1-Өктәбир германийәниң көплигән шәһәрлиридә хитайға қарши намайиш өткүзүлди

Ихтиярий мухбиримиз әкрәм
2020-10-02
Share

Германийәниң дүселдорф, франкфурт, карлисруһе, стутгарт, гермерсхайим, берлин қатарлиқ шәһәрлиридә хитайға қарши намайиш өткүзүлгән.

Д у қ ниң тәшәббуси билән 1-өктәбир күни дуняниң һәрқайси җайлиридики уйғурлар мәркәзлишип олтурақлашқан 65 шәһәрдә хитай хәлқ җумһурийити қурулғанлиқиниң вә уйғур дияриниң коммунист хитай тәрипидин ишғал қилинғанлиқиниң 71 йиллиқи мунасивити билән хитайға қарши намайиш өткүзүлгән. Германийәниң дүселдорф, франкфурт, карлисруһе, стутгарт, гермерсхайим, берлин қатарлиқ шәһәрлиридә яшайдиған уйғурлар вә уйғурларниң қоллиғучилириму бу сәпкә қошулған.

1-Өктәбир германийәниң гермерсхайим шәһиридә елип берилған намайишқа иштирак қилған уйғур зиялийси әнвәр әһмәт әпәнди намайиш мәйданидин зияритимизни қобул қилғанда, бу қетимқи намайишниң уйғурлар тәрипидин бу шәһәрдә елип берилған тунҗи намайиш болуп қалғанлиқини тилға алди.

Германийәниң карлсруһе шәһиридә елип берилған намайиш һәққидә тохталған уйғур яшлиридин иптихар әпәнди корона вируси сәвәблик бу шәһәрдә кәң көләмлик намайиш уюштуруш пурситигә еришәлмигән болсиму, өзлириниң имкан яр бәргән даиридә хитай ишғалийитигә қарши паалийәт елип барғанлиқини тилға алди.

Германийәниң дүселдорф шәһиридә намайишқа қатнашқан җәмилә ханимму хитай хәлқ җумһурийити қурулғанлиқиниң 71 йиллиқиға қарши намайиш елип берип, өзлириниң хитай һакимийитигә болған наразилиқини намаян қилғанлиқини әскәртти.

1-Өктәбир йәнә германийәниң берлин, франкфурт вә стутгарт шәһәрлиридиму намайиш елип берилған. Стутгарт шәһиридики намайишқа иштирак қилған уйғур зиялийси абдушүкүр һаҗим бу намайишниң мәқсити вә вәзийити һәққидә тохтилип өтти. Берлиндики намайиш һәққидә уйғур зиялийси ғәюр қурбан әпәнди қисқичә мәлумат бәрди.

Мәлум болғинидәк, 1-өктәбир күни германийәниң мюнхен шәһиридики хитай консулханиси алдидиму намайиш елип берилған иди. Бу күни йәнә явропадики көплигән дөләтләрдә хитайға қарши намайишлар елип берилған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.