Лагер шаһити гүлзирә авулқанқизи: аяллар ятақтин кечиләрдә ачиқип кетилиду, һеч бири қайтип кәлмәйду

Мухбиримиз шөһрәт һошур
2019-05-07
Елхәт
Пикир
Share
Принт
Лагер шаһити гүлзирә авулқанқизи йотубе торида гуваһлиқ баянати елан қилмақта. 2019-Йили 29-апрел.
Лагер шаһити гүлзирә авулқанқизи йотубе торида гуваһлиқ баянати елан қилмақта. 2019-Йили 29-апрел.
Social Media

Ғулҗа наһийәсидики аяллар лагерида 27 ай йетип чиққан шаһит гүлзирә авулқанқизи, өткән һәптә йотуб қанилида елан қилған гуваһлиқ баянатида, өзи билән бир ятақта ятқан бәзи уйғур қиз-аяллириниң йерим кечиләрдә намәлум сәвәб билән ятақтин елип чиқип кетилгәнлики вә тәкрар ятаққа қайтип кәлмигәнлики вә шу пети из-дерики йоқалғанлиқини ашкарилиди; у өзиниң бундақ сирлиқ ғайиб болушқа көп қетим шаһит болғанлиқини әскәртти. Илгирики ениқлашлиримиз давамида лагерға әкетилгән бәзи кишиләрдин һәтта икки йилға қәдәр һечқандақ учур йоқлуқи ашкариланған иди.

Лагер шаһити гүлзирә авулқанқизиниң гуваһлиқ баянатидин, лагер ичидики йәнә бир җиддий әһвал тутқунларниң из-дерәксиз ғайиб болуш мәсилисиму ашкариланди. Униң дейишичә, 27 ай җәрянда өзи билән бир ятақта ятқан аяллардин бәзилири кечиләрдә намәлум сәвәб билән ачиқип кетилгән, әмма қайтип кәлмигән вә шуниңдин кейин из-дерики тамамән болмиған. Шу мәзгилләрдә лагердин қоюветилгәнләр, йәни аталмиш тәрбийәләш мәктипини пүттүргәнләр болмиғачқа, һәм бу тәрбийәлинишниң муддитиму бекитилмигән болғачқа, бу хил из-дерәксиз ғайиб болуш гүлзирә вә ятақдашлирини ойға вә әндишигә салған.

Өткән йили ғулҗа шәһиригә қарита елип барған телефон зиярәтлиримиз давамида, бир сақчи хадиминиң телефони арқилиқ соаллиримизға җаваб бәргән бир ханим; йолдиши билән илгири айда бир қетим екранда көрүшүватқанлиқи вә йеқинқи 5 айдин буян алақиси үзүлгәнлики, һәтта униң илгири туруватқан җирғилаңдики лагерда бар-йоқлуқидинму учур алалмайватқанлиқини ашкарилиған. Өткән йили австралийәдики бир уйғур өзиниң ғулҗа шәһиридики сиңлисиниң 2 йилдин буян из-дерики пүтүнләй йоқлуқи, ғулҗидики уруқ-туғқанлириниң бу ғайиб сиңлисидин һечқандақ учур алалмайватқанлиқини инкас қилған иди. Ениқлашлиримиз давамида, униң из-дерики айдиңлашмиған иди.

Гүлзирә бир тәрәптин бу ғайиб ятақдашлириниң башқа бина яки синипқа йөткәлгәнлик еһтималлиқини пәрәз қилған болсиму, әмма мәктәптә берилгән бәзи агаһландурушларға асасән бу ғалипларниң хитай өлкилиригә йөткәлгәнлик еһтималлиқини пәрәз қилған. Мәлум болушичә, мәктәптә, хитай тилини яхши өгинәлмигәнләргә, әгәр имтиһандин өтәлмисә хитай өлкилиригә йөткилидиғанлиқи һәққидә агаһландуруш берилгән. Лагерда хитай тилидин һәптидә вә айда бир қетим имтиһан елинған. Униң үстигә лагердикиләрниң қаттиқ назарәт астида вә җәмийәттин хупиянә һалда, кечиләрдә бир орундин йәнә бир орунға пат-пат йөткилишиму, гүлзирә вә ятақдашлирида өзлириниңму ғайиб қиливетилиш әндишисини пәйда қилған.

Юқирида лагер шаһити гүлзирә авулқанқизиниң гуваһлиқ баянатидин, лагер ичидики сирлиқ ғайиблар мәсилиси һәққидә аңлитиш бәрдуқ.

Пикирләр (0)
Share
Толуқ бәт