Gérmaniyede Uyghur ressamlirining “Toghraq rohi” namidiki güzel sen'et körgezmisi ötküzülidiken

Washin'gtondin muxbirimiz méhriban teyyarlidi
2024.05.10
Uyghur-ressam-2024 Gérmaniyede ötküzülidighan Uyghur ressamlirining “Toghraq rohi” namidiki güzel sen'et körgezmisining muraji'etnamisi
Youtube/@ToghraqRohiUyghurArtists

Gérmaniyediki Uyghur ressam merwayit hapiz xanimning radiyomizgha bildürüshiche, bu yil 6-ayning 7- künidin 9-künigiche, gérmaniyening miyunxén shehiridiki skolés bloténburg medeniyet merkizide “Toghraq rohi” namida Uyghur ressamlirining may boyaq, heykeltirashliq we güzel sen'et eserliri körgezmisi ötküzülidiken.

Gérmaniyediki Uyghur ressam merwayit hapiz xanimning Uyghur akadémiyesi uyushturghan “Uyghur medeniyitini qoghdash xelq'ara ilmiy muhakime yighini” da körgezmige qoyghan resimliri. 2022-Yili 14-dékabir, washin'gton.
Gérmaniyediki Uyghur ressam merwayit hapiz xanimning Uyghur akadémiyesi uyushturghan “Uyghur medeniyitini qoghdash xelq'ara ilmiy muhakime yighini” da körgezmige qoyghan resimliri. 2022-Yili 14-dékabir, washin'gton.

Merwayit xanim bu munasiwet bilen radiyomiz ziyaritini qobul qilip, mezkur körgezme pilanining wujudqa kélishi we teyyarliq xizmetliri heqqide toxtaldi.

Uning bildürüshiche, mezkur körgezme pilani amérika, yawropa elliri we ottura asiya jumhuriyetliride xilmuxil uslublarda özlirining güzel sen'et ijadiyitini dawam qiliwatqan Uyghur sen'etkarlirining özlükidin teshkillinishi bilen wujudqa chiqqan iken.

Uning tekitlishiche, “Toghraq rohi” namidiki bu qétimliq resim körgezmisi emeliyette muhajirettiki Uyghur sen'etkarlirining yawropada kolléktip halda ötküzidighan tunji qétimliq güzel sen'et körgezmisi hésablinidiken.

U yene bu qétimliq körgezmige qoyulidighan eserler heqqide toxtilip ötti. Uning bildürüshiche, Uyghur sen'etkarlirining bu qétimliq körgezmige qoyulidighan eserliri ijadiyet uslubi jehettin bir-biridin perq qilsimu, emma ularda eks etken qoyuq Uyghur medeniyet muhiti we medeniyet yiltizi jehettin melum ortaqliqlarni namayan qilidiken.

Uning bildürüshiche, bu yil 6-ayning bashlirida ötküzülidighan “Toghraq rohi” namidiki Uyghur güzel sen'et körgezmisi, miyunxéndiki medeniyet we sen'et orunlirining qollishi, Uyghur ressamlarning xalisane pidakarliqi we muhajirettiki Uyghur jama'itining  yéqindin yardimige érishken. Uni muhajirettiki Uyghur ressamliri we sen'etkarlirining xelq'araliq sewiyede kolléktip ötküzidighan güzel sen'et körgezmisi déyishke bolidiken.

Uning bildürüshiche bu qétimqi körgezmide sen'et nuqtisidin turup, Uyghur ressamliqi we Uyghur sen'et- medeniyiti rohini  yawropada namayan qilish nishan qilin'ghan bolup, buni Uyghurlar  we Uyghur medeniyitini yawropa elliridiki sen'etkarlar we xelqige tonutushta  élin'ghan zor bir qedem déyishke bolidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.