Тоққузақ ләнгәрдә һашар техичә давам қилмақта, һашарға чиқмиғанлар җазаланмақта

Мухбиримиз шөһрәт һошур
2022.06.13
Share on WhatsApp
Share on WhatsApp
Һашарға мунасивәтлик син көрүнүшлири бизгә немиләрни дәйду? (2) Һашардики аяллар вә балилар. (Вақти вә орни әниң әмәс)
Social Media

“шинҗаң сақчи һөҗҗәтлири” дә абдусәмәт турсун қатарлиқ зор бир қисим тутқунларниң кәнт уюштурған һәрикәтләргә қетилмиғанлиқи үчүн тутқун қилинғанлиқи қәйт қилинған. Мухбиримизниң бу һәқтидики ениқлашлири давамида, тоққузақниң ләнгәр йезисида һашарниң йәнә давам қиливатқанлиқи, һашарға бармиғанларниң һәр хил усулларда җазалиниватқанлиқи ашкариланди.

Һөрмәтлик радийо аңлиғучилар, “шинҗаң сақчи һөҗҗәтлири” дә бир қисим тутқунларниң пәқәт кәнт уюштурған һәр хил паалийәтләргә қатнашмиғанлиқи үчүнла тутқун қилинғанлиқи қәйт қилинған. Буһәқтики қәйтләрдә мәзкур паалийәтләр қатарида байрақ чиқириш тилға елинған болсиму, лекин башқа паалийәтләрниң немә икәнлики шәрһийләнмигән. Биз бу нуқтини айдиңлаштуруш үчүн қәшқәрдики идарә-органларға телефон қилдуқ. Телефон зиярәтлиримиз давамида, тоққузақниң ләнгәр йезисида һашарниң йәнила давам қиливатқанлиқи ашкариланди.

Түркийә яшаватқан тоққузақлиқ муһаҗир мәмәттохти имин акиниң билдүришичә, “тоққузақта һашар һечқачан тохтиған әмәс”. Мәлум болушичә, нөвәттики пәрқ шуки, илгирики йилларда һашарда яш әрләр асасий қисимни тәшкил қилған болса, йеқинқи бәш йилда әр әмгәк күчлири асасән дегүдәк лагер вә түрмиләргә ташланған болғачқа, әмдиликтә аяллар вә яшанғанлар һашар әмгикиниң асаслиқ қисмини игилигән.

Телефонимизни қобул қилған алақидар кәнт хадими, нөвәттә тоққузақта 18 яштин ‏90 яшқичә болған арилиқтики һәрқандақ бир кишиниң һашарға қатнишиватқанлиқини тилға алди. У пәқәт яш җәһәттә 90 дин ашқанлар вә ай-күни йеқинлашқан еғираяқ аялларниңла һашарға елип чиқилмайдиғанлиқини билдүрди. Телефонимизни қобул қилған йәнә бир кәнт хадими, һашарға чиқмиғанларниң җазасиз қалмайдиғанлиқини ашкарилиди. Униң дейишичә, йоқуридин чүшкән алақидар һөҗҗәтләрдә, һашарға чиқмиғанларниң қануний җазаға тартилидиғанлиқи ениқ баян қилинған. Бу хадим мәзкур бәлгилимигә асасән, һашарға бир күн чиқмиғанларға 100 йүән җәриманә қоюлғандин башқа йәнә мәҗбурий әмгәккә селинидиғанлиқи, әгәр 3 күн һашарға қатнашмай қалса, “тәрбийәләш мәркәзлири” гә йоллинидиғанлиқини ашкарилиди. У йәнә өз тәвәликидә мушу хил җазаға учриған абдувәли турсун исимлик бирсиниң барлиқини дәлиллиди.

Илгирики ениқлашлиримизда давамида, ақсуда бир мәзгил “долқун һашар” намидики бир һашарниң давам қиливатқанлиқи ашкариланған иди. Бу һашарниң пәқәт ишләпчиқиришниң еһтияҗи билән әмәс, муқимлиқниң еһтияҗи билән, йәни даириләрниң кишиләрни контрол қилиш вә вәқә чиқирип қоюшиниң алдини елиш үчүн һашарға селиватқанлиқи ашкариланған иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.