Lagér shahiti gülzire awulqanqizi: "Ikki heptide bir qétim yighlashqa ruxset qilidu"

Muxbirimiz shöhret hoshur
2019-05-14
Élxet
Pikir
Share
Print
Lagér shahiti gülzire awulqanqizi yotubé torida guwahliq bayanati élan qilmaqta. 2019-Yili 29-aprél.
Lagér shahiti gülzire awulqanqizi yotubé torida guwahliq bayanati élan qilmaqta. 2019-Yili 29-aprél.
Social Media

Lagér shahiti gülzire awulqanqizining ashkarilishiche, u turghan ayallar lagérida tutqunlar yataqtin sinipqa saqchilarning nazaritide yalap élip chiqilghan؛ künige 14 sa'et "Ders" ötülgen؛ bu 14 sa'et ichide peqet bir yaki ikki qétimla teneppus waqti bérilgen. Ularning yataq we sinipta öz'ara sözlishishi we yighlishini qattiq chekligen da'iriler, ulargha ikki heptide bir qétim ikki sa'etlik yighlash waqti bergen. Tutqunlar bu yighlash sa'itidimu saqchi we oqutquchilarning nazariti astida bolghan.

Lagér shahiti gülzire awulqanqizi söhbitimizning bügünki qismida, lagérning bir qisim ichki tüzümliri heqqide melumat berdi. Ashkarilinishiche, gülzire awulqanqizi yatqan ghulja nahiye döngmehellidiki ayallar lagérida tutqunlar yataq binasidin dersxanigha saqchilar teripidin yalap élip chiqilghan؛ ular dersxanida 14 sa'et arqimu-arqidin "Ders" alghan we 3 waq tamiqi dersxanida bérilgen. Tutqunlar bu 14 sa'et ichide peqet bir yaki ikki qétimla teneppus qilghan. Bu teneppusta, 50 oqughuchigha ikki minuttin hajet qilish waqti bérilgen. 14 Sa'etlik dersni tügetkendin kéyin, yene tizildurulup yatiqigha nazaret astida ekélin'gen bu tutqunlar uxlashtin burun yene xitay tili öginishke sélin'ghan. Tutqunlarning siniptimu, yataqtimu öz'ara sözlishishige yol qoyulmighan. Ular bu tinimsiz éghir bésim we xorlashlargha berdashliq bérelmey yighlisa tenqidlen'gen we orni yötkiwétilidighanliqi bildürülüp tehdit sélin'ghan.

Lagérda erkin heriket qilish emes, erkin xiyal qilishqimu ruxset bérilmigen bu tutqunlargha, da'iriler némishqidur ikki heptide bir qétim yighliwélish pursiti bergen. Yighlash sa'iti yérim sa'ettin 2 sa'etkiche békitilgen.

Yighlash sa'itide oqutquchilar we saqchilar ulargha yighlash ruxsitini bergendin kéyin, ular yene neq meydanda nazaret qilinip turghan. Melum bolushiche, lagérda köp qétim özi tutalmay köz yéshi qilghan gülzire awulqanqizi, yighlash sa'itide yighliyalmighan؛ eksiche da'irilerning yighlash ruxsetnamisidin haqaret hés qilghan.

Xitay da'iriliri Uyghur rayonidiki yighiliwélish lagérlirining mewjutluqini étirap qilishqa mejbur bolghandin kéyin؛ uning bir jaza lagéri emes, peqetla bir yataqliq mektep ikenlikini؛ u yerde kishilerning dölet tili we qanun öginishtin bashqa, kesip öginiwatqanliqini we ularning bu öginishtin razi ikenlikini teshwiq qilip kéliwatqan idi.

Toluq bet