Gérmaniye parlaménti jaza lagérliri toghrisida guwahliq bérish yighini ötküzdi

Ixtiyariy muxbirimiz ekrem
2020.11.05
germaniyede-lager-guwahliq.jpg Gérmaniye parlaménti ezaliridin margérita bawzi we saman mardi qatarliqlarning riyasetchilikide Uyghurlar üstidin yürgüzülüwatqan irqiy qirghinchiliq toghrisida tor arqiliq guwahliq bérish yighini ötküzüldi. 2020-Yili 4-noyabir.
RFA/Ekrem

Uyghurlar üstidin yürgüzülüwatqan irqiy qirghinchiliq gérmaniyediki guwahliq bérish yighinining asasliq témisini teshkil qildi.

4-Noyabir gérmaniye parlaménti ezaliridin margérita bawzi we saman mardi qatarliqlarning riyasetchilikide Uyghurlar üstidin yürgüzülüwatqan irqiy qirghinchiliq toghrisida tor arqiliq guwahliq bérish yighini ötküzüldi.

Yighin'gha ishtirak qilghan d u q yashlar komitétining re'isi we d u q bérlin ishxanisining mudiri gheyur qurban ependining bildürüshiche, d u q bilen hemkarliqta élip bérilghan bu guwahliq bérish yighinigha hakimiyet béshidiki köpligen partiyelerning wekilliri hem gérmaniye parlaméntining köpligen muhim ezaliri, bezi kishilik hoquq teshkilatlirining rehberlirimu qatnashqan. Gheyur qurban “Nashtiliq yighilishi” dep atalghan bu yighin'gha 70 tin artuq kishining ishtirak qilghanliqini tilgha aldi.

Guwahliq bérish yighinigha lagér shahiti sayragül sawutbay we qelbinur sidiqlar guwahliq bergüchiler süpitide teklip qilin'ghan. Sayragül sawutbay bu heqte ziyaritimizni qobul qilghanda, bu yighin pursitidin paydilinip, özining xitay zulumi astida azab chékiwatqan sherqiy türkistan xelqining dert-elemlirini yene bir qétim anglitip ötkenlikini bildürdi.

Yighin'gha közetküchi süpitide ishtirak qilghan Uyghur ziyaliysi méhriban memetning bildürüshiche, gérmaniye yéshillar partiyesi we sotsiyal démokratlar partiyesining d u q bilen hemkarliship élip barghan bu pa'aliyitide xitay hakimiyitining jaza lagérliri arqiliq Uyghurlar üstidin élip bériwatqan irqiy qirghinchiliqliri etrapliq anglitilghan.

Melum bolushiche, gérmaniye yéshillar partiyesining parlaméttiki sözchisi margérita bawzi xanim bu qétimqi tor arqiliq ötküzülgen guwahliq bérish yighinining muqeddimiside qilghan sözide, xitayning Uyghurlar we bashqa musulman milletler üstidin élip bériwatqan basturush siyasitining xelq'arada “Irqiy qirghinchiliq” dep atiliwatqanliqini eskertip ötken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.