Ghayib muzikant dilshat munewwer sürüshte qilinish jeryanida yéza bashliqi exmet tursunning tutqunda ikenliki ashkarilandi

Muxbirimiz shöhret hoshur
2021-03-08
Share
Ghayib muzikant dilshat munewwer sürüshte qilinish jeryanida yéza bashliqi exmet tursunning tutqunda ikenliki ashkarilandi Toqsunning shah yézisidiki muzika oqutquchisi dilshat munewwer. (Waqti éniq emes)
Güli Mexsut teminligen

Weziyettin xewerdar kishilerdin biri turpanning toqsun nahiyeside bu yil kirgendin buyan tutqun qilishning yene dawam qilghanliqi, bu qétimqisida ötkenki zerbilerdin aman qalghan dölet xizmetchilirining asasliq nishan bolghanliqini inkas qilghan idi. Inkasta yene toqsunning shah yézisidiki muzika oqutquchisi dilshat munewwerning 2 ay awwal tutulghanliqi, bu weziyetning pakiti süpitide tilgha élin'ghan idi. Muxbirimizning dilshat munewwerni sürüshte qilishi dawamida, kömüsh yézisining yéza bashliqi exmet tursunning 2 ay awwal tutqun qilin'ghanliqi ashkarilandi.

Xitay da'iriliri Uyghur rayonidiki lagérlarning 2019‏-yili taqalghanliqini ilgiri sürüwatqan bolsimu, lagérlar taqalmayla qalmastin, uninggha üstilep adem soliniwatqanliqi melum bolmaqta. Toqsun nahiyesining weziyitidin xewerdar kishilerdin biri kanadadiki yotupchi güliy mexsutqa uchur yollap, toqsunning shah yézisidiki muzika oqutquchisi dilshat munewwerning 2 ay awwal tutqun qilin'ghanliqi we hazirghiche iz-dériki yoqluqini inkas qilghan. Inkas qilinishiche, bu yil 24 yashqa kirgen dilshat munewwer shah yézisining jigde quduq kentide olturushluq iken. Biz bu uchurni delillesh üchün toqsundiki alaqidar idare organlargha téléfon qilduq. Téléfonimizni qobul qilghan shah yéziliq saqchixana xadimi dilshat munewwer heqqide melumat bérishni ret qildi. Yéziliq hökümet xadimi bu yézida dilshat munewwer isimlik bir muzika oqutquchisi barliqini inkar qilmidi, emma uning teqdiri heqqide melumat bérelmidi. Biz dilshat munewwerning ehwalini éniqlishimiz dawamida téléfonimiz kömüsh yéziliq saqchixanigha baghlandi. Mezkur saqchixana xadimidin bu yézining ma'aripqa mes'ul yéza bashliqining kim ikenlikini sorighinimizda, uning bir mezgildin béri xizmet ornida yoq ikenlikini éytti. Bu yoq bolushning seweni sorighinimizda, uning ikki aydin béri tutqunda ikenliki ashkarilandi. Melum bolushiche bu yil 40 yashlargha kirgen exmet tursun eslide toqsunning bostan yézisidin iken. Uning bu yézida qachandin béri ishlewatqanliqi we néme sewebtin tutulghanliqi melum emes. Emma ilgiriki éniqlashlirimizda adette her derijilik hakimiyet ornida emel tutqun Uyghur kadirlarning yéqinqi yillarda asasen dégüdek "Ikki yüzlimichilik" gumani bilen tutulghanliqi melum bolghan idi.

Yene ilgiriki éniqlashlirimizda xotendiki bir sékrétar ahalining 40 pirsentini "Terbiyelesh" heqqide uqturush barliqini bayan qilghan bolsa, korladiki bir milletler ittipaqliqi ülgisi da'irilerning Uyghurlargha qarita atalmish "Terbiyelesh" nisbitini 98 pirsentke yetküzüsh pilani barliqini tilgha alghan idi. Yene bezi uchurlarda1970-yillardin2000 ‏-yillargha qeder tughulghan kishilerning "Xeterlik ewlad" dep qarilip, "Terbiyelesh" obyékti qilin'ghanliqimu melum bolghan. Muzika oqutquchisi dilshat munewwer bilen yéza bashliqi exmet tursunning yuqiriqi katégoriyelerning qaysisigha uyghun kélip tutulghanliqi hazirche melum emes.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet