Лагер шаһити гүлзирә авулқанқизи: «икки һәптидә бир қетим йиғлашқа рухсәт қилиду»

Мухбиримиз шөһрәт һошур
2019-05-14
Елхәт
Пикир
Share
Принт
Лагер шаһити гүлзирә авулқанқизи йотубе торида гуваһлиқ баянати елан қилмақта. 2019-Йили 29-апрел.
Лагер шаһити гүлзирә авулқанқизи йотубе торида гуваһлиқ баянати елан қилмақта. 2019-Йили 29-апрел.
Social Media

Лагер шаһити гүлзирә авулқанқизиниң ашкарилишичә, у турған аяллар лагерида тутқунлар ятақтин синипқа сақчиларниң назаритидә ялап елип чиқилған; күнигә 14 саәт «дәрс» өтүлгән; бу 14 саәт ичидә пәқәт бир яки икки қетимла тәнәппус вақти берилгән. Уларниң ятақ вә синипта өзара сөзлишиши вә йиғлишини қаттиқ чәклигән даириләр, уларға икки һәптидә бир қетим икки саәтлик йиғлаш вақти бәргән. Тутқунлар бу йиғлаш саитидиму сақчи вә оқутқучиларниң назарити астида болған.

Лагер шаһити гүлзирә авулқанқизи сөһбитимизниң бүгүнки қисмида, лагерниң бир қисим ички түзүмлири һәққидә мәлумат бәрди. Ашкарилинишичә, гүлзирә авулқанқизи ятқан ғулҗа наһийә дөңмәһәллидики аяллар лагерида тутқунлар ятақ бинасидин дәрсханиға сақчилар тәрипидин ялап елип чиқилған; улар дәрсханида 14 саәт арқиму-арқидин «дәрс» алған вә 3 вақ тамиқи дәрсханида берилгән. Тутқунлар бу 14 саәт ичидә пәқәт бир яки икки қетимла тәнәппус қилған. Бу тәнәппуста, 50 оқуғучиға икки минуттин һаҗәт қилиш вақти берилгән. 14 Саәтлик дәрсни түгәткәндин кейин, йәнә тизилдурулуп ятиқиға назарәт астида әкелингән бу тутқунлар ухлаштин бурун йәнә хитай тили өгинишкә селинған. Тутқунларниң синиптиму, ятақтиму өзара сөзлишишигә йол қоюлмиған. Улар бу тинимсиз еғир бесим вә хорлашларға бәрдашлиқ берәлмәй йиғлиса тәнқидләнгән вә орни йөткиветилидиғанлиқи билдүрүлүп тәһдит селинған.

Лагерда әркин һәрикәт қилиш әмәс, әркин хиял қилишқиму рухсәт берилмигән бу тутқунларға, даириләр немишқидур икки һәптидә бир қетим йиғливелиш пурсити бәргән. Йиғлаш саити йерим саәттин 2 саәткичә бекитилгән.

Йиғлаш саитидә оқутқучилар вә сақчилар уларға йиғлаш рухситини бәргәндин кейин, улар йәнә нәқ мәйданда назарәт қилинип турған. Мәлум болушичә, лагерда көп қетим өзи туталмай көз йеши қилған гүлзирә авулқанқизи, йиғлаш саитидә йиғлиялмиған; әксичә даириләрниң йиғлаш рухсәтнамисидин һақарәт һес қилған.

Хитай даирилири уйғур районидики йиғиливелиш лагерлириниң мәвҗутлуқини етирап қилишқа мәҗбур болғандин кейин; униң бир җаза лагери әмәс, пәқәтла бир ятақлиқ мәктәп икәнликини; у йәрдә кишиләрниң дөләт тили вә қанун өгиништин башқа, кәсип өгиниватқанлиқини вә уларниң бу өгиништин рази икәнликини тәшвиқ қилип келиватқан иди.

Пикирләр (0)
Share
Толуқ бәт