Германийәдә һөкүмәтниң куңзи институтиға мәбләғ аҗритишиға қарши намайиш елип берилди

Хитайниң куңзи институтлириниң хитай коммунистик һакимийитиниң тәшвиқатини қиливатқанлиқи, буниң арқисида хитай һакимийитиниң чәт әлләргә “юмшақ күч” билән тәсир көрситиш нийитиниң болғанлиқиға қаримай, куңзи институтиниң бир қисим ғәрб дөләтлириниң яки шәһәрлириниң ярдимигә еришиватқанлиқи мәлум.

Дуня уйғур қурултийи бу һәқтә, йиллардин бери куңзи институтиниң маһийитини ашкарилап, наразилиқ билдүрүп келиватқан болуп, 21-ноябир күни, германийәниң нурнберг шәһиридә, шәһәрлик һөкүмәтниң куңзи институтиға һәр йили аҗритиватқан 37 миң яврулуқ мәбләғниң алдимиздики йилда қайта аҗритилидиғанлиқиға наразилиқ билдүрүп, хәлқаралиқ тәшкилатлар билән бирликтә намайиш елип барған.

RFA/Hebibulla Izchi

Бу намайишта сөз қилған дуня уйғур қурултийи иҗраийә комитети муавин рәиси әркин зунун бу һәқтики тәпсилатлар вә көз қарашлирини радийо аңлиғучилар билән ортақлашти. У мундақ деди: “хитай һөкүмити уйғурларға елип бериватқан зулмини 2017-йили, техиму вәһшийләштүрүп, нәччә миңлиған җаза лагерлирини тәсис қилип, үч милйондин артуқ бигунаһ хәлқни солап, инсанийәткә қарши һәр хил җинайәтләрни елип барди. 11 Дөләт юқириқи вәһшийликләрни ‛ирқий қирғинчилиқ‚ дәп етирап қилди. Шундақ туруқлуқ, бавария иштати нурнберг шәһәрлик һөкүмәтниң хитай коммунистлириниң тәшвиқат оргини болған бу институтни техичә қоллиши бимәниликтур, уларниң куңзи институтиға мәбләғ аҗритишни дәрһал тохтитиши зөрүр”.

Буниңдин төт йил бурунқи бир хәвәрдә, “германийә радийоси” бир доклат елан қилған болуп, униңда хитай коммунистик һакимийитиниң германлар төләватқан баҗ пулиға тайинип, германийәдә өзлириниң сиясий тәшвиқатлирини кәң-кушадә елип бериватқанлиқи оттуриға қоюлғаниди. Дәрвәқә, германийәниң бәзи шәһәрлиридә куңзи институтиға мәбләғ аҗритиватқан шәһәрлик һөкүмәтләр һелиһәм мәвҗут болуп, германийәниң баварийә иштати нуренберг шәһири әнә шу шәһәрләрдин бири иди.

Бу һәқтә радийомизниң телефон зияритини қобул қилған дуня уйғур қурултийи фондиниң рәиси вә қурултай берлин ишханисиниң мудири ғәюр қурбан, куңзи институтиниң арқа көрүнүши вә қурултайниң бу һәқтә елип барған паалийәтлири һәққидә көз қарашлирини оттуриға қуюп өтти.

Нурнберг шәһәрлик һөкүмәт бинасиниң алдида, 21-ноябир күни әтигән саәт 8:30 дә башлинип икки саәткә йеқин давамлашқан намайишта, дуня уйғур қурултийи, хәтәр астидики милләтләрни қоғдаш тәшкилати вә тибәтни қоғдаш тәшкилатлириниң рәһбәрлири һөкүмәткә чақириқ қилип сөз қилған, бу намайишқа нуренберг шәһәр әтрапида яшайдиған бир қисим уйғурларму қатнашқан.