Gérmaniye parlaméntida “Uyghur dostluq guruppisi” quruldi
2023.09.05

D u q wekilliri hemde gérmaniyediki bir bölük Uyghurlar bügün gérmaniye parlaméntida “Uyghur dostluq guruppisi” ning qurulush murasimigha qatnashqan. D u q re'isi dolqun eysa ependining bergen melumatlirigha qarighanda, bu goruppigha gérmaniyediki 4 chong partiyening parlaménttiki ezaliri ishtirak qilghan.
“Uyghur dostluq guruppisi” ning qurulush murasimidin kéyin axbarat élan qilish yighini ötküzülgen. Dolqun eysa ependi bu yighinda “Uyghur dostluq guruppisi” ning wezipiliri heqqide melumat bergen. Uning bildürüshiche, dunyaning herqaysi elliride “Uyghur dostluq guruppisi” ni qurup chiqish d u q ning uzun yilliq pilanliri terkibidin orun alghan bir tür iken.
D u q bérlin ishxanisining mudiri gheyur qurban ependining bildürüshiche, bezi gérmaniye parlamént ezaliri bu guruppigha yuqiri bahalar bergen. Uning tilgha élishiche, bu guruppa aldimizdiki künlerde gérmaniye parlaméntining Uyghur irqiy qirghinchiliqini qobul qilishi we Uyghur mejburiy emgikige da'ir belgilimilerni téxi küchlük ijra qilishi belgilik rol oynaydiken.
Bu murasimgha merkizi myunxén shehiridiki “Gérmaniye Uyghur medeniyet we ma'arip birliki” teshkilati terkibidiki “Uyghuriye mektipi” ning oqughuchiliri sen'et nomurlirini körsitip, qizghin alqishqa érishken. Teshkilat re'isi we mektep mudiri peride xanim bu heqte öz tesiratlirini bayan qilip ötti.