Gérmaniyening eng chong soda guruhi xitay shirketliri bilen bolghan hemkarliqni bikar qildi

Gérmaniyening “Siméns” (Siemens) namliq soda-sana'et guruhining xitayning “Transemik” (Transemic) shirkiti bilen bolghan barliq soda alaqisini üzgenliki ashkarilandi.

17-Iyul gérmaniye metbu'atliri gérmaniyening eng chong soda-sana'et guruhi bolghan “Siméns” ning xitayning “Transemik” shirkiti bilen bolghan barliq soda alaqisini üzgenlikini ashkarilidi. Bu weqening 13-iyul küni gérmaniye tashqiy ishlar ministérliqi “Xitay istratégiyesi” ni élan qilip 4 kündin kéyin yüz bérishi diqqetni tartti.

Gérmaniyede neshirdin chiqidighan “Soda géziti” ning 17-iyul élan qilghan “Siméns xitayning qoral-yaraq shirketliri bilen bolghan alaqisini üzdi” namliq xewerlerde ilgiri sürüshiche, “Siméns” hemkarlashqan xitayning qisqiche “Transemik” dep atalghan “Béyjing tiyenshéngxu'a uchur téxnika cheklik shirkiti”, xitay herbiy sana'itini téxnika bilen teminleydighan bir shirket bolup, bu shirketni amérika hökümiti bu yil 6-ayning 12-küni qara tizimlikke kirgüzgen iken. “Siméns” yene yéqinqi yillardin buyan “Xitayning dölet mudapi'esidiki 7 uniwérsitét” dep atalghan béyjing awi'atsiye uniwérsitéti, béyjing sana'et uniwérsitéti, xarbén sana'et uniwérsitéti, gherbiy-shimal sana'et uniwérsitéti, nenjing awi'atsiye uniwérsitéti, nenjing sana'et uniwérsitéti qatarliqlar bilen yuqiri téxnologiyede iqtisadiy hemkarliq élip barghan. Halbuki, bu uniwérsitétlar xitayning dölet mudapi'e tereqqiyati üchün xizmet qilidighan organlar bolup chiqqan.

Türkiyediki istratégiye mutexessisi doktor erkin ekremning qarishiche, “Siméns” ning xitay shirketliri bilen bolghan hemkarliqni bikar qilishigha xitayning chet el shirketlirige qaritilghan bésimliri we zorawanliqliri seweb bolghan. U sözide yene yawropa ittipaqining yuqiri derijilik hökümet emeldarlirining yéqindin buyanqi xitayni yuqiri derijilik téxnika bilen teminlimeslik toghrisidiki teshebbusliriningmu “Siméns” ning xitaydin chékinish yolini tallishigha seweb bolghan muhim amillar qatarida sanilidighanliqini bayan qildi.

Gérmaniyediki weziyet analizchisi gheyur qurban ependining qarishiche, “Siméns” ning xitay shirketliri bilen bolghan alaqisini üzüshi gérmaniyening yéngi “Xitay istratégiyesi” we Uyghur irqiy qirghinchiliqi bilen munasiwetsiz emesken. Uning ilgiri sürüshiche, “Siméns” shirkiti uzun mezgillerdin buyan Uyghur mejburiy emgiki mesilisi seweblik gérmaniyede qattiq tenqidige uchrap kelgen bir shirket iken. Bu shirketning xitaydin chékinishke yüzlinishi, gérmaniyening bashqa shirketlirigimu tesir körsitidiken.

Melum bolushiche, gérmaniyening “Siménis” namliq soda-sana'et guruhi 1847-yili qurulghan bolup, uning bash shtabi bérlin we myunxén'gha jaylashqan. “Siméns” ning hazirqi ishchi-xizmetchilirining sani 311 mingdin artuq iken hemde 190 dölette zawut we shirketliri barken. “Siméns” ning 2022-yilliq tapawiti 72 milyard yawrogha yetken. Bu shirketning xitay bilen bolghan soda munasiwiti 1872-yili bashlan'ghan bolup, eyni waqittiki menching sulalisining paytexti béyjingda 1899-yili yolgha qoyulghan tunji poyiz qatnishi mezkur shirketning téxnikisi bilen wujudqa chiqqan iken.