Германийәдә уйғур рәссамлириниң “тоғрақ роһи” намидики гүзәл сәнәт көргәзмиси өткүзүлидикән

Вашингтондин мухбиримиз меһрибан тәйярлиди
2024.05.10
Uyghur-ressam-2024 Германийәдә өткүзүлидиған уйғур рәссамлириниң “тоғрақ роһи” намидики гүзәл сәнәт көргәзмисиниң мураҗиәтнамиси
Youtube/@ToghraqRohiUyghurArtists

Германийәдики уйғур рәссам мәрвайит һапиз ханимниң радийомизға билдүрүшичә, бу йил 6-айниң 7- күнидин 9-күнигичә, германийәниң миюнхен шәһиридики сколес блотенбург мәдәнийәт мәркизидә “Тоғрақ роһи” намида уйғур рәссамлириниң май бояқ, һәйкәлтирашлиқ вә гүзәл сәнәт әсәрлири көргәзмиси өткүзүлидикән.

Германийәдики уйғур рәссам мәрвайит һапиз ханимниң уйғур академийәси уюштурған “уйғур мәдәнийитини қоғдаш хәлқара илмий муһакимә йиғини” да көргәзмигә қойған рәсимлири. 2022-Йили 14-декабир, вашингтон.
Германийәдики уйғур рәссам мәрвайит һапиз ханимниң уйғур академийәси уюштурған “уйғур мәдәнийитини қоғдаш хәлқара илмий муһакимә йиғини” да көргәзмигә қойған рәсимлири. 2022-Йили 14-декабир, вашингтон.

Мәрвайит ханим бу мунасивәт билән радийомиз зияритини қобул қилип, мәзкур көргәзмә пиланиниң вуҗудқа келиши вә тәйярлиқ хизмәтлири һәққидә тохталди.

Униң билдүрүшичә, мәзкур көргәзмә пилани америка, явропа әллири вә оттура асия җумһурийәтлиридә хилмухил услубларда өзлириниң гүзәл сәнәт иҗадийитини давам қиливатқан уйғур сәнәткарлириниң өзлүкидин тәшкиллиниши билән вуҗудқа чиққан икән.

Униң тәкитлишичә, “тоғрақ роһи” намидики бу қетимлиқ рәсим көргәзмиси әмәлийәттә муһаҗирәттики уйғур сәнәткарлириниң явропада коллектип һалда өткүзидиған тунҗи қетимлиқ гүзәл сәнәт көргәзмиси һесаблинидикән.

У йәнә бу қетимлиқ көргәзмигә қоюлидиған әсәрләр һәққидә тохтилип өтти. Униң билдүрүшичә, уйғур сәнәткарлириниң бу қетимлиқ көргәзмигә қоюлидиған әсәрлири иҗадийәт услуби җәһәттин бир-биридин пәрқ қилсиму, әмма уларда әкс әткән қоюқ уйғур мәдәнийәт муһити вә мәдәнийәт йилтизи җәһәттин мәлум ортақлиқларни намаян қилидикән.

Униң билдүрүшичә, бу йил 6-айниң башлирида өткүзүлидиған “тоғрақ роһи” намидики уйғур гүзәл сәнәт көргәзмиси, миюнхендики мәдәнийәт вә сәнәт орунлириниң қоллиши, уйғур рәссамларниң халисанә пидакарлиқи вә муһаҗирәттики уйғур җамаитиниң  йеқиндин ярдимигә еришкән. Уни муһаҗирәттики уйғур рәссамлири вә сәнәткарлириниң хәлқаралиқ сәвийәдә коллектип өткүзидиған гүзәл сәнәт көргәзмиси дейишкә болидикән.

Униң билдүрүшичә бу қетимқи көргәзмидә сәнәт нуқтисидин туруп, уйғур рәссамлиқи вә уйғур сәнәт- мәдәнийити роһини  явропада намаян қилиш нишан қилинған болуп, буни уйғурлар  вә уйғур мәдәнийитини явропа әллиридики сәнәткарлар вә хәлқигә тонутушта  елинған зор бир қәдәм дейишкә болидикән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.