Türkiye sepiride ghayib bolghan yopurghuluq tijaretchi ibrahim qurbanning qamaqxanida ölgenliki delillendi

Muxbirimiz shöhret hoshur
2019-11-12
Élxet
Pikir
Share
Print
Türkiye sepiride ghayib bolghan yopurghuluq tijaretchi ibrahim qurban.
Türkiye sepiride ghayib bolghan yopurghuluq tijaretchi ibrahim qurban.
RFA/Shöhret Hoshur

Türkiyediki yopurghuluq muhajirlarning ashkarilishiche, 2016-yili 5-ayda yopurghidin türkiyege qarap yolgha chiqqan tijaretchi ibrahim qurban ürümchige kelgendin kéyin iz-dériki ghayib bolghan. Ayropilan béliti élinip bolghan ibrahim qurbanning ayropilan uchushqa ikki kün qalghanda iz-dériki ghayib bolushi uning türkiyediki dostlirini endishige salghan. Ular, alaqidar qanalliri arqiliq ibrahim qurbanning yopurghida qamaqxanida ölgenlikidin 2 yil kéyin xewer tapqan. Muxbirimizning yopurghigha qarita élip barghan téléfon ziyaretliri dawamida ibrahim qurbanning qamaqxanida ölgenliki delillendi.

Eslide yopurghining térim yézisidin bolghan we ürümchide abliz soda sariyida dukan échiwatqan tijaretchi ibrahim qurban, 2016-yili 4-ayda bir dosti bilen birlikte türkiyege sayahetke kelgen. Türkiyediki ikki heptilik sayahiti jeryanida türkiyede tijaret qilishni pilanlighan ibrahim qurban, shu yili 5 ‏-ayda yopurghidin türkiyege qarap ikkinchi ret seper qilghan. Emma u ürümchige kelgendin kéyin, uning iz-dériki ghayib bolghan. Uning bu sepiridin xewiri bolghan uning türkiyediki dostliri, u bélitini alghan ayropilanning uchushining aldi-keynide köp sürüshte qilghan bolsimu, uning aqiwiti heqqide héchqandaq uchur alalmighan. 2017-Yili bashlan'ghan lagérgha adem tutush dolquni, ibrahim qurban heqqide uchur élishni téximu mümkinsizleshtürgen. Aridin ikki yilche ötkende, uning türkiyediki dostliri ibrahim qurbanning yopurgha nahiyelik j x idarisining mu'awin bashliqi emet obul teripidin ürümchide tutulghanliqi, yopurghigha ekétilip soraq qilin'ghanliqi we qamaqxanida qiyin-qistaqtin jan üzgenliki heqqide uchur alghan.

Yopurghigha qarita élip barghan téléfon ziyaretlirimiz dawamida, bu heqtiki so'alimizgha jawab bergen bir saqchi xadimi "Buning yüz bergini xéli uzun bolghan ish" ikenlikini tilgha élish arqiliq, ibrahim qurbanning ölüm uchurining toghriliqini delillidi. Türkiyediki yopurghuluq muhajirlargha kelgende uchurda, ibrahim qurbanning qandaq bir guman bilen tutulghanliqi we néme toghrisida soraq qilin'ghanliqi déyilmigen. 3 Ayning aldida radiyomiz qolgha chüshürgen, yopurgha nahiyelik partkomgha a'it mexpiy doklatta, yopurghida 2016 ‏-yilidin bashlap xitayche "Datonglyen" dep atalghan chet'el bilen alaqe üzüsh dolquni qozghalghanliqi, yekshenbebazar yézisidinla chet'elge chiqip kelgen 46 kishidin 36 nepirining 2018 ‏-yilining béshigha qeder késilgen we lagérgha solan'ghanliqi tilgha élin'ghan idi.

Téléfonimizni qobul qilghan yopurghidiki saqchi xadimliridin biri, ibrahim qurbanning qamaqxanida ölgenlikini delillidi. Ibrahim qurbanning ölüm uchurning saqchi sahesidikilerdinmu mexpiy tutulghanliqini bayan qilghan bu xadim؛ uning shu künlerde doxturxanigha apirilghanliqi we doxturxanida yandurup kélin'gende qamaqxanida jan üzgenlikini mezkur délogha qol tiqqan saqchi sepdashliridin anglighanliqini bayan qildi. Emma ibrahim qurbanning tutulush sewebi heqqide melumat bérelmidi.

Ilgiriki éniqlashlirimiz dawamida yopurghida chet'elge chiqip kirgenlerla emes, chet'elde tughqini barlarningmu éghir teqib astigha élin'ghanliqi we bezilirining chet'eldiki tughqanliri bilen téléfonda sözleshkenliki üchünla, lagérgha solan'ghanliqi ashkarilan'ghanidi.

Yuqirida, türkiye sepiride ghayib bolup ketken yopurgha térimliq tijaretchi ibrahim qurbaning ürümchide tutulghanliqi we yopurghida qamaqxanida jan üzgenliki heqqide anglitish berduq.

Toluq bet