Ghuljada jiddiy qutquzush mulazimitide “Dölet tili” la qollinilghan, ölüm-yétimlar yene dawam qilmaqta

Muxbirimiz shöhret hoshur
2022.09.30
Share on WhatsApp
Share on WhatsApp
Uyghurlar yuqum qamali seweblik iqtisadiy we turmush krizisigha yüzlenmekte Uyghur diyaridiki yuqumni bahane qilip qamal qilishta ahalilerning ishiklirini sim we tömür qozuq bilen sirtidin taqighan körünüsh. 2022-Yili séntebir.
Social Media

Ghuljada wirus qamalining bir qisim jaylarda bikar qilin'ghanliqi xewer qilin'ghan bolsimu, emma qamal seweb bolghan achliq ölümliri yenila dawam qilmaqta.

Muxbirimizning téléfon ziyaretliri dawamida ashkarilinishiche, ghuljada qamal mezgilidiki bu ölüm hadisilirining köpiyishige, 120 jiddiy qutquzush mulazimitide Uyghur tilining qollinilmasliqimu belgilik rol oynighan. Töwende muxbirimiz shöhret hoshurning bu heqte teyyarlighan programmisi diqqitinglarda bolidu.

Ijtima'iy taratqulardin melum bolushiche, ghuljada gerche qamalning peydin-pey bikar qilinidighanliqining élan qilin'ghinigha bir hepte bolghan bolsimu achliq ölümliri yenila dawam qilmaqta.

Téléfon ziyaretlirimizdin melum bolushiche, achliq ölümlirining köpiyip kétishige ghuljada jiddiy qutquzush qomandanliq shtabida Uyghur tili mulazimitining bolmasliqimu belgilik rol oynighan. Mezkur qomandanliq shtabidiki bir nöwetchi xadimning déyishiche, bu orunda Uyghur tilliq mulazimet yoq bolup, ahaliler jiddiy ehwalgha duch kelse, awwal kent mes'ullirigha téléfon qilishi, kent mes'ulliri özliri yaki terjiman arqiliq jiddiy qutquzush bölümige ehwalni melum qilishi kérek iken. Melum bolushiche til qiyinchiliqi éghir aghriqlarning qutquzushqa muraji'et qilishini bezide birqanche sa'et, bezide birqanche kün kéchiktürgen.

Mana mushundaq qiyinchiliqlar qorghas nahiyesining süydüng baziridimu ölüm yétim ishlirigha seweb bolghaniken. Süydüng baziridiki ikki neper kent kadirining ashkarilishiche, 1-kent ahaliliridin semet, ghyasidin qatarliq kishiler, achliqtin késel bolup éghir maghdursizlan'ghan we qamal boshighandin kéyin doxturxanigha apirilghan bolsimu, lékin dawalash kéchikkini üchün ünüm bermigen. Bular 24- we 25-séntebir künliri jan üzgen.

Kanadada yashawatqan ghulja nahiyelik bir muhajirning ashkarilishiche, ghulja nahiyesining baytoqay yéza yette'on kentidiki toxtaxun abdul achliqtin maghdursizlinip éghir aghrighan. Ayali repilem uning ehwalining jiddiylikini bildürüp kent mes'ulliridin doxturxanigha apirishni yaki yaki doxtur chaqirip bérishini telep qilghan bolsimu, bu telep qamal tüzümi seweblik ret qilin'ghan. Netijide 50 yashliq toxtaxun abdul 17-séntebir küni öyide jan üzgen. Baytoqaydiki saqchi xadimliri toxtaxun abdulning qamal mezgilide ölgenlikini delillidi.

Ismini ashkarilashni xalimaydighan, ghulja weziyitidin xewerdar kishilerning inkas qilishiche, qamal mezgildiki ölüm hadisiliri ichide achliqtin ölüshtin bashqa, bérilgen namelum dorilar ré'aksiye qilish we dézinfiksiyedin zeherlinish sewebliridin kélip chiqqan ölüm hadisilirimu belgilik nisbet igiligen. Qorghas nahiyesining küre yézisidin téléfonimizni qobul qilghan bir ayallar mudir özi bashqurushidiki tewelikte qamal mezgilide tügep ketkenlerning köp ikenlikini ashkarilidi. Emma ölgüchilerning kimliki we we ölüm sewebliri heqqide melumat bérishni ret qildi we bu heqte alaqidar mes'ul xadimlardin melumat élishimizni tewsiye qildi.

Yuqirida ghuljida achiliqtin ölüsh hadisining yene dawam qiliwatqanliqi we ölgüchilerdin 3 kishining kimlikliri heqqide melumat berduq.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.