Ғулҗа наһийәсидики пенсийонер пәхирдин хелилниң вирус юқуми диягнози билән дохтурханида икәнлики ашкариланди

Мухбиримиз шөһрәт һошур
2020-02-20
Елхәт
Пикир
Share
Принт
Хитай дохтур вә сақчиларниң аилиләргә берип вирус юқумини тәкшүрүватқан көрүнүш. 2020-19-Феврал, алтай.
Хитай дохтур вә сақчиларниң аилиләргә берип вирус юқумини тәкшүрүватқан көрүнүш. 2020-19-Феврал, алтай.
AFP

Мухбиримизниң иҗтимаий таратқулардики хәвәр йип учлириға асасән елип барған ениқлашлири давамида ғулҗа наһийәсиниң мазар йезисида олтурушлуқ пенсийәгә чиққан 78 яшлиқ оқутқучи пәхридин хелилниң вухән вируси билән юқумланғанлиқ диягнози қоюлуп, ғулҗа шәһиридә давалиниватқанлиқи, униң аяли, иккинчи оғли вә келининиң юқум гумандари сүпитидә алаһидә тәкшүрүлүватқанлиқи, мушу сәвәбтин булар билән алақә қилған барлиқ уруқ-туғқан, қолум-қошнилириниң ғулҗа наһийәсидә карантин қилиниватқанлиқи, дөңмазар, мазар вә қаш йезисидики аһалиләрниң өйлири печәтләнгәнлики ашкариланди.

Йеқинда иҗтимаий таратқуларда ғулҗа наһийәсиниң дөңмазар йезисида уйғурлардин 4 кишиниң вухән вируси билән юқумланғанлиқи, бу байқалғандин кейин дөңмазарниң қаттиқ қамал қилинғанлиқи вә пүтүн өйләргә печәт селинғанлиқи хәвәр қилинған иди. Биз бу учурниң тоғрилиқини ениқлаш үчүн ғулҗа наһийәсигә телефон қилдуқ. Розимәтйүзи йезисидики бир аһалә мазар йезисида вухән вируси юқум гумандаридин бир әр-аялниң байқалғанлиқи һәққидә кәнт кадирлириниң өзлиригә уқтуруш қилғанлиқи вә йеқинда дөңмазар вә мазар йезисиға барған-бармиғанлиқи һәққидә мәлумат сориғанлиқини баян қилди. Дөңмазардики бир аһалә байқалған юқумдарниң мазар йезисидин икәнлики, пенсийәгә чиққан бир оқутқучи икәнлики вә уйғур икәнликини тилға алди. Мазар йеза арамәһәллидики бир аһалә юқумдарниң шех мәһәллидин икәнлики вә исминиң пәхирдин икәнликини мәлум қилди. Шех мәһәллисидики аһалиләр болса өзлириниң печәтләнгәнкини баян қилиш билән бирликтә пенсийонер пәхирдин хелилниң ғулҗа шәһиридә дохтурханида, униң аяли рәйһангүл, иккинчи оғли абдусәлим вә келини халидә мәмәтниң ғулҗа наһийәсидә дохтурханида икәнликини баян қилди. Булар йәнә пәхирдин хелилниң барлиқ уруқ-туғқанлири, қолум-қошнилири вә арамәһәллидики бир өлүм пәтисигә униң билән бирликтә қатнашқан барлиқ кишиләрниң ғулҗа наһийәсигә әкитилип, карантин қилинғанлиқини мәлум қилди.

Аһалиләр кәнт кадирлиридин аңлиғанлириға асасән пәхирдин хелилниң юқумдар, аяли, келини вә оғлиниң юқум гумандари икәнликини илгири сүрди. Мазар йезисидики бир кәнт секретари булардин пәхридин хелилниң юқумдар икәнликидин хәвири барлиқини баян қилиш билән бирликтә қалғанлириниң әһвали һәққидә җиддий қутқузуш қоманданлиқ иштабидин мәлумат елишимизни тәвсийә қилди. Әмма мәзкур штаб хадимлири бу һәқтә мәлумат беришни илгирикигә охшашла рәт қилди.

Пикирләр (0)
Share
Толуқ бәт