Ghuljadiki qamal ijra'atlirida tehditler dawam qilmaqta, ahalilerge yene namelum dorilar bérilmekte

Muxbirimiz shöhret hoshur
2022.08.12
Share on WhatsApp
Share on WhatsApp
Uyghur-Diyari-Qamal Uyghur diyaridiki téshgha chiqish cheklen'gen, ishigi péchetlen'gen öy.
RFA

Muxbirimizning téléfon ziyaretliridin melum bolushiche, xitay da'irilirining  Uyghur élidiki qamal mezgilide élip bériwatqan zorawan ijra'atliri her xil shekilde dawam qilmaqtiken. Ahalilerni “Terbiyelesh” ke élip kétish bilen qorqutush we ulargha namelum dorilarni yigüzüsh, qamal dawam qiliwatqan bügünki künde Uyghur rayonidiki ahalilerning aramini buzuwatqan we ularni endishige séliwatqan tedbirlerdur.

Xitayning bir heptidin buyan Uyghur rayonida yolgha qoyuwatqan qamal tedbirliri köpinchisi dölet xizmetchiliridin teshkillen'gen we döletning ewzel siyasetliridin paydilinip kéliwatqan xitay  köchmen ahaliliri  üchün héchqandaq ongushsizliq peyda qilmighan bolsimu, emma lagérlar seweblik iqtisadiy asasi we ijtima'iy qurulmisi ajiz halette turuwatqan Uyghurlargha bir qatar emeliy qéyinchiliqlarni tughdurghan؛ undin bashqa keypiyat jehettinmu parakenchidilikler peyda qilghan. 

Melum bolushiche, bu künlerde ghulja nahiyesining mazar, döngmazar, üch'on yézilirida, mehelle kadirliri saqchilar bilen birlikte mehelle tekshürüshi élip bérip, qamal tüzümlirining emeliylishishini közdin kechürmektiken. Bu tekshürüsh guruppisida saqchilarning orun élishining özila, ahalilerge tehditlik signal bermektiken. Qorghas nahiyesining len'ger yézisida élip bérilghan bu tür tekshürüshte ahalilerge ochuq halda eger qamal tüzümini buzsa, “Terbiyelesh” ke élip kétilidighanliqi bilen tehdit sélin'ghan. 

Süydung baziridiki bir amanliq mudiri, kishilerning yéqinqi yillardin buyan bu xil tehditlerge könüp qalghanliqini, shunga ahalilerning bu tehditlik tedbirlerge ün-tinsiz boysuniwatqanliqini eskertti.

Melum bolushiche, “Saqliqni saqlash” nami bilen tarqitiliwatqan we zorlap yégüziliwatqan namelum dorilar, ahaliler éghizidin chiqiralmaywatqan, emma tesiridin qutulalmaywatqan yene bir endishining menbesidur.

Len'ger yézisidiki yene bir kent kadirining pash qilishiche, ahalilerge qaymaq renggide bir dora tarqitilghan. Bu xadim bu dorining ismini bilmeydighanliqini tilgha élish bilen birlikte, bu dorining sehiye xadimliri teripidin “Késelning aldini élish dorisi” dep chüshendürüliwatqanliqini eskertti.

Yerlik Uyghur ahalilerge namelum dorilarni yégüzüsh, tajisiman wirus tarqalghandin kéyin yolgha qoyulghan aldinqi ikki qétimliq qamal jeryanidimu körülgen bir ehwaldur. Shu qétimliq éniqlashlirimizda, xitay shirketlirining pursettin paydilinip iskilatlirida bésilip qalghan dorilirini sétiwatqanliqimu ashkarilan'ghan. Xotendiki bir sehiye xadimi, özlirining qamal mezgilide shiju'ajangda ishlen'gen bir “Jongyi” dori'isini sétiwatqanliqini pash qilghan idi.

Aldinqi qétimliq téléfon ziyaritimiz jeryanida ghulja nahiyeside nami we roli bilinmigen bu dorilarning sehiye xadimliri teripidin emes, kent kadirliri teripidin tarqitiliwatqanliqi melum bolghan idi.

Hörmetlik radiyo anglighuchilar, melum bolushiche, Uyghur rayonida milyonlighan kishining lagér we türmilerde bolushi, yeni mutleq köp sandiki a'ililerde a'ilining tüwrüki hésabnilidighan atilar we oghullarning tutqunda bolushi, xitayning qamal jeryanida yoquriqidek tedbirlerni ijra qilishigha asanliq peyda qilghan bolsa؛ yene bir tereptin ahalilerni bu türdiki tehdilerge inkas qayturush we özini qoghdashta amalsiz qaldurghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.