Heptilik xewerler (25-yanwardin 31-yanwarghiche)

Muxbirimiz eziz
2020-01-31
Élxet
Pikir
Share
Print
Heptilik xewerler (25-yanwardin 31-yanwarghiche)
Heptilik xewerler (25-yanwardin 31-yanwarghiche)
Photo: RFA

Uyghurlar myunxénda weten qurbanlirini xatirilidi

Gérmaniye we yawropaning bashqa jayliridin kelgen bir qisim Uyghur jama'iti 25-yanwar küni myunxén shehirige jem bolup, d u q ning re'isi dolqun eysaning dadisi eysa memet hemde amérikadiki jama'et erbabi edhemjan zakir qatarliq merhumlarni xatirilidi.

Yighilishta jama'et merhumlarning hayat-pa'aliyiti heqqide qisqiche toxtilip ötti hemde ularning rohigha atap xetme-qur'an tilawet qildi.

Yighilishta muhajirettiki Uyghurlarning beziliri bu xil pa'aliyetlerning öz nöwitide melum shexslergila emes, belki "Sherqiy türkistanda hayatidin ayrilghan shéhitlar üchünmu bir qétimliq xatirilesh bolidighanliqi" ni alahide tekitlidi.

"Hej qollanmisi" ni saqlighan kishi töt yilliq qamaqqa höküm qilin'ghan

Yéqinda xotenning lop nahiye sampul yézisida olturushluq déhqan toxti rozining öyide "Hej qilish qollanmisi" ni saqlighanliqi seweblik buningdin birnechche yil ilgiri oghli bilen birlikte töt yilliq qamaqqa höküm qilin'ghanliqi melum boldi.

Uyghur diyaridiki diniy étiqad bilen baghlinishliq bolghan barliq hadisiler nöwette "Esebiylik we térrorluq" ning ipadiliri qatarida qattiq bir yaqliq qiliniwatqan bolup, dunyaning eyiblishige uchrimaqta.

Melum bolushiche, toxti rozi lop nahiyeside shexsiy kitabxana achqan bolup, bu dukanda diniy kitablar we hej sepirige alaqidar buyumlar sétiliwatqan iken.

Amérika dölet mejliside Uyghurlarning diniy étiqad seweblik ziyankeshlikke uchrishi muhakime qilindi

Amérika awam palatasi qarmiqidiki tashqi ishlar komitéti 28-yanwar küni mexsus guwahliq bérish yighini échip, dunya miqyasidiki diniy étiqad ziyankeshlikining eng yéqinqi ehwaligha qarap chiqti.

Guwahliq bérish yighinida yighin ishtirakchiliri Uyghurlarning qandaq ziyankeshlikke uchrawatqanliqini eng chong diniy étiqad ziyankeshliki qatarida alahide muzakire qildi.

Yighin ishtirakchiliri bu mesile heqqide guwahliq bérish bilen birge amérika hökümitini bu heqte téximu konkrét bolghan emeliy heriketke ötüshke yene bir qétim dewet qildi.

Muhajirettiki Uyghurlarning müshkülati her sahening jiddiy diqqitini qozghimaqta

Türkiyediki "Hira" medeniyet we ma'arip wexpi nöwette türkiyede yashawatqan Uyghur ayallirini ziyaret qilish arqiliq ularning köp qismining a'ile judaliqi, ishsizliq we iqtisadiy yardemsiz qélishtek bir qatar müshkülatlargha duch kéliwatqanliqini höjjetleshtürüp chiqti.

Se'udi erebistandiki Uyghur muhajirliri qolliridiki xitay pasportini yéngilashqa ilajsiz qéliwatqanliqtin ular kimlik, xizmet we sayahet mesililiride éghir dishwarchiliqqa giriptar bolmaqta iken.

Xitay hökümitining Uyghurlarni basturush siyasiti alliqachan Uyghur diyaridin halqip, muhajirettiki Uyghurlarnimu xatirjem turmush kechürüsh shara'itidin mehrum qilmaqta iken. Bir qisim analizchilar buni "Xitay hökümitining insaniyetke qarshi jinayetlirini bir türi," dep körsetti.

"Yehudiylar qirghinchiliqi" xatiriside Uyghurlar mesilisi qayta eslendi

Dunya xelqi 75 yildin buyan 27-yanwardiki "Yehudiylar qirghinchiliqi" xatiriside yehudiylarning milyonlap qirghinchiliqqa uchrighanliqidek achchiq paji'eni eslep kelmekte.

2020-Yili 27-yanwar küni pütün dunya yene bir qétim "Yehudiylar qirghinchiliqi" ni eslewatqanda hazir Uyghurlarning mushuninggha oxshap kétidighan bir zor paji'ege duch kéliwatqanliqi yene bir qétim eskertildi.

D u q bu heqte mexsus bayanat élan qilip "Hergiz qaytilanmaydu" dégen tarixiy wedining emelge éshishi lazimliqini körsetti. D u q ning mes'ulliri en'gliyediki yehudiylar jem'iyiti uyushturghan xatirilesh pa'aliyitige qatniship, Uyghurlarni hazir xuddi mushundaq teqdirge duch kéliwatqanliqi heqqide melumat berdi.

"Wuxen wirusi" ning Uyghur diyaridiki ehwali endishe qozghimaqta

Ötken heptide Uyghur élide 12 kishi wuxendin tarqiliwatqan tajsiman wirus heqqide "Ösek söz tarqitish" bilen eyiblinip saqchilarning bir yaqliq qilishigha tapshurulghan idi. Nöwette bu wirusning Uyghur diyaridiki eng xewplik mesilige aylinip qéliwatqanliqi melum bolmaqta.

"Wuxen wirusi", yeni tajsiman wirusning nachar turmush shara'iti hemde jismaniy we rohiy qiynaqlardin alliqachan halidin ketken milyonlighan lagér tutqunlirigha tarqilip ketse, buning qandaq zor apetke apiridighanliqi her sahe kishilirini zor endishige salmaqta iken.

Nöwette Uyghur diyarida xitay da'iriliri jiddiy ehwallargha taqabil turush hazir 1-derijilik aldini élish tedbirlirini ijra qilishni bashliwetken bolup, muqimliq we yuqumlinishtin saqlinish eng chong söz témisi bolmaqta iken.

Toluq bet