Ghayib aka-uka sertirach murtiza bilen mehmutning üchturpandiki lagérda ikenliki delillendi

Muxbirimiz shöhret hoshur
2020-03-16
Élxet
Pikir
Share
Print
Türkiyede yashawatqan zeytune memetning uchturpan nahiyesidiki lagérgha solan'ghan akisi mehmut memet we a'ilisi.
Türkiyede yashawatqan zeytune memetning uchturpan nahiyesidiki lagérgha solan'ghan akisi mehmut memet we a'ilisi.
Zeytune Memet teminligen

Türkiyede yashawatqan zeytune memet yéqinda ijtima'iy taratqularda bayanat élan qilip, anisi ayturem xudeshning bir yil lagérda yétip chiqqanliqi, akisi murtiza memet bilen inisi mehmut memetning üch yildin béri héchqandaq iz-dériki yoqluqi heqqide guwahliq bergen idi. Muxbirimizning éniqlashliri dawamida murtiza bilen mehmutning uchturpan nahiyesidiki lagérda ikenliki delillendi.

Xitay da'iriliri Uyghur rayonida lagérlarning taqalghanliqi we atalmish kursantlarning öz jaylirida ishqa orunlashqanliqini bazargha salghan idi. Emma lagérlardiki mutleq köp sandiki tutqunlarning téxi öyige qaytmighanliqi, bir qismining késilip türmilerge, bir qismining mejburiy emgek üchün zawut-fabrikalargha yollan'ghanliqi, yene zor bir qismining téxiche lagérda ikenliki Uyghur rayondin igiligen uchurlirimiz bilen birlikte muhajirettiki Uyghurlarning guwahliq bayanatliridinmu ashkarilanmaqta.

2015‏-Yili toy qilip türkiyege köchüp kelgen zeytune memet 2017‏-yilining béshidin bashlap yurti uchturpan aqyardiki a'ile ezaliri bilen alaqisi üzülgen. U 2018‏-yilining otturilirigha kelgende bir yilgha yéqin dawam qilghan her xil qanallar bilen sürüshte qilish netijiside anisi ayturem xudeshning bir yir lagérda yétip chiqqanliqidin xewer tapqan. U anisi bilen téléfonda bir körüshüshning yolini qiliwatqan mezgilide shuningghiche iz-dériki bolmay kéliwatqan akisi murtiza memet bilen inisi mehmut memetningmu lagérda ikenlikining shepisini alghan.

Téléfonimizni qobul qilghan aqyar saqchixanisining xadimi murtiza achqan güzellik salonining saqchixana bilen 500 métirche ariliqta ikenlikini tilgha alghan bolsimu, emma bu salonning nöwette mangduriliwatqan yaki ishtin toxtighanliqi heqqide melumat bérelmidi. Bu xadim néme üchündur murtiza memetning ehwali heqqide gep échilish bilen teng keypiyati jiddiyleshti we so'allirimizning dawamigha qulaq sélishtinmu waz kechti.

Zeytunening déyishiche, 2011‏-yilidin béri uchturpanning aqyar yézisida güzellik saloni échip sertirachliq qiliwatqan؛ bir we üch perzentlik ikki a'ilining höddisidin chiqiwatqan murtiza memet bilen mehmut memetning tutulush sewebi heqqide héchqandaq bir yip uchigha érishelmigen. Zeytune guwahliq bayanatida ikki qérindishining Uyghur rayonida lagérlargha solan'ghan milyonlarche kishilerge oxshashla gunahsiz ikenlikini, ularning tutulushigha milliy kimlikining birdin-bir seweb bolghanliqini ilgiri sürgen we xelq'ara jama'ettin yardem telep qilghan.

Zeytune ikki qérindishining tutulush sewebliri heqqidiki perezlirini bayan qilghinida murtizaning besh waq namazni terk etmeydighan teqwadar bir kishi ikenlikini, mehmutning bolsa ijtima'iy pa'aliyetlerde aktip bir kishi ikenlikini tilgha aldi. U yene axirqi qétimliq söhbette akisining türkiyege kélish pilanini tilgha alghaliqini, mana buning uning tutulushigha bahane qilin'ghan bolush mumkinlikini ilgiri sürdi.

Aqyar yézisidiki yene bir saqchi xadimi zeytunening yuqiriqi perizining toghriliqini we murtiza bilen memutning nöwette üchturpandiki bir lagérda ikenlikini delillidi.

Zeytunening bayan qilishiche, qérindashliri ichide nechche waqittin béri iz-dériki melum bolup turuwatqan we ürümchidiki bir aliy mektepte oquwatqan aynezer memetningmu yéqinqi üch aydin buyan iz-dériki yoqalghan.

Toluq bet