Түркийә сәпиридә ғайиб болған йопурғулуқ тиҗарәтчи ибраһим қурбанниң қамақханида өлгәнлики дәлилләнди

Мухбиримиз шөһрәт һошур
2019-11-12
Елхәт
Пикир
Share
Принт
Түркийә сәпиридә ғайиб болған йопурғулуқ тиҗарәтчи ибраһим қурбан.
Түркийә сәпиридә ғайиб болған йопурғулуқ тиҗарәтчи ибраһим қурбан.
RFA/Shöhret Hoshur

Түркийәдики йопурғулуқ муһаҗирларниң ашкарилишичә, 2016-йили 5-айда йопурғидин түркийәгә қарап йолға чиққан тиҗарәтчи ибраһим қурбан үрүмчигә кәлгәндин кейин из-дерики ғайиб болған. Айропилан белити елинип болған ибраһим қурбанниң айропилан учушқа икки күн қалғанда из-дерики ғайиб болуши униң түркийәдики достлирини әндишигә салған. Улар, алақидар қаналлири арқилиқ ибраһим қурбанниң йопурғида қамақханида өлгәнликидин 2 йил кейин хәвәр тапқан. Мухбиримизниң йопурғиға қарита елип барған телефон зиярәтлири давамида ибраһим қурбанниң қамақханида өлгәнлики дәлилләнди.

Әслидә йопурғиниң терим йезисидин болған вә үрүмчидә аблиз сода сарийида дукан ечиватқан тиҗарәтчи ибраһим қурбан, 2016-йили 4-айда бир дости билән бирликтә түркийәгә саяһәткә кәлгән. Түркийәдики икки һәптилик саяһити җәрянида түркийәдә тиҗарәт қилишни пиланлиған ибраһим қурбан, шу йили 5 ‏-айда йопурғидин түркийәгә қарап иккинчи рәт сәпәр қилған. Әмма у үрүмчигә кәлгәндин кейин, униң из-дерики ғайиб болған. Униң бу сәпиридин хәвири болған униң түркийәдики достлири, у белитини алған айропиланниң учушиниң алди-кәйнидә көп сүрүштә қилған болсиму, униң ақивити һәққидә һечқандақ учур алалмиған. 2017-Йили башланған лагерға адәм тутуш долқуни, ибраһим қурбан һәққидә учур елишни техиму мүмкинсизләштүргән. Аридин икки йилчә өткәндә, униң түркийәдики достлири ибраһим қурбанниң йопурға наһийәлик җ х идарисиниң муавин башлиқи әмәт обул тәрипидин үрүмчидә тутулғанлиқи, йопурғиға әкетилип сорақ қилинғанлиқи вә қамақханида қийин-қистақтин җан үзгәнлики һәққидә учур алған.

Йопурғиға қарита елип барған телефон зиярәтлиримиз давамида, бу һәқтики соалимизға җаваб бәргән бир сақчи хадими «буниң йүз бәргини хели узун болған иш» икәнликини тилға елиш арқилиқ, ибраһим қурбанниң өлүм учуриниң тоғрилиқини дәлиллиди. Түркийәдики йопурғулуқ муһаҗирларға кәлгәндә учурда, ибраһим қурбанниң қандақ бир гуман билән тутулғанлиқи вә немә тоғрисида сорақ қилинғанлиқи дейилмигән. 3 Айниң алдида радийомиз қолға чүшүргән, йопурға наһийәлик парткомға аит мәхпий доклатта, йопурғида 2016 ‏-йилидин башлап хитайчә «датоңлйән» дәп аталған чәтәл билән алақә үзүш долқуни қозғалғанлиқи, йәкшәнбәбазар йезисидинла чәтәлгә чиқип кәлгән 46 кишидин 36 нәпириниң 2018 ‏-йилиниң бешиға қәдәр кесилгән вә лагерға соланғанлиқи тилға елинған иди.

Телефонимизни қобул қилған йопурғидики сақчи хадимлиридин бири, ибраһим қурбанниң қамақханида өлгәнликини дәлиллиди. Ибраһим қурбанниң өлүм учурниң сақчи саһәсидикиләрдинму мәхпий тутулғанлиқини баян қилған бу хадим; униң шу күнләрдә дохтурханиға апирилғанлиқи вә дохтурханида яндуруп келингәндә қамақханида җан үзгәнликини мәзкур делоға қол тиққан сақчи сәпдашлиридин аңлиғанлиқини баян қилди. Әмма ибраһим қурбанниң тутулуш сәвәби һәққидә мәлумат берәлмиди.

Илгирики ениқлашлиримиз давамида йопурғида чәтәлгә чиқип киргәнләрла әмәс, чәтәлдә туғқини барларниңму еғир тәқиб астиға елинғанлиқи вә бәзилириниң чәтәлдики туғқанлири билән телефонда сөзләшкәнлики үчүнла, лагерға соланғанлиқи ашкариланғаниди.

Юқирида, түркийә сәпиридә ғайиб болуп кәткән йопурға теримлиқ тиҗарәтчи ибраһим қурбаниң үрүмчидә тутулғанлиқи вә йопурғида қамақханида җан үзгәнлики һәққидә аңлитиш бәрдуқ.

Пикирләр (0)
Share
Толуқ бәт