Мюнхендики уйғурлар рози һейт намизини биргә оқуди

Ихтиярий мухбиримиз әркин тарим
2020-05-25
Елхәт
Пикир
Share
Принт
Мюнхендики уйғурлар һәр йилқиға охшимайдиған шәкилдә бу йилқи роза һейт намизини мәлум бағчида оқуди. 2020-Йили 24-май, германийә.
Мюнхендики уйғурлар һәр йилқиға охшимайдиған шәкилдә бу йилқи роза һейт намизини мәлум бағчида оқуди. 2020-Йили 24-май, германийә.
RFA/Erkin Tarim

Һәр йилқиға охшимайдиған шәкилдә, мюнхендики уйғурлар бу йилқи рози һейт намизини 24-май күни бир бағчида оқуди. Улар намаздин кейин, бир-бири билән арилиқ қоюп туруп салам беришип һейтлашти, қаза қилған уйғурларниң қәбрисини йоқлап уларниң вә шеһитларниң роһиға дуа қилишти.

Корона вируси хитайниң вухән шәһиридә пәйда болғандин кейинки 6 ичидә 184 дөләткә ямрап 350 миң адәмниң җениға замин болуп, 5 йерим милйон инсанға юққан бүгүнки күндә дуняниң нурғун дөләтлиридә ибадәтханилар тақилип адәмләр өйлиридин чиқалмай яшашқа мәҗбур болмақта. Бундақ бир пәйттә мусулманларниң әң муһим һейтлиридин бири һесаблинидиған рози һейт йетип кәлди. 24-Май күни дуняниң нурғун җайлиридики мусулманлар һейт намизини өйидә оқуп, ибадәтлирини бәҗа кәлтүрәлмигән болсиму, германийәниң мюнхен шәһиридики уйғурлар һейт намизини җамаәт болуп оқуп, қаза қилған уйғурларниң қәбрисини йоқлиған. Улар өзара һейтлишалмиған болсиму технологийә васитилиридин пайдилинип син көрүнүшләрни тартип дост-бурадәрлиригә әвәтип хушаллиқлирини ортақлашқан. Бу һәқтә зияритимизни қобул қилған мәркизи германийәниң мюнхен шәһиридә турушлуқ дуня уйғур қурултийиниң рәиси долқун әйса әпәнди алди билән вәтән ичи вә сиртидики шәрқий түркистанлиқларниң һейтини тәбриклигәндин кейин германийәниң корона вируси билән мунасивәтлик бәлгилимилиридин пайдилинип, 3 айдин буян дидар көрүшәлмигән уйғур җамаитиниң бир йәргә җәм болуп һейт намизи оқуш пурситигә игә болғанлиқини баян қилди.

Германийә корона вирусиға қарши күрәштә мувәппәқийәтлик болған дөләтләрдин бири һесаблиниду. Германийә явропада корона вирусидин юқумланғанлар сани көп болсиму, һаятидин айрилип қалғанларниң сани әң аз дөләтләрдин бири һесаблиниду. явропа шәрқий түркистан бирлики рәиси әсқәрҗан әпәнди үч айдин буян германийәдики уйғурларниң өзара көрүшәлмәй өйлиридә турушқа мәҗбур болуватқанлиқини, рози һейтниң өзара дидар көрүшүш шундақла диний ибадитини ада қилиш үчүн муһим бир һейт икәнликини, шуңа мунасивәтлик идаригә илтимас қилип бир бағчида һейт намизи оқуш үчүн рухсәт алғанлиқини билдүрди.

Әсқәрҗан әпәнди германийә һөкүмитиниң бәлгилимиси бойичә уйғур җамаити иккигә бөлүнүп һейт намизи оқуп, оң қоллирини көксигә қоюп узақтин өзара саламлишип һейтлишип тарқилип кәткәнликини, бурунқиға охшаш өзара өйләргә берип һейт пәтиси қилалмиған болсиму, әмма дидар көрүшкәнлики үчүн һәммә уйғурларниң хушал болғанлиқини баян қилди.

Уйғурлар көп олтурақлашқан түркийә башта нурғун мусулман дөләтләрдә мусулманлар һейт намизини өйлиридә оқуди. Ундақта ислам динида һейт намизини өйдә оқуса боламду? дуня уйғур қурултийи диний ишлар комитети мудири турғунҗан алавуддин әпәнди ислам тарихида бундақ вабаниң йүз бәргәнликини, ваба тарқалған мәзгилләрдә һейт намизини өйдә оқуса болидиғанлиқи тоғрисида пәтивалар берилгәнликини оттуриға қойди.

Явропа шәрқий түркистан бирлики рәиси әсқәрҗан әпәндиниң билдүрүшичә германийәдә 180 миң 320 киши корона вирусидин юқумланған болуп, буниң ичидин 161 миң 875 киши сақайған, өлгәнләрниң сани болса 8300 киши болуп уйғурлардин юқумланған бирму киши йоқ икән. Әсқәр җан әпәнди нопусиға селиштурғанда өлгәнләрниң саниниң аз икәнликини, германийә явропада корона вирусиға қарши күрәштә өрнәк бир дөләт икәнликини тәкитлиди.

Пикирләр (0)
Share
Толуқ бәт