Чәтәлләрдики әң чоң уйғур гезитиниң йетәкчиси йолдаш азаматоф вапат болди

Ихтиярий мухбиримиз ойған
2021-08-06
Share
Чәтәлләрдики әң чоң уйғур гезитиниң йетәкчиси йолдаш азаматоф вапат болди "уйғур авази" гезитиниң сабиқ баш муһәррири йолдаш азаматоф әпәнди. (Вақти вә орни ениқ әмәс)
RFA/Oyghan

Йеқинда қазақистанниң алмута шәһиридә қазақистан җумһурийәтлик "уйғур авази" гезитини узун йиллар давамида башқурған, қазақистан журналистлар иттипақиниң әзаси, қазақистанниң хизмәт көрсәткән әрбаби, язғучи йолдаш азаматоф 74 йешида вапат болди.

Йолдаш азаматофниң вапати қазақистан вә башқа оттура асия әллиридики уйғурларни ечиндурди. Чүнки у көп йиллардин буян оттура асия уйғурлири арисида әдәбият, журнализм саһәсидә кәң тонулған шуниңдәк өзи башқурған гезит арқилиқ уйғур әдәбияти, мәдәнийитини тәрәққий қилдурушқа һәссә қошқан әрбаб иди.

Мәлумки, йолдаш азаматоф башқурған "уйғур авази" сабиқ совет иттипақи дәвридә қазақистанда 1957-йилдин тартип та совет иттипақи йимирилгүчә "коммунизм туғи" намида чиққан вә кейин "уйғур авази" дәп өзгәртилгәниди. У қазақистандила әмәс, бәлки оттура асия, һәтта омумән чәтәлләрдики уйғурларниң әң чоң гезити һесаблинип, уйғурлар ичидин чиққан атақлиқ зиялийлар вә журналистлар тәрипидин рәһбәрлик қилинип кәлгәниди. Һәр хил йилларда уни әхмәтҗан мәмәтоф, абдулла мәшүроф, турдахун нәзәроф, йолдаш азаматоф вә башқа уйғур зиялийлири башқуруп кәлгәниди.

Мәрһум йолдаш азаматоф "уйғур авази" гезитини 1987-вә 2012-йилар арилиқида, йәни 25 йил давамида башқурған болуп, саламәтликигә бола дәм елишқа чиққан болсиму, җавабкарлиқи чәкләнгән "қазақ гезитлири" һәссидарлиқ ширкитидә баш мудириниң мәслиһәтчиси хизмитидә ишлигәниди.

Мәрһум билән хошлишиш мурасими 6-авғуст күни униң алмута шәһиридики өйидә корона вируси мунасивити билән тар шәкилдә өткән болуп, униңға зиялийлар, мәрһумниң уруқ-туғқанлири, юртдашлири қатнашқан. Униңда сөзгә чиққан қазақистанниң сабиқ сенатори марс батталоф, язғучи вә журналист исмайилҗан иминоф, "уйғур авази" гезитиниң муһәррири шөһрәт мәсимоф, алмута шәһәрлик уйғур мәдәнийәт мәркизиниң рәиси османҗан обулоф, "вечерний алмати", йәни "кәчлик алмута" гезити баш муһәрририниң орунбасари абдухелил җәлилоф вә башқилар йолдаш азаматофниң қазақистан уйғур мәдәнийити вә журналистика саһәлиригә қошқан төһписини юқири баһалиди.

Радийомиз зияритини қобул қилған җумһурийәтлик уйғур етно-мәдәнийәт мәркизи рәисиниң орунбасари, "уйғур авази" гезитиниң баш муһәррири йершат әсмәтоф йолдаш азаматофниң маһир тәшкилатчи, рәһбәр болғанлиқини илгири сүрүп, мундақ деди: "йолдаш азаматоф қолида мән алий оқуш орни оқуғучиси болуш алдида ишлидим. Дәсләпки мақалилиримни йолдаш азаматофқа мушу гезиткә рәһбәрлик қилғандин тартип бәрдим. Журналистика кәспимни таллишимда бу гезит наһайити чоң рол ойниди. У бизгә рәһбәрла әмәс, устазму болди. Униң йәнә бир чоң иши кадир мәсилисини йешиштә наһайити чоң рол ойниди".

Йершат әсмәтоф йолдаш азаматофниң җәмийәтлик ишлардиму чоң паалийәтчанлиқ көрсәткәнликини, қазақистан хәлқи ассамблейәсиниң әзаси сүпитидә 18 йил мабәйнидә милләтләр достлуқи, разимәнлик, бирлик йолида тинмай әмгәк қилғанлиқини оттуриға қойди.

Игилинишичә, йолдаш абдуқадир оғли азаматоф 1947-йили қазақистанниң яркәнт районида дуняға кәлгән. У 1965-йили яркәнт шәһиридики һазирқи хелил һәмрайеф намидики уйғур оттура мәктипини тамамлиғандин кейин, алмута шәһиридики қазақ дөләт университетиниң журналистика факултетиниң рус бөлүмигә оқушқа кирип, уни 1971-йили тамамлиған. Йолдаш азаматоф 1971-1984-йиллири җумһурийәтлик "коммунизм туғи", йәни һазирқи "уйғур авази" гезитиниң редаксийәсидә әдәбий хадим, бөлүм башлиқи вә баш муһәррирниң орунбасари лавазимлирида ишлигән. 1984-Йили у москвадики иҗтимаий пәнләр академийәсигә оқушқа кирип, 1987-йилғичә алмута вилайәтлик партийә комитетида ишлигән.

Алмута вилайити панфилоф наһийәлик уйғур етно-мәдәнийәт мәркизиниң сабиқ рәиси реһимҗан тохтахуноф әпәндиниң ейтишичә, йолдаш азаматофниң вапати болупму униң юрти яркәнт тәвәсидә яшаватқан юртдашлири үчүн чоң вә орни толмас йоқитиш болғанкән. У мәрһумниң омумән қазақистан мәтбуатиниң раваҗлинишиғиму бир кишилик һәссисини қошқанлиқини вә бу җәһәттә яш журналистларниң тәрбийәлинип чиқишиғиму дегәндәк нәзәр ағдурғанлиқини тәкитләп, мундақ деди: "йолдашни мән 60-йилларниң иккинчи йеримидин башлап яхши билимән. У кироф мәктипидә, йәни һазирқи хелил һәмраһ намидики мәктәптә оқуватқан чағлири мән педагогика техникомини пүттүрүп, шу мәктәпкә музика пенидин муәллим болуп кәлгәндин башлап униң билән ағинә болдум. Шу вақитларда йолдаш кичик-кичик юмурлирини, мақалилирини йезип йүргәниди. Йолдаш уйғур мәдәнийитиниң өсүшигә чоң һәссә қошти. У'уйғур авази‹ни әң қийин йилларда сақлап қалди".

Реһимҗан тохтахуноф ғоҗәхмәт сәдвақасоф, қуддус ғоҗамяроф қатарлиқ уйғур әрбаблири вә тонулған қазақ зиялийлири билән бирликтә һәрикәт қилип, уйғур мәдәнийитиниң тәрәққиятида муһим рол ойниғанлиқини тәкитлиди. У йәнә бүгүнки күндә ваба вәзийити мунасивити билән йолдаш азаматофни ахирқи йолға узитиш мурасиминиң наһайити тар даиридә өткәнликини билдүрди.

Мәлум болушичә, йолдаш азаматоф әдәбий иҗадийәт биләнму шуғуллинип, "йүткән пичақ" "ядикарниң бовиси", "үмид", "бизму яш болған" әсәрлирини иҗад қилған. У йәнә "20-әсир намайәндилири", "өлүмгә қиймайдиған инсан иди", "тарих савақлири яки өтмүшсиз келәчәк йоқ", "әң еғир пәйтләрдиму қәдир-қиммитини йоқатмиған" топламлириниң лайиһә аптори вә топлиғучиси болған. Униң һикайилири рус, қазақ тиллиридиму нәшр қилинған шуниңдәк бирқисим һекайилири уйғур елидиму тарқилип оқурмәнләрниң алқишиға сазавәр болғаниди.

18 Йил җәрянида қазақистан хәлқи ассамблейәсиниң әзаси, шундақла қазақистан язғучилар иттипақи башқармисиниң әзаси болған вә көплигән дөләт мукапатлириға еришкән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт