Һәптилик хәвәрләр (31-авғусттин 6-сентәбиргичә)

Мухбиримиз әзиз
2019-09-06
Елхәт
Пикир
Share
Принт
«Уйғур әдлийә архипи амбири» 72 яшлиқ шәмшиқәмәр аниниң ғулҗидики мәлум бир лагерда тутуп турулуватқанлиқи һәққидә тарқатқан гуваһлиқ филими. 2019-Йили 30-авғуст.
«Уйғур әдлийә архипи амбири» 72 яшлиқ шәмшиқәмәр аниниң ғулҗидики мәлум бир лагерда тутуп турулуватқанлиқи һәққидә тарқатқан гуваһлиқ филими. 2019-Йили 30-авғуст.
Social Media

Олси язеҗи уйғурлар дияридики лагерларниң әң йеңи әһвалини ашкарилиди

Йеқинда хитай һөкүмитиниң тәклипигә бинаән уйғурлар дияридики лагерларни зиярәт қилишқа тәклип қилинған албанийәлик журналист олси язеҗи өзиниң лагерларда көргәнлирини дуняға аңлатти.

Олсиниң видийолуқ баянлирида лагерлардики нормалсиз көрүнүшләр, шундақла тутқунларниң нормал турмуш адәтлири үчүн лагерларға қамилиши қатарлиқ бир қатар әһвалларни паш қилип «лагерлардики бу инсанлар довзақниң өзидә яшаветипту» дәп хуласә чиқарған.

Хитай һөкүмити изчил лагерларни «кәспий тәрбийиләш мәктипи» дәп келиватқан болуп, олси язеҗиниң гуваһлиқ баянлири лагерларниң һәқиқий маһийитини паш қилишта муһим рол ойниди.

Яш тиҗарәтчи шаһимәрдан лагердин чиқипла җан үзгән

Үрүмчидики 38 яшлиқ тиҗарәтчи шаһимәрдан пәрһат 2018-йили 8-авғустта нимҗан һалда лагердин қоюп берилгән һәмдә аридин он күн өткәндә җан үзгән.

Үрүмчиниң булақбеши мәһәллисидә долларчилиқ қилип кәлгән шаһимәрдан өзиниң тәқвалиқи вә җамаәт ишлири үчүн хәйри-сахавәт қилиши билән көпчиликниң һөрмитигә еришкән яшлардин икән. 

Мәлум болушичә, мәрһум вапат болғанда «меңисигә су чүшкән» дәп диагноз қоюлған. Теббий саһәдики мутәхәссисләр бу әһвал һәққидә пикир қилип буниң ток билән қийниғанда йүз беридиған һадисә икәнликини билдүрди. 

Ғулҗидики әр-аял пенсйонерлар чәтәл сәпири үчүн қамаққа һөкүм қилинған

Ғулҗа електр истансисиға 30 нәччә йилдин хизмәт қилип пенсийигә чиққан турахун җорибай вә униң аяли шадийә закир 2018-йили 3-айда тутқун қилинип лагерға елип кетилгән. 

Мәлум болушичә, бу әр-аяллар қанунлуқ паспорт арқилиқ 2014-вә 2015-йиллири голландийәдә олтурушлуқ пәрзәнтлирини йоқлап кәлгән болуп, уларниң ашу бирнәччә қетимлиқ чәтәл сәпири лагерға кетип қелишиға сәвәб болған. 

Йеқинда турахун җорибайниң сәккиз йиллиқ, шадийә закирниң йәттә йиллиқ қамаққа һөкүм қилинғанлиқи мәлум болди. 

72 яшлиқ шәмшиқәмәр ана лагерға қамалған

Уйғурлар дияридики лагерларға қамалғанлар ичидә яшинип қалған кишиләрниңму хели көп санни игиләйдиғанлиқи бу йил 72 яшқа киргән шәмшиқәмәр аниниң әһвалидин йәнә бир қетим мәлум болди.

Германийәдики адилә ғени қатарлиқ үч ача-сиңил йеқинда телевизийидә гуваһлиқ берип, ғулҗа шәһириниң қарадөң мәһәллисидики 72 яшлиқ момиси шәмшиқәмәрниң 2018-йилиниң бешида лагерға елип кетилгәнликини ашкарилиди.

Шәмшиқәмәр ана тиккүчилик билән шуғуллинидиған болуп, пәрзәнтлири униң лагерға барғудәк һечқандақ иши йоқлуқини билдүрди. 

«Йәттису уйғур музика мәктипи» уйғур сәнитиниң давамлишишиға һәссә қошмақта

Қазақистанниң алмута вилайитидики «йәттису уйғур музика мәктипи» өткән үч йилдин буян бир қатар тиришчанлиқларни көрситип, йеқинда төтинчи оқуш йилини ғәлибилик башлиди.

Мәзкур мәктәп әнглийәдики «агахан фонди» ниң иқтисадий ярдими билән қурулған болуп, һазирғичә алтә яштин 11 яшқичә болған әллик нәччә уйғур өсмүрни уйғур муқамлири вә уйғур чалғу әсваблири бойичә мунтизим тәрбийиләп чиқти.

Уйғурлар диярида уйғур мәдәнийитигә мәнсуп барлиқ мәзмунлар, җүмлидин уйғур музика сәнити хитай һөкүмитиниң йоқитиш обйектиға айлиниватқанда мәзкур мәктәпниң бу җәһәттики избасарларни тәрбийиләш тиришчанлиқи зор алқишқа еришмәктә. 

Әнқәрәдә тунҗи қетимлиқ уйғур ана тил курсини пүттүрүш мурасими өткүзүлди

Хитай һөкүмитиниң нөвәттә уйғурларниң тили, диний етиқади вә мәдәнийәт мираслирини һуҗум нишани қилишиға әгишип, дуняниң һәр қайси җайлиридики уйғурлар пәрзәнтлиригә ана тилини өгитишкә алаһидә әһмийәт бәрмәктә.

31-Авғуст күни әнқәрәдики «уйғур тәтқиқат институти» ниң уюштуруши билән уйғур ана тил курсиниң 1-оқуш йилини ғәлибилик пүттүргән оқуғучиларниң оқуш пүттүрүш мурасими өткүзүлди. Оқуғучилар уйғур тили вә әдәбияти саһәси бойичә бир қатар номурларни орунлап көпчиликни хурсән қилди. 

Мәлум болушичә, бу хилдики ана тил курслири арқилиқ уйғур өсмүрлиригә ана тил сөйгүси, вәтән муһәббити вә зулумға қаршилиқ көрситиш роһи һәққидә әмәлий вә җанлиқ тәрбийә беришкә болидикән.

Толуқ бәт