"Erk téléwiziyesi" ning qurghuchisi, rézhissor abdurahman öztürk öz a'ilisidiker heqqide guwahliq berdi

Ixtiyariy muxbirimiz arslan
2020-09-17
Élxet
Pikir
Share
Print
"Erk téléwiziyesi" ning qurghuchisi, rézhissor abduraxman öztürk ependi 15-yil ilgiri atisi bilen chüshken süretni kötürüp guwahliq bermekte. 2020-Yili séntebir, türkiye.
"Erk téléwiziyesi" ning qurghuchisi, rézhissor abduraxman öztürk ependi 15-yil ilgiri atisi bilen chüshken süretni kötürüp guwahliq bermekte. 2020-Yili séntebir, türkiye.
RFA/Arslan

Uzun yillardin buyan ata-anisidin ayrilip, türkiyening istanbul shehiride yashawatqan abdurahman öztürk 14-séntebir küni widiyoluq guwahliq bérip, aqsu wilayitining kelpin nahiyiside yashawatqan ata-anisi we bir tughqan qérindashliri bilen téléfon alaqisining yillardin buyan üzülgenlikini, ularning hazirqi ehwali heqqide héchnéme bilmeydighanliqini bildürdi. U qol téléfoni arqiliq ata-anisigha we qérindashlirigha ayrim-ayrim téléfon qilip sinap baqqan bolsimu, qarshi tereptiki opératurning bu nomurlarning hemmisining taqilip ketkenlikini bildürgen awazinila angliyalighan. U bu awazlarni rékort qilip saqliwélip, yotub arqiliq dunyagha körsetken.

Abdurahman öztürk widiyoda 15 yil ilgiri dadisi bilen birge chüshken süritini körsitip, 15 yildin buyan ata-anisi we uruq-tughqanliri bilen yüz körüshelmey hesret bilen yashawatqanliqini, 2017-yilidin buyan ata-anisi, aka-iniliri we hede-singilliri bilen héchqandaq uchur-alaqe qilalmighanliqini bildürdi.

Biz bu heqte tepsiliy melumat élish üchün abdurahman öztürk bilen söhbet ötküzduq. U mundaq dédi: "2017-Yilidin bashlap xitayning jaza lagérlarni yolgha qoyup köpligen Uyghurlarni lagérlargha qamighandin kéyin, bashqa Uyghurlargha oxshash menmu uruq-tughqanlirimdin xewer alalmidim. Chünki chet'eldin urulghan bir téléfon uruq-tughqanlirimizning 5 yildin 10 yilghiche türme jazasigha seweb bolidighanliqi otturigha chiqqan idi. Bezi qérindashlirim ata-anisining wapat bolghanliq xewirini bir yil yaki ikki yildin kéyin xewer tépiwatidu. . ."

Abdurahman öztürk ependi ata-anisining béshigha birer palaket kep qalmisun dep éhtiyat qilip bir qanche yildin buyan téléfon qilmighanliqini, biraq bashqilarning ata-anisining ölüm xewirini bir ikki yildin kéyin xewer tapqanliqini anglap, ata-anisining hazirqi ehwalidin qattiq ensirigenlikini bildürdi. U ata-ana we qérindashlirining hemmisining téléfon nomurlirining taqalghanliqi sewebidin hazirghiche alaqe qilalmqighanliqini éytti.

Abdurahman öztürk ependi ikki yil ilgiri inisi bilen téléfonda körüshkenlikini, uningdin kéyin téléfon qilghan bolsimu, pütün tughqanlirining téléfonining taqalghanliqini ilgiri sürdi. U téléfonning toxtitilghanliqigha qarap, uruq-tughqanlirining tutulup jaza lagérlirigha élip kétilgen bolushi mumkinlikini eskertip ötti.

U xitay da'irlirigha xitab qilip mundaq dédi: "Men bir perzent bolush süpitim bilen 'ata-anam qeyerde?', 'ukilirim, singillirim qeyerde?', xitay wabasi (korona wirusi) tarqalghan bu künlerde 'qandaq ehwaling, dada-apa?' deydighan bir imkaniyetni bérishni ümid qilimen. Elwette, bir Uyghur bolush süpitim bilen xitayning wetinimizdiki u qirghinchiliqini derhal toxtitishqa chaqriq qilimen."

U yene ijtima'iy taratqularda sin we widiyo tarqitish arqiliq ata-anisining iz-dérikini qilish bilen birge, dunya jama'itidin sherqiy türksitanda yüz bériwatqan Uyghur qirghinchiliqigha diqqet qilishqa chaqirdi. U xitayning meyli soda-tijaret sahelerde bolsun meyli bashqa sahelerde bolsun, dunyagha qarshi élip bériwatqan hiyle-neyreng, qiltaqlirigha chüshüp ketmeslikini agahlandurdi.

Abdurahman öztürk ependi 2010-yili türkiye puqraliqigha ötken bolup, u ata-anisning iz-dérikini qilish üchün türkiye jumhuriyitining re'isi rejep tayyip erdoghan'gha mektup yazghanliqini, özining bir türkiye puqrasi bolush süpiti bilen ata-anisi bilen körüshüshke türkiyening yardem bérishini telep qilghanliqini bildürdi.

U yene özining taki ana-anisi bilen rahet körüsheleydighan pursetke ige bolghuche we Uyghurlar öz tupraqlirida rahet we erkin nepes alalaydighan haletke kelgüche, bu yolda küreshni toxtatmaydighanliqini bildürdi.

U sözining axirida pütkül dunya jama'iti we kishilik hoquq teshkilatlarni Uyghurlargha köngül bölüshke chaqriq qildi.

Abduraxman öztürk ependi, 2006-yili Uyghur diyaridin gollandiyege barghan bolup, shundin buyan ata-anisi bilen yüz körüshelmey kelgen. U 2009-yili "Erk téléwiziyesi" torini tesis qilip, nurghun nadir höjjetlik filimlarni ishlep tarqatqan we chet'ellerdiki Uyghurlarning arisida alqishqa érishken. Nöwette u türkiye kinochiliq sahesidiki bir kespiy rézhissor bolup yétishken. U türkiye medeniyet ministirliqining biwasite yardimi we qollishi bilen rézhissor we filim ishligüchilik wezipisini üstige élip, "Bayaz balina", yeni (aq kit) namliq kespiy hayatidiki tunji kino filimini muweppeqiyetlik ishlep chiqqan we körürmenler bilen yüz körüshtürgen. U hazirmu istanbulda filim ishlesh, rizhissurluq qilish bilen meshghul bolmaqta.

Toluq bet