Германийә парламенти җаза лагерлири тоғрисида гуваһлиқ бериш йиғини өткүзди

Ихтиярий мухбиримиз әкрәм
2020-11-05
Share
germaniyede-lager-guwahliq.jpg Германийә парламенти әзалиридин маргерита бавзи вә саман марди қатарлиқларниң риясәтчиликидә уйғурлар үстидин йүргүзүлүватқан ирқий қирғинчилиқ тоғрисида тор арқилиқ гуваһлиқ бериш йиғини өткүзүлди. 2020-Йили 4-ноябир.
RFA/Ekrem

Уйғурлар үстидин йүргүзүлүватқан ирқий қирғинчилиқ германийәдики гуваһлиқ бериш йиғининиң асаслиқ темисини тәшкил қилди.

4-Ноябир германийә парламенти әзалиридин маргерита бавзи вә саман марди қатарлиқларниң риясәтчиликидә уйғурлар үстидин йүргүзүлүватқан ирқий қирғинчилиқ тоғрисида тор арқилиқ гуваһлиқ бериш йиғини өткүзүлди.

Йиғинға иштирак қилған д у қ яшлар комитетиниң рәиси вә д у қ берлин ишханисиниң мудири ғәюр қурбан әпәндиниң билдүрүшичә, д у қ билән һәмкарлиқта елип берилған бу гуваһлиқ бериш йиғиниға һакимийәт бешидики көплигән партийәләрниң вәкиллири һәм германийә парламентиниң көплигән муһим әзалири, бәзи кишилик һоқуқ тәшкилатлириниң рәһбәрлириму қатнашқан. Ғәюр қурбан «наштилиқ йиғилиши» дәп аталған бу йиғинға 70 тин артуқ кишиниң иштирак қилғанлиқини тилға алди.

Гуваһлиқ бериш йиғиниға лагер шаһити сайрагүл савутбай вә қәлбинур сидиқлар гуваһлиқ бәргүчиләр сүпитидә тәклип қилинған. Сайрагүл савутбай бу һәқтә зияритимизни қобул қилғанда, бу йиғин пурситидин пайдилинип, өзиниң хитай зулуми астида азаб чекиватқан шәрқий түркистан хәлқиниң дәрт-әләмлирини йәнә бир қетим аңлитип өткәнликини билдүрди.

Йиғинға көзәткүчи сүпитидә иштирак қилған уйғур зиялийси меһрибан мәмәтниң билдүрүшичә, германийә йешиллар партийәси вә сотсиял демократлар партийәсиниң д у қ билән һәмкарлишип елип барған бу паалийитидә хитай һакимийитиниң җаза лагерлири арқилиқ уйғурлар үстидин елип бериватқан ирқий қирғинчилиқлири әтраплиқ аңлитилған.

Мәлум болушичә, германийә йешиллар партийәсиниң парламеттики сөзчиси маргерита бавзи ханим бу қетимқи тор арқилиқ өткүзүлгән гуваһлиқ бериш йиғининиң муқәддимисидә қилған сөзидә, хитайниң уйғурлар вә башқа мусулман милләтләр үстидин елип бериватқан бастуруш сияситиниң хәлқарада «ирқий қирғинчилиқ» дәп атиливатқанлиқини әскәртип өткән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт