Gülbahar jélilowa hemmige adalet teshkilatining 2021-yildiki 4 “Qehriman” ning biri boldi

Uyghur lagér shahiti gülbahar jélilowa xanim, Uyghur qehriman pa'aliyetchi katégoriyesi boyiche amérikadiki “Hemmige adalet teshkilati” ning 2021-yilliq “Qehriman” ning biri bolghan. 2021-Yili 3-aprél.

Amérikadiki “Hemmige adalet teshkilati” ning 2021-yilliq “Qehriman” mukapati sahibliri 3-aprél élan qilindi. Mezkur teshkilat bu yilliq mukapatni mexsus irqiy qirghinchiliqni toxtitish üchün türtkilik rol oynighan 4 shexs we bir teshkilatqa atighan.

Uyghur lagér shahiti gülbahar jélilowa xanim, Uyghur qehriman pa'aliyetchi katégoriyesi boyiche 2021-yilliq “Qehriman” ning biri bolghan.

Mezkur teshkilatning tor bétide xitayning jaza lagérlirining ichki sirini dunya metbu'atlirida ashkarilap kéliwatqan gülbahar jélilowagha yuqiri bahalar bérilgen bolup, uning lagérlar emdi bashlan'ghan mezgilde yeni soda qilish munasiwiti bilen 2017-yili 5-ayning 21-küni ürümchige barghinida, da'iriler uni peqet Uyghur bolghanliqi üchünla uning qazaqistanda tughulup ösken qazaqistan girazhdani bolghinigha qarimay, qanunsiz halda jaza lagérigha qamiwalghanliqi, u 2018-yili 9-ayghiche 15 ayliq qabahetlik lagér hayatini bashtin kechürüp, axiri uning qazaqistandiki ikki perzentning qazaqistan hökümitidin diplomatik yardem telep qilishi netijiside lagérdin qutulup chiqalighanliqi tonushturulghan.

Buningda yene uning lagérda xitayning bigunah Uyghurlargha élip bériwatqan qiyin-qistaq we ölüm, ménge yuyushtek her türlük wehshiyliklirige shahit bolghanliqi we lagérdin hayat qalghandin kéyin qazaqistan'gha kelgendin tartip baturluq bilen özining japa-musheqqetliri we xitayning irqiy qirghinchiliqi heqqide guwahliq bériwatqanliqidek pidakarliqigha apirin oqulghan.

Xitayning jaza lagérlirida bigunah Uyghurlar üstidin yürgüzüwatqan qirghinchiliqlirini qazaqistanda turup erkin anglitishqa küzi yetmigen gülbahar deslep türkiyege kelgen we 2020-yili öktebirde firansiyedin panahliq tiligenidi. U lagérdin qoyup bérilgendin buyan dawamliq türde, lagérlargha qamalghan milyonlighan Uyghurlarning awazi bolup, lagérdiki qiyin-qistaq, ayallarning sistémiliq halda mejburiy tughmas qilinishi, basqunchiliqqa uchrawatqanliqi qatarliq xitayning insaniyetke qarshi jinayetlirini baturluq bilen pash qilip kelmekte.

Özining mezkur “Qehriman” mukapatigha layiq kürülgenlikidin hayajanlan'ghan gölbahar jélilowa xanim kichik pé'illiq bilen öz tesiratini bayan qildi.

Gülbahardin bashqa yene Uyghurlarning kishilik hoquqigha izchil köngül bölüp kéliwatqan amérika dölet mejlisi ezasi jemés mekgowrén ependi mejburiy emgekning aldini élish qanuni üchün körsetken xizmiti sewebi “Adalet mesh'ili” dégen shereplik nam bilen bu qétimqi 4 qehrimanning biri bolghan.

Tonushturulushiche, mejlis ezasi makgowérn dölet mejlisidiki xitay ishliri-ijra'iye komitétining re'isi, shundaqla u tom lantos kishilik hoquq komitétining birleshme re'isi. U dunya miqyasida kishilik hoquq we adaletni ilgiri sürüshke munasiwetlik muhim qararlarda intayin achquchluq rol oynighan. Uyghurlargha yardem bérish üchün, makgowérn ependi ötken yili awam palatasida maqullan'ghan we bu yil qayta yolgha qoyulghan, xitayning sherqiy türkistan (shinjang)diki mejburiy emgekke qarshi turush qanunini tonushturghanidi.

4Neper “Qehriman” ning yene biri amérika diniy erkinlik bash elchisi samu'il brownbek. U rohin'galiqlarni we diniy erkinlikni izchil qollashtiki emili tühpiliri bilen “Rohin'ganing yilliq aktip pa'aliyetchisi” sheripige érishken.

Keshmirlik insanshunas, yazghuchi doktor asér ziya, keshmirde “Ghayib qilinishqa qarshi turush” boyiche 2021-yilliq “Qehriman” mukapati sheripige na'il bolghan.

Yuqiriqi töt qehriman shexstin bashqa yene “Hindistanni fashizmdin qutuldurush” xizmet guruppisining körsitishi bilen “DOTO Sandan” namliq mezlumlarning sani we zorawanliqqa uchrash mesilisi heqqide iz qoghlash rolini oynap kelgen bir merkezmu “2021-Yildiki hindistan az sanliq milletlerni qollashtiki nemunilik teshkilat” namida mukapatlan'ghan.

Amérikadiki dangliq kishilik hoquq ammiwi teshkilati bolghan SoundVision ning muhim kishilik hoquq türi bolghan hemmige adalet teshkilatining 2019-yilliq “Qehriman” mukapatigha lagér shahiti méhrigül tursun layiq körülgenidi.

Gülbahar jélilowani namzatliqqa körsetken “Uyghurlarni qutquzush herikiti” guruppisi “Hemmige adalet teshkilati” ning muhim türining biri süpitide, 2018-yilidin buyan Uyghurlarni qollash we Uyghur irqiy qirghinchiliqini toxtitish üchün amérikada izchil aktip pa'aliyet qilip kelmekte.