Firansiyede xitaygha qarshi zor kölemlik namayish ötküzüldi

2-Öktebir firansiye paytexti parizhda xitayning Uyghurlar üstidin yürgüzüwatqan qirghinchiliq siyasitige qarshi turush, jümlidin firansiye qatarliq ellerni Uyghur qirghinchiliqini étirap qilish we buni toxtitish üchün heriketke ötüshke chaqirish qatarliq meqsetler bilen zor kölemlik namayish ötküzüldi.

Naraziliq namayishni 1-öktebir xitayning dölet bayrimi munasiwiti bilen yawropa Uyghur instituti teshkilligen bolup, bu qétimqi namayishqa Uyghurlarni qollighuchi yawropa we firansiye parlamént ezaliri, köp sandiki yerlik firansuzlar, gollandiye we bélgiye qatarliq döletlerdiki Uyghur teshkilatliri teripidin teshkillinip élip kélin'gen Uyghur jama'iti we siyasiy pa'aliyetchiler qatniship parizh kochilirini zilzilige saldi.

Yawropa Uyghur institutining re'isi dilnur xanim bu qétimqi chong namayishni teshkilligen we alahide orunlashturghan shexstur. U, radiyomiz ziyaritini qobul qilip, Uyghur mesilisige köngül bölüwatqan firansiye we yawropa parlaménti ezalirining bu namayishqa küch chiqarghanliqi we yéqindin yardemde bolghanliqini bildürdi.

Gollandiye yawropa sherqiy türkistan ma'arip jem'iyitimu bu namayishqa awaz qoshqan we bir qisim namayishchilarni gollandiyedin élip kélip namayishqa qatnashqan teshkilatlarning biri.

Mezkur jem'iyetning re'isi abduraxman abdulla ependimning éytishiche, namayishqa mingdin artuq adem qatnashqan bolup, namayishta Uyghurlardin bashqa yene yawropa we firansiye parlamént ezalirimu söz qilip xitayning Uyghurlargha qaratqan basturush siyasetlirini eyibligen we Uyghurlarni qollaydighanliqini bildürüshken.

Uyghur diyari bundin 72 yil burun yeni 1949-yili xitay kommunist armiyesi teripidin bésiwélin'ghan. Bu munasiwet bilen 2-öktebir firansiye paytexti parizhgha toplan'ghan namayishchilar xitaygha qarshi jarangliq sho'arlirini towlap, ay-yultuzluq kök we firansiye bayraqlirini lepilditip firansiye xelqining diqqitini tartqan.

Bélgiye Uyghur jem'iyitining ezasi ekber tursun ependim bu namayishqa awaz qoshush üchün bilgendin firansiyege kelgen. U, bu qétimqi namayishning ehmiyetlik bolghanliqini hemde zulum astida éziliwatqan Uyghur qérindashlirining ümidini aqlash üchün her waqit küch chiqiridighanliqini éytti.

Bu qétim parizhda ötküzülgen Uyghur qirghinchiliqigha qarshi chong namayish firansiyediki nopuzluq téléwiziye qanalliri we firansiye “Kirist géziti” qatarliq metbu'atlarda xewer qilin'ghan.