Lagér shahiti gülzire awulqanqizi: ayallar yataqtin kéchilerde achiqip kétilidu, héch biri qaytip kelmeydu

Muxbirimiz shöhret hoshur
2019-05-07
Élxet
Pikir
Share
Print
Lagér shahiti gülzire awulqanqizi yotubé torida guwahliq bayanati élan qilmaqta. 2019-Yili 29-aprél.
Lagér shahiti gülzire awulqanqizi yotubé torida guwahliq bayanati élan qilmaqta. 2019-Yili 29-aprél.
Social Media

Ghulja nahiyesidiki ayallar lagérida 27 ay yétip chiqqan shahit gülzire awulqanqizi, ötken hepte yotub qanilida élan qilghan guwahliq bayanatida, özi bilen bir yataqta yatqan bezi Uyghur qiz-ayallirining yérim kéchilerde namelum seweb bilen yataqtin élip chiqip kétilgenliki we tekrar yataqqa qaytip kelmigenliki we shu péti iz-dériki yoqalghanliqini ashkarilidi؛ u özining bundaq sirliq ghayib bolushqa köp qétim shahit bolghanliqini eskertti. Ilgiriki éniqlashlirimiz dawamida lagérgha ekétilgen bezi kishilerdin hetta ikki yilgha qeder héchqandaq uchur yoqluqi ashkarilan'ghan idi.

Lagér shahiti gülzire awulqanqizining guwahliq bayanatidin, lagér ichidiki yene bir jiddiy ehwal tutqunlarning iz-déreksiz ghayib bolush mesilisimu ashkarilandi. Uning déyishiche, 27 ay jeryanda özi bilen bir yataqta yatqan ayallardin beziliri kéchilerde namelum seweb bilen achiqip kétilgen, emma qaytip kelmigen we shuningdin kéyin iz-dériki tamamen bolmighan. Shu mezgillerde lagérdin qoyuwétilgenler, yeni atalmish terbiyelesh mektipini püttürgenler bolmighachqa, hem bu terbiyelinishning mudditimu békitilmigen bolghachqa, bu xil iz-déreksiz ghayib bolush gülzire we yataqdashlirini oygha we endishige salghan.

Ötken yili ghulja shehirige qarita élip barghan téléfon ziyaretlirimiz dawamida, bir saqchi xadimining téléfoni arqiliq so'allirimizgha jawab bergen bir xanim؛ yoldishi bilen ilgiri ayda bir qétim ékranda körüshüwatqanliqi we yéqinqi 5 aydin buyan alaqisi üzülgenliki, hetta uning ilgiri turuwatqan jirghilangdiki lagérda bar-yoqluqidinmu uchur alalmaywatqanliqini ashkarilighan. Ötken yili awstraliyediki bir Uyghur özining ghulja shehiridiki singlisining 2 yildin buyan iz-dériki pütünley yoqluqi, ghuljidiki uruq-tughqanlirining bu ghayib singlisidin héchqandaq uchur alalmaywatqanliqini inkas qilghan idi. Éniqlashlirimiz dawamida, uning iz-dériki aydinglashmighan idi.

Gülzire bir tereptin bu ghayib yataqdashlirining bashqa bina yaki sinipqa yötkelgenlik éhtimalliqini perez qilghan bolsimu, emma mektepte bérilgen bezi agahlandurushlargha asasen bu ghaliplarning xitay ölkilirige yötkelgenlik éhtimalliqini perez qilghan. Melum bolushiche, mektepte, xitay tilini yaxshi öginelmigenlerge, eger imtihandin ötelmise xitay ölkilirige yötkilidighanliqi heqqide agahlandurush bérilgen. Lagérda xitay tilidin heptide we ayda bir qétim imtihan élin'ghan. Uning üstige lagérdikilerning qattiq nazaret astida we jem'iyettin xupiyane halda, kéchilerde bir orundin yene bir orun'gha pat-pat yötkilishimu, gülzire we yataqdashlirida özliriningmu ghayib qiliwétilish endishisini peyda qilghan.

Yuqirida lagér shahiti gülzire awulqanqizining guwahliq bayanatidin, lagér ichidiki sirliq ghayiblar mesilisi heqqide anglitish berduq.

Toluq bet