Ғайиб ака-ука сәртирач муртиза билән мәһмутниң үчтурпандики лагерда икәнлики дәлилләнди

Мухбиримиз шөһрәт һошур
2020-03-16
Елхәт
Пикир
Share
Принт
Түркийәдә яшаватқан зәйтунә мәмәтниң учтурпан наһийәсидики лагерға соланған акиси мәһмут мәмәт вә аилиси.
Түркийәдә яшаватқан зәйтунә мәмәтниң учтурпан наһийәсидики лагерға соланған акиси мәһмут мәмәт вә аилиси.
Zeytune Memet teminligen

Түркийәдә яшаватқан зәйтунә мәмәт йеқинда иҗтимаий таратқуларда баянат елан қилип, аниси айтурәм худәшниң бир йил лагерда йетип чиққанлиқи, акиси муртиза мәмәт билән иниси мәһмут мәмәтниң үч йилдин бери һечқандақ из-дерики йоқлуқи һәққидә гуваһлиқ бәргән иди. Мухбиримизниң ениқлашлири давамида муртиза билән мәһмутниң учтурпан наһийәсидики лагерда икәнлики дәлилләнди.

Хитай даирилири уйғур районида лагерларниң тақалғанлиқи вә аталмиш курсантларниң өз җайлирида ишқа орунлашқанлиқини базарға салған иди. Әмма лагерлардики мутләқ көп сандики тутқунларниң техи өйигә қайтмиғанлиқи, бир қисминиң кесилип түрмиләргә, бир қисминиң мәҗбурий әмгәк үчүн завут-фабрикаларға йолланғанлиқи, йәнә зор бир қисминиң техичә лагерда икәнлики уйғур райондин игилигән учурлиримиз билән бирликтә муһаҗирәттики уйғурларниң гуваһлиқ баянатлиридинму ашкариланмақта.

2015‏-Йили той қилип түркийәгә көчүп кәлгән зәйтунә мәмәт 2017‏-йилиниң бешидин башлап юрти учтурпан ақярдики аилә әзалири билән алақиси үзүлгән. У 2018‏-йилиниң оттурилириға кәлгәндә бир йилға йеқин давам қилған һәр хил қаналлар билән сүрүштә қилиш нәтиҗисидә аниси айтурәм худәшниң бир йир лагерда йетип чиққанлиқидин хәвәр тапқан. У аниси билән телефонда бир көрүшүшниң йолини қиливатқан мәзгилидә шуниңғичә из-дерики болмай келиватқан акиси муртиза мәмәт билән иниси мәһмут мәмәтниңму лагерда икәнликиниң шәписини алған.

Телефонимизни қобул қилған ақяр сақчиханисиниң хадими муртиза ачқан гүзәллик салониниң сақчихана билән 500 метирчә арилиқта икәнликини тилға алған болсиму, әмма бу салонниң нөвәттә маңдуриливатқан яки иштин тохтиғанлиқи һәққидә мәлумат берәлмиди. Бу хадим немә үчүндур муртиза мәмәтниң әһвали һәққидә гәп ечилиш билән тәң кәйпияти җиддийләшти вә соаллиримизниң давамиға қулақ селиштинму ваз кәчти.

Зәйтунәниң дейишичә, 2011‏-йилидин бери учтурпанниң ақяр йезисида гүзәллик салони ечип сәртирачлиқ қиливатқан; бир вә үч пәрзәнтлик икки аилиниң һөддисидин чиқиватқан муртиза мәмәт билән мәһмут мәмәтниң тутулуш сәвәби һәққидә һечқандақ бир йип учиға еришәлмигән. Зәйтунә гуваһлиқ баянатида икки қериндишиниң уйғур районида лагерларға соланған милйонларчә кишиләргә охшашла гунаһсиз икәнликини, уларниң тутулушиға миллий кимликиниң бирдин-бир сәвәб болғанлиқини илгири сүргән вә хәлқара җамаәттин ярдәм тәләп қилған.

Зәйтунә икки қериндишиниң тутулуш сәвәблири һәққидики пәрәзлирини баян қилғинида муртизаниң бәш вақ намазни тәрк әтмәйдиған тәқвадар бир киши икәнликини, мәһмутниң болса иҗтимаий паалийәтләрдә актип бир киши икәнликини тилға алди. У йәнә ахирқи қетимлиқ сөһбәттә акисиниң түркийәгә келиш пиланини тилға алғалиқини, мана буниң униң тутулушиға баһанә қилинған болуш мумкинликини илгири сүрди.

Ақяр йезисидики йәнә бир сақчи хадими зәйтунәниң юқириқи пәризиниң тоғрилиқини вә муртиза билән мәмутниң нөвәттә үчтурпандики бир лагерда икәнликини дәлиллиди.

Зәйтунәниң баян қилишичә, қериндашлири ичидә нәччә вақиттин бери из-дерики мәлум болуп туруватқан вә үрүмчидики бир алий мәктәптә оқуватқан айнәзәр мәмәтниңму йеқинқи үч айдин буян из-дерики йоқалған.

Пикирләр (0)
Share
Толуқ бәт