Yaponiye parlaméntida guwahliq bérish yighini ötküzüldi

Xitay hökümiti dunyaning herqaysi jaylirida xitay xelq jumhuriyiti qurulghanliqining 70 yilliqini xatirilewatqan peytte yaponiye Uyghur jem'iyiti yaponiye parlaméntida jaza lagérliri toghrisida guwahliq bérish pa'aliyiti ötküzgen.

Mezkur pa'aliyette yaponiyede turuwatqan 8 Uyghur a'ilisining jaza lagérlirigha tashlan'ghan yaki xitayning ziyankeshlikige uchrighan uruq-tughqanliri toghrisidiki guwahliqi oqup ötülgen. Exmetjan létip, abdukérim, xelmet rozaxun, isma'il, muharrem baqi, zöhre, gülistan we seydullah qatarliq 8 kishi ata-ana we uruq-tughqanliri toghrisida guwahliq bergen.

Yaponiye Uyghur jem'iyiti teripidin ötküzülgen guwahliq bérish yighinigha 5 parlamént ezasi we köp sandiki muxbirlar ishtirak qilghan. Biz bu pa'aliyet toghrisida tepsiliy melumat igilesh üchün yaponiye Uyghur jem'iyitining re'isi ilham mexmut we guwahliq bergen Uyghurlar bilen téléfon söhbiti élip barduq.

Ilham mexmut ependi bu qétimqi guwahliq bérish yighinining yaponiye parlaméntide ötküzülgen tunji qétimliq guwahliq bérish pa'aliyiti ikenlikini, bu pa'aliyetning muweppeqiyetlik ötkenlikini bayan qildi.

Ilham mexmut ependi yaponiye parlaméntide ötküzülgen pa'aliyetke 5 parlamént ezasi we köp sanda muxbir ishtirak qilghanliqini, parlamént ezalirining Uyghurlarni qollaydighanliqini tekitligenlikini bayan qildi.

Yaponiye Uyghur jem'iyitining bashqurush heyeti ezasi seydullah ependi chong dadisidin bashlap hazirghiche xitay kompartiyesining ziyankeshlikige uchrighan uruq-tughqanliri toghrisida guwahliq bergenlikini, bundaq qilishididiki sewebning xitayning Uyghurlargha qarita irqiy qirghinchiliq élip bériwatqanliqini ashkarilash ikenlikini ilgiri sürdi.

Uyghur pa'aliyetchi xelmet rozaxun shinjang uniwérsitétining sabiq mudiri tashpolat téyip toghrisida guwahliq bergen bolup, u yaponiye hökümitini tashpolat téyipqa ige chiqishqa chaqirghan.

30-Séntebir yaponiye parlaméntida ötküzülgen guwahliq bérish yighini 2 sa'et dawamlashqan bolup, yighin axirida parlamént ezaliri bilen muxbirlar guwahliq bergüchilerdin so'allar sorighan. Xelmet rozaxun ependi so'al-jawab qismida nuqtiliq halda Uyghurlarning yaponiye hökümitidin kütidighan ümidliri toghrisida toxtalghan. U, bu heqte tepsiliy melumat berdi.