Даириләр ғайиб дохтур сәйярә ниҗатниң нәдиликини аилисигә 4 йилдин кейин билдүргән, әмма техичә симасини көрситип берәлмигән

Мухбиримиз шөһрәт һошур
2021-03-24
Share
Үрүмчи достлуқ дохтурханисиниң дохтури сәйярә ниҗат 3 йилдин буян из-дерәксиз ғайип болған Үрүмчи достлуқ дохтурханисиниң дохтури сәйярә ниҗат ханим. (Вақти вә орни ениқ әмәс)
Nadire Nijat teminligen

Үрүмчи шәһәрлик 3-дохтурханиниң ғайиб дохтури сәйярә ниҗат һәққидә бу йил январда радийомиз тәрипидин икки парчә хәвәр берилип, 15 күн өткәндә униң һаят икәнлики даириләр тәрипидин ғулҗадики ата-анаисиға уқтурулған. Мәзкур аилә сәйярә тутулуп 4 йилдин кейин еришкән бу тунҗи хәвәрдин бәлгилик дәриҗидә мәмнун болған болсиму, әмма техичә униң билән нә телефонда, нә екранда көрүшүшүш пурситигә еришәлмигән. Мәзкур аилә нөвәттә сәйярәниң һаят икәнлики һәққидики учурниң тоғрилиқидинму гуманланмақта.

Ғайиб дохтур сәйярә ниҗат тутуп кетилгәндин кейин, униң ғулҗадики ата‏-аниси 4 йилғичә униң тәқдири һәққидә һечқандақ учур алалмиған. Сәйярә ниҗатниң түркийәдики һәдиси вә америкадики туғқанлири бу йилниң бешида әһвални хәлқараға ашкарилап, аридин икки һәптә вақит өткәндә алақидар һөкүмәт хадимлири униң ғулҗадики ата-анисини издәп берип, сәйярәниң үрүмчи биринчи түрмидә икәнликини уқтурған вә униң пат арида аилиси билән телефон яки екранда көрүштүрүлидиғанлиқи билдүрүлгән.

Сәйярәниң америкадики туғқанлиридин рәхи һаҗи бу тунҗи учурни алғандин кейин, сәйярәниң аман-есәнликидин бираз хатирҗәм болған вә сәйярәниң ата-аниси билән көрүштүрүлүшини вә саламәтлики һәққидә иҗабий бир учур елишни күткән. Гәрчә даириләр мәзкур учурни 2-айниң оттурилири йәткүзгән вә һазирға қәдәр бир йерим айчә вақит өткән болсиму, даириләрниң мәзкур вәдиси техичә әмәлийләшмигән. Сәйярәниң ғулҗадики ата-аниси техичә сәйярә билән нә икранда, нә телефонда көрүшүш пурситигә еришәлмигән.

Бу әһвал нөвәттә сәйярәниң чәт әлдики уруқ-туғқанлирини, болупму униң америкадики туғқини рәхий һаҗини қаттиқ әндишигә салмақта. Рәхий һаҗиниң қаришичә, тутқунда икәнлики әң башта аилисигә билдүрүлүп болған бир мәһбусниң 4 йилғичиму делосиниң хуласиси чиқмаслиқи, униң үстигә екран яки телефондиму көрүштүрүлмәслики нормал бир әһвал әмәс, бәлки қорқунучлуқ бир ишарәт икән.

Униң үстигә йеқинқи айларда лагир шаһиди турсунай зиявудуниң лагер ичидики җинсий зорванлиқлар һәққидә бәргән баянатлири рәхий һаҗиниң гуман вә әндишилирини техиму күчәйткән.

Сәйярә ниҗат һәққидә өткән айниң бешида игилигән бир хәвиримиздә, униң сақчиларға маслашмиғанлиқи үчүн делосиниң хуласиси чиқмайватқанлиқи вә аилиси билән көрүштүрлмәйватқанлиқи бир сақчи хадими тәрипидин тилға елинған иди. Лагер шаһидлири, сақчиларниң "маслашмаслиқ" дегән бу шикайитини чоң-кичик һәр хил ақивәтләр үчүн ишлитилидиғанлиқини илгири сүрүшкән иди.

Нөвәттә сәйярәниң чәт әлдики уруқ-туғқанлири униң һаят икәнлики һәққидә даириләр бәргән учурниңму тоғрилиқидин гуманланмақта. Сәйярәниң ғайиблиқи һәққидә әң дәсләп ахбаратқа еғиз ачқан рәхий һаҗим, хәлқара җамаәт вә уйғур тәшкилатлиридин өзлириниң сәйярә ниҗатниң из-дерикини қилишиға давамлиқ ярдәмдә болушини тәләп қилмақта.

Юқирида ғайиб дохтур сәйярә ниҗатниң әһвали хәлқараға ашкариланғандин кейин, даириләр униң нәдиликини аилисигә билдүргән болсиму, техичә сеймасини көрситип берәлмәйватқанлиқи һәққидә мәлумат бәрдуқ.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт