Myunxéndiki Uyghurlar rozi héyt namizini birge oqudi

Ixtiyariy muxbirimiz erkin tarim
2020.05.25
myunxen-namaz.jpg Myunxéndiki Uyghurlar her yilqigha oxshimaydighan shekilde bu yilqi roza héyt namizini melum baghchida oqudi. 2020-Yili 24-may, gérmaniye.
RFA/Erkin Tarim

Her yilqigha oxshimaydighan shekilde, myunxéndiki Uyghurlar bu yilqi rozi héyt namizini 24-may küni bir baghchida oqudi. Ular namazdin kéyin, bir-biri bilen ariliq qoyup turup salam bériship héytlashti, qaza qilghan Uyghurlarning qebrisini yoqlap ularning we shéhitlarning rohigha du'a qilishti.

Korona wirusi xitayning wuxen shehiride peyda bolghandin kéyinki 6 ichide 184 döletke yamrap 350 ming ademning jénigha zamin bolup, 5 yérim milyon insan'gha yuqqan bügünki künde dunyaning nurghun döletliride ibadetxanilar taqilip ademler öyliridin chiqalmay yashashqa mejbur bolmaqta. Bundaq bir peytte musulmanlarning eng muhim héytliridin biri hésablinidighan rozi héyt yétip keldi. 24-May küni dunyaning nurghun jayliridiki musulmanlar héyt namizini öyide oqup, ibadetlirini beja keltürelmigen bolsimu, gérmaniyening myunxén shehiridiki Uyghurlar héyt namizini jama'et bolup oqup, qaza qilghan Uyghurlarning qebrisini yoqlighan. Ular öz'ara héytlishalmighan bolsimu téxnologiye wasitiliridin paydilinip sin körünüshlerni tartip dost-buraderlirige ewetip xushalliqlirini ortaqlashqan. Bu heqte ziyaritimizni qobul qilghan merkizi gérmaniyening myunxén shehiride turushluq dunya Uyghur qurultiyining re'isi dolqun eysa ependi aldi bilen weten ichi we sirtidiki sherqiy türkistanliqlarning héytini tebrikligendin kéyin gérmaniyening korona wirusi bilen munasiwetlik belgilimiliridin paydilinip, 3 aydin buyan didar körüshelmigen Uyghur jama'itining bir yerge jem bolup héyt namizi oqush pursitige ige bolghanliqini bayan qildi.

Gérmaniye korona wirusigha qarshi küreshte muweppeqiyetlik bolghan döletlerdin biri hésablinidu. Gérmaniye yawropada korona wirusidin yuqumlan'ghanlar sani köp bolsimu, hayatidin ayrilip qalghanlarning sani eng az döletlerdin biri hésablinidu. Yawropa sherqiy türkistan birliki re'isi esqerjan ependi üch aydin buyan gérmaniyediki Uyghurlarning öz'ara körüshelmey öyliride turushqa mejbur boluwatqanliqini, rozi héytning öz'ara didar körüshüsh shundaqla diniy ibaditini ada qilish üchün muhim bir héyt ikenlikini, shunga munasiwetlik idarige iltimas qilip bir baghchida héyt namizi oqush üchün ruxset alghanliqini bildürdi.

Esqerjan ependi gérmaniye hökümitining belgilimisi boyiche Uyghur jama'iti ikkige bölünüp héyt namizi oqup, ong qollirini köksige qoyup uzaqtin öz'ara salamliship héytliship tarqilip ketkenlikini, burunqigha oxshash öz'ara öylerge bérip héyt petisi qilalmighan bolsimu, emma didar körüshkenliki üchün hemme Uyghurlarning xushal bolghanliqini bayan qildi.

Uyghurlar köp olturaqlashqan türkiye bashta nurghun musulman döletlerde musulmanlar héyt namizini öyliride oqudi. Undaqta islam dinida héyt namizini öyde oqusa bolamdu? dunya Uyghur qurultiyi diniy ishlar komitéti mudiri turghunjan alawuddin ependi islam tarixida bundaq wabaning yüz bergenlikini, waba tarqalghan mezgillerde héyt namizini öyde oqusa bolidighanliqi toghrisida petiwalar bérilgenlikini otturigha qoydi.

Yawropa sherqiy türkistan birliki re'isi esqerjan ependining bildürüshiche gérmaniyede 180 ming 320 kishi korona wirusidin yuqumlan'ghan bolup, buning ichidin 161 ming 875 kishi saqayghan, ölgenlerning sani bolsa 8300 kishi bolup Uyghurlardin yuqumlan'ghan birmu kishi yoq iken. Esqer jan ependi nopusigha sélishturghanda ölgenlerning sanining az ikenlikini, gérmaniye yawropada korona wirusigha qarshi küreshte örnek bir dölet ikenlikini tekitlidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.