Heptilik xewerler (14-féwraldin 20-féwralghiche)

Muxbirimiz qutlan
2015.02.20
erkin-asiya-radiosi.jpg Erkin asiya radi'osi Uyghur bölümi heptilik xewerliri
Photo: RFA

Guma nahiyiside adembomba hujumi yüz bérip 8 saqchi ölgen, 30 nechche saqchi yarilan'ghan

Ijtima'iy taratqularda ötken jüme küni guma nahiyeside adembomba hujumi yüz bergenliki heqqide xewer tarqalghan idi. Halbuki, xitay taratquliri mezkur weqening tepsilati heqqide héchqandaq xewer bermidi.

Guma nahiyesidiki yerlik ahaliler radi'omizgha uchur bérip, shu küni küchlük partlash awazini anglighanliqini, saqchi aptomobillirining kéchiche doxturxanigha kirip-chiqip turghanliqini bildürdi.

Melum bolushiche, 2-ayning 13-küni jüme namizidin kéyin bélige partlatquch bomba tangghan shu yerlik bir Uyghur yash bir saqchini ching quchaqlap basqan. Etraptiki bashqa saqchilar yopurulup kélip uni tutmaqchi bolghanda bomba partlighan. Buning bilen neq meydanda 8 neper saqchining ölgenliki we 30 nechche saqchining yarilan'ghanliqi melum.

Qaraqash nahiyisining purchaqchi yézisida yene qanliq weqe yüz bergen

Melum bolushiche, düshenbe küni qaraqash nahiyisining purchaqchi yézisida yene bir qanliq weqening yüz bergenliki ilgiri sürülmekte.

Radi'omizning igilishiche, purchaqchi yézisi tewelikide yashaydighan bir Uyghur kishi öz öyini tekshürüsh üchün basturup kirgen saqchilargha qarshiliq körsetken. Yeni saqchilarning zorawanliqigha zorawanliq bilen jawab qayturghan. Netijide, amalsizliqtin qoligha pichaq alghan bu Uyghurni xitay qoralliq saqchiliri neq meydanda oq chiqirip étip tashlighan.

Bu qaraqashning purchaqchi yézisida ötken yilidin buyan yüz bergen köp qétimliq qarshiliq körsitish heriketlirining eng yéqinqisi ikenliki melum.

Rabiye qadir xanim amérika parlamént ezasi jéymis mekgowérn bilen körüshti

Dunya Uyghur qurultiyining re'isi rabiye qadir xanim ötken jüme küni amérika parlaméntini ziyaret qilip, parlamént ezasi jéymis mekgowérn bilen körüshken.

Körüshüshte rabiye xanim nöwettiki Uyghurlarning weziyiti we xitayning Uyghurlar üstidin yürgüzüwatqan milliy we diniy zulumlirini anglatqan.

Mekgowérn rabiye xanimgha özining eng zor imkaniyet ichide Uyghurlarning ré'al ehwalini amérika dölet mejlisige anglitidighanliqini bildürgen.

Jéymis mekgowérn amérika dölet mejlisi tashqi ishlar komitétining ezasi, tam lentos kishilik hoquq komitétining re'isi we amérika kon'grésining ezasi qatarliq wezipilerni ötewatqan kishidur.

Cherchende bir tümen adem hashargha sélinmaqtiken

Radi'omizning cherchen nahiyisidin igilishiche, yéqindin buyan mezkur nahiyige qarashliq idare-organlardiki ishchi-xizmetchiler bilen yéza-kentlerdiki déhqanlar mejburiy seperwer qilinip, yol qurulushi we qumdin mudapiyelinish tosuqi yasash emgikige sélin'ghan.

Cherchendiki melum bir Uyghurning radi'omizgha bildürüshiche, nahiyelik hökümet 5-féwraldin 12-féwralghiche bir tümen kishini heriketlendürüp hashar sheklini alghan mejburiy emgekke salghanliqi melum.

Munasiwetlik uchurlardin melum bolushiche, cherchende mexsus qum tosuq yasash qurulushini asas qilghan hashar emgikining 17 yildin buyan izchil dawamliship kéliwatqanliqi ilgiri sürülmekte.

Kelpin hökümet da'iriliri öz tewesidiki puqralarning yanfonigha yéngi simkard tarqatmaqchiken

31-Yanwarda xitayning Uyghur élidiki hökümet taratquliri xewer bérip, ahalilerning shexsiy yanfonlirini bashqurush boyiche yéngi belgilime chiqarghanliqini élan qilghan idi.

Xewerde déyilishiche, Uyghur éli teweside yanfon, kompyutér we bashqa alaqe-uchur üsküniliri satidighan dukanlar birdek xéridarlarning kimliki we bashqa shexsiy uchurlirini tizimgha élip, saqchixanilargha yollishi telep qilin'ghan.

Yéqinda kelpin tewesidin ziyaritimizni qobul qilghan bir Uyghur ayal bu heqte uchur bérip, da'irilerning bu yéngi belgilimisining yéqinda kelpinde emeliylishish aldida turghanliqini bildürdi.

Melum bolushiche, da'irilerning pat yéqinda ahalilerning yanfonliridiki kona simkardlarni yighiwélip, ornigha yéngidin tizimgha élin'ghan simkard tarqitip bérmekchi boluwatqanliqi kelpin xelqi arisida xatirjemsizlik peyda qilmaqtiken.

Qaghiliq nahiyiside ata-bala pida'iylarning saqchi aptomobiligha ot qoyush weqesi yüz bergen

Ikki kündin buyan ijtima'iy taratqularda qaghiliq nayiside toqunush yüz bergenliki, toqunushta bir dane saqchi aptomobiligha ot qoyulghanliqi we birqanche kishining ölüp-yarilan'ghanliqi heqqide uchurlar tarqaldi.

Radi'omizning igilishiche, mezkur weqe 16-féwral küni kech sa'et 9:00 etrapida qaghiliq nahiyelik 1-bashlan'ghuch mektepning udulidiki bir talla bazirining aldida yüz bergen. Weqede az dégende 3 kishining ölgenliki melum.

Ashkarilinishiche, mezkur weqe qaghiliqning tügichi yézisidiki ata-bala bir a'ile kishiliri bilen munasiwetlik iken. Weqe jeryanida ata-bala ikkiylen étiwétilgen, yene bir kishi doxturxanigha apirilghan.

Qaghiliq nahiyelik doxturxanidiki bir doxtur özining shu küni yarilan'ghan ikki saqchini tekshürgenlikini, emma weqening tepsilati we bashqa ishlardin xewersiz ikenlikini bildürdi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.