1-Öktebir gérmaniyening köpligen sheherliride xitaygha qarshi namayish ötküzüldi

Ixtiyariy muxbirimiz ekrem
2020-10-02
Élxet
Pikir
Share
Print

Gérmaniyening düséldorf, frankfurt, karlisruhé, stutgart, gérmérsxayim, bérlin qatarliq sheherliride xitaygha qarshi namayish ötküzülgen.

D u q ning teshebbusi bilen 1-öktebir küni dunyaning herqaysi jayliridiki Uyghurlar merkezliship olturaqlashqan 65 sheherde xitay xelq jumhuriyiti qurulghanliqining we Uyghur diyarining kommunist xitay teripidin ishghal qilin'ghanliqining 71 yilliqi munasiwiti bilen xitaygha qarshi namayish ötküzülgen. Gérmaniyening düséldorf, frankfurt, karlisruhé, stutgart, gérmérsxayim, bérlin qatarliq sheherliride yashaydighan Uyghurlar we Uyghurlarning qollighuchilirimu bu sepke qoshulghan.

1-Öktebir gérmaniyening gérmérsxayim shehiride élip bérilghan namayishqa ishtirak qilghan Uyghur ziyaliysi enwer ehmet ependi namayish meydanidin ziyaritimizni qobul qilghanda, bu qétimqi namayishning Uyghurlar teripidin bu sheherde élip bérilghan tunji namayish bolup qalghanliqini tilgha aldi.

Gérmaniyening karlsruhé shehiride élip bérilghan namayish heqqide toxtalghan Uyghur yashliridin iptixar ependi korona wirusi seweblik bu sheherde keng kölemlik namayish uyushturush pursitige érishelmigen bolsimu, özlirining imkan yar bergen da'iride xitay ishghaliyitige qarshi pa'aliyet élip barghanliqini tilgha aldi.

Gérmaniyening düséldorf shehiride namayishqa qatnashqan jemile xanimmu xitay xelq jumhuriyiti qurulghanliqining 71 yilliqigha qarshi namayish élip bérip, özlirining xitay hakimiyitige bolghan naraziliqini namayan qilghanliqini eskertti.

1-Öktebir yene gérmaniyening bérlin, frankfurt we stutgart sheherliridimu namayish élip bérilghan. Stutgart shehiridiki namayishqa ishtirak qilghan Uyghur ziyaliysi abdushükür hajim bu namayishning meqsiti we weziyiti heqqide toxtilip ötti. Bérlindiki namayish heqqide Uyghur ziyaliysi gheyur qurban ependi qisqiche melumat berdi.

Melum bolghinidek, 1-öktebir küni gérmaniyening myunxén shehiridiki xitay konsulxanisi aldidimu namayish élip bérilghan idi. Bu küni yene yawropadiki köpligen döletlerde xitaygha qarshi namayishlar élip bérilghan.

Toluq bet