиған фирансийәликләр явропа уйғур институтниң орунлаштуруши билән париждики әң мәшһур орунларниң бири болған “мадөлән” мәйданида тиятир характерлик намайиш өткүзгән. явропа уйғур институтниң мәсули дилнур рәйһан ханимниң билдүрүшичә, улар 3-май күни мәзкур намайиш һәққидә мәхсус мухбирларни күтүвелиш йиғини ачқан. Мәзкур йиғинда дилнур рәйһан, лагер шаһиди гүлбаһар хативаҗи, сабиқ парламент әзаси андре гаттолин (André Gattolin) вә фирансийәниң мәтз шәһиридики уйғурлар үчүн тәшкилләнгән яшлар коллектипиниң мәсули антони анстет (Anthony Anstett) қатарлиқлар мухбирларниң соаллириға җаваб бәргән. Фирансийә пирезиденти макронниң ши җинпиңни күтүвелиши һәққидә ишләнгән хәвәрләрдә фирансийә уйғурлириниң бу күтүвелишқа болған наразилиқиға кәң орун берилгән. “мадөлән” мәйданида елип берилған намайишқиму фирансийәдики көплигән таратқулар топланған. Иҗтимаий таратқуларда мәзкур намайиш һәққидә берилгән видийоларға қариғанда, уйғурларниң бу тинч намайиши хитай милләтчилириниң һәр хил шәкилдики паракәндичиликигә учриған.

Фирансийә париждики мадөлән мәйданида елип берилған намайиш көрүнүши. 2024-Йили 5-май, париж
Фирансийә париждики мадөлән мәйданида елип берилған намайиш көрүнүши. 2024-Йили 5-май, париж
Явропа уйғур институти

Дилнур рәйһан ханим намайиш вә намайишта хитай милләтчилириниң салған паракәндичиликлири һәққидә тәпсилий мәлумат бәрди. Униң ейтишичә, һәтта кимлики намәлум болған, йүзлиригә маска тақивалған бир түркүм қара тәнлик яшлар қоллирида дуня уйғур қурултийи рәиси долқун әйсаниң йүзигә бәлгә урулған рәсимини көтүрүп, намайиш мәйданиға бөсүп киргән.

Намайишқа қатнашқан лагер шаһитлиридин гүлбаһар хативаҗи вә гүлбаһар җелиловаму зияритимизни қобул қилди. Уларниң ейтишичә, намайишқа йәрлик фирансийәлик яшлар уйғурлардин көпрәк кәлгән болуп, улар намайишқа қатнашқан уйғурларни хитай милләтчилириниң һуҗумидин қоғдиған.

Фирансийә париждики мадөлән мәйданида елип берилған намайиш көрүнүши. 2024-Йили 5-май, париж
Фирансийә париждики мадөлән мәйданида елип берилған намайиш көрүнүши. 2024-Йили 5-май, париж
Явропа уйғур институти

Гүлбаһар хативаҗи вә гүлбаһар җелилова ханимлар айрим-айрим һалда ши җинпиңниң фирансийәгә келиши һәққидә өзиниң ойлиғанлирини биз билән ортақлашти.

Хитай милләтчилириниң вә намәлум кишиләрниң намайиш мәйданиға туюқсиз бөсүп кириши лагер шаһитлириға лагердики хитай сақчиларниң рәһимсиз муамилисини әсләткән болуп, улар фирансийә пирезиденти макронниң ши җинпңни күтүвелишини өзлиригә қилған һақарәт дәп һес қилған.

Зияритимизниң ахирида, дилнур рәйһан билән икки лагер шаһити өзлириниң фирансийә пуқраси болуш сүпити билән пирезиденти макрондин күтидиған тәләплирини айрим-айрим оттуриға қойди. Уларниң билдүрүшичә, улар нәччә қетим фирансийә пирезиденти макрон билән көрүшүшни тәләп қилған. Әмма макрон уларниң тәлипини түрлүк сәвәбләр билән рәт қилған. Лагер шаһитлири макронниң уйғурлар һәққидики мәсилиләрдә хитай тәрәпниңла сөзлирини аңлимастин, бәлки лагер шаһити болған уйғурларниңму қорқунчлуқ кәчмишлирини аңлап, андин фирансийә хитай мунасивитидики мәсилиләр үстидә әстайидил қарар чиқиришиниң зөрүрлүкини тәкитлиди.

Фирансийә париждики мадөлән мәйданида елип берилған намайиш көрүнүши. 2024-Йили 5-май, париж
Фирансийә париждики мадөлән мәйданида елип берилған намайиш көрүнүши. 2024-Йили 5-май, париж
Явропа уйғур институти

Макрон 2-май күни елан қилинған “иқтисадшунас” гезитиниң зияритини қобул қилғанда, “хитайни хәлқара тәртипниң муқимлиқиға дәвәт қилиш бизниң мәнпәәтимиз үчүн пайдилиқ, биз чоқум хитай билән тинчлиқ орнитишимиз керәк” дегән.

Рәсмий мәлуматларға қариғанда, хитай рәиси ши җинпиң 6-майдин 10-майғичә фирансийә, сербийә вә венгирийә қатарлиқ дөләтләрдә зиярәттә болидикән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.