80 Yashliq muhajir mehmettoxti emin tutqundiki perzent we newriliri heqqide guwahliq berdi

• Muxbirimiz shöhret hoshur
  2019-11-04

25 Yildin buyan türkiyede yashawatqan 80 yashliq muhajir mehmettoxti emin aka bügün radiyomizgha uchur yollap qeshqer toqquzaqta tutulup ketken we iz-dériki melum bolmaywatqan perzent we newriliri heqqide guwahliq berdi.

Déyilishiche, uning toqquzaq len'ger yézisida 5 perzenti, 15 newrisi we 12 peynewrisi bar bolup, u 2017 ‏-yili bulardin 4 nepirining késilip ketkenliki we 6 nepirining lagérgha ekétilgenlikidin xewer tapqan؛ emma 2017 ‏-yildin hazirgha qeder qalghan a'ile-ezalirining teqdiri heqqide héchqandaq uchur alalmighan. Len'gerdiki bir kent saqchisi mehmettoxti eminning baliliridin ikkisining a'ilisidinla 5 kishining tutqunda ikenlikini delillidi. Töwende muxbirimiz shöhret hoshurning bu heqte teyyarlighan programmisi diqqitinglarda bolidu. 

Anglawatqininglar nöwette türkiyening istanbul shehiride yashawatqan mehmettoxi emin akining tutqundiki perzent we newriliri heqqidiki guwahliq bayanati. Uning déyishiche, toqquzaqta, uning polatjan, yaqupjan wb abdughappar qatarliq besh perzenti bar bolup, bulardin abdughapparjan, ilgiri bir qétim türkiyege kelgenliki üchün tutulghan we 7 yilliq késiwétilgen. Chong oghli polatjan, 2016 ‏-yilning axiri türkiyege kélip 20 kün turup ketkenliki üchün tutulghan. 

U yurttiki alaqidar qanalliri arqiliq, 2017 ‏-yilining béshida perzent we newriliridin bolup jem'iy 4 kishining türmide, 6 kishining lagérda ikenlikidin xewer tapqan, emma qalghan 20 din artuq a'ile tawi'abatining teqdiri heqqide héchqandaq uchur alalmighan. 2017 ‏-Yili lagérgha adem toplash yéngidin bashlan'ghan mezgil bolghachqa shuningdek 2017 ‏-yilining axiri we 2018 ‏-yilining bashlirida yene dolqun xaraktérlik adem tutush dawam qilghan bolghachqa, mehmettoxti emin aka, qalghan a'ile-tawi'abatining ehwalidin endishige chüshken. Téléfonimizni qobul qilghan toqquzaq nahiye len'ger yéziliq saqchi xadimi memettoxti emin akining a'ile-tawi'abati heqqide melumat bérishni ret qildi. Emma téléfonimizni qobul qilghan bir kent saqchisi mehmettoxti eminning perzentliridin özi bilidighan ikkisining a'ilisidinla 5 kishining türmide ikenliki, bulardin birige 10 yilliq qamaq jazasi bérilgenlikini ashkarilidi. 

Mehmettoxti aka, guwahliq bayanatida bir qiz newrisining xitay ölkilirige ishlemchilikke ekétilgenliki we shu yerde diniy tüste kiyim keygenliki üchün 5 yilliq késiwétilgenlikini tilgha alghanidi. Len'ger yézisiki bir kent saqchisi, bu uchurlarning toghriliqini delillidi. 

Mehmettoxti aka guwahliq bayanatining axirida eqlige kelgendin buyan xitay zulumini körüp we uninggha uchrap kelgenlikini, emdi bu teqdirge perzentliridin bashqa yene newriliriningmu duch kéliwatqanlidin shikayet qildi. 

Hörmetlik radi'o anglighuchilar, yuqurida, türkiyediki 80 yashliq muhajir mehmettoxti eminning qeshqer toqquzaqta tutqundiki perzent we newriliri heqqide bergen guwahliq bayanati heqqide anglitish berduq.