Һәптилик хәвәрләр (13-апрелдин 19-апрелғичә)

Мухбиримиз әзиз
2019-04-19
Елхәт
Пикир
Share
Принт
«Волкисвагин» аптомобил ширкитиниң иҗраийә башлиқи һерберт дайес BBC агентлиқи мухбирниң соаллириға җаваб бәрмәктә. 2019-Йили 15-апрел, шаңхәй.
«Волкисвагин» аптомобил ширкитиниң иҗраийә башлиқи һерберт дайес BBC агентлиқи мухбирниң соаллириға җаваб бәрмәктә. 2019-Йили 15-апрел, шаңхәй.
Social Media

Ғулҗа байлиридин яқуп һаҗи вә сәлим һаҗи қамаққа һөкүм қилинған

Йеқинда ғулҗа шәһиридики көзгә көрүнгән уйғур байлиридин яқуп һаҗи вә сәлим һаҗиниң 15 йиллиқ қамаққа һөкүм қилинғанлиқи һәққидә учурлар мәлум болди.

Әһвалдин хәвәрдар кишиләрниң билдүришичә, яқуп һаҗи вә сәлим һаҗи илгири ғулҗа шәһириниң су дәрваза районидики «ақ мәсчит» ни селишқа бирликтә төт милйон сом (тәхминән 600 миң доллар) һәдийә қилған икән. Бу қетим уларниң қамаққа һөкүм қилинишиға «диний әсәбийлик» амили баһанә қилинған.

Мәлум болушичә, ғулҗадики тутқун қилинған уйғур байлириниң көп қисми хәйр-сахавәт ишлири билән тонулғанлар болуп, уларниң қилғанлири җәмийәтниң параванлиқи вә хәлқ аммисиниң хатирҗәмликигә мунасивәтлик ишлар икән.

Хелил һашимға берилгән 19 йиллиқ қамақ 15 йил илгирики диний тәрбийәгә бағланған

Ғулҗа тәвәсидики лагерларниң биридә хитай тили оқутқучиси болуп ишләватқан тиҗарәтчи хелил һашимниң 19 йиллиқ қамаққа һөкүм қилинғанлиқи һәққидики учурлар лагерларниң ички қисмидики бәзи қараңғу тәрәпләрни ашкара қилди.

Мәлум болушичә, йәккә тиҗарәт билән шуғуллинип кәлгән хелил һашим өзиниң хитайчә оқуғанлиқидәк арқа көрүнүши билән дәсләп лагерларниң биригә оқутқучилиққа елип кетилгән.

Хелил һашим лагердики «өзини паш қилиш» долқунида буниңдин 15 йил бурун оғлини қуран курсиға бәргәнликини мәлум қилған. Буниң билән униң оғли вә аялиму тутқун қилинған.

Язғучи мәмтимин һошурниң тутқунда икәнлики алға сүрүлмәктә

Уйғурлар дияридики зор тутқунда әл сөйгән язғучи мәмтимин һошурниң тутқун қилинғанлиқи һәққидә һәр хил тәхминләр оттуриға чиқиватқан иди. Мухбиримизниң бу һәқтики әһвал игилиши җәрянида йәрликтики хадимлар мәмтимин һошурниң әсәрлиридин «мәсилә» чиққанлиқини билдүрди.

Бир қисим чәтәл мәтбуатлириму мәмтимин һошурниң тутқун қилинғанлиқи тилға елиниду. Бу һәқтики әһвал ениқлаш җәрянида һечқандақ орун яки шәхсму бу әһвални инкар қилмиған.

Мәлум болушичә, мәмтимин һошур 1990-йиллардин кейин уйғур проза иҗадийитидә йеңи бурулуш һасил қилған болуп, өзиниң көплигән надир әсәрлири билән «уйғур һазирқи заман әдәбиятидики байрақдар әдибләрниң бири» дәп тонулған икән.

«Волкисваген» ширкитиниң лагерлар һәққидики сөзи байқут чақириқиға сәвәб болмақта

Германийәниң «волкисваген» аптомобил ширкити йеқинда шаңхәйдә өткүзүлгән аптомобил көргәзмисидә мухбирларниң соаллириға җаваб берип, өзлириниң уйғур дияридики лагерлар мәсилиси вә сиясий бастуруштин хәвири йоқлуқини билдүргән.

Мәзкур ширкәтниң бу җаваби хәлқараға мәлум болғандин кейин һәр саһә кишилириниң зор тәнқидигә дуч кәлди. Шуниң билән биргә уларниң мәһсулатлирини байқут қилиш чақириқлири оттуриға чиқишқа башлиди.

Мәлум болушичә «волкисваген» аптомобиллири 1990-йиллардин тартип хитайда әң әң қарши елинған аптомобилларниң бири болуп кәлгән. Буниңдин алтә йил илгири болса улар үрүмчидә тармақ завут ачқан икән.

Хитайниң д у қ ға астириттин қара қолини сунуши зор ғулғула қозғиди

Муһаҗирәттики уйғурларниң әң чоң аммиви тәшкилати болған д у қ тор бетигә хитай хаккерлириниң һуҗум қилиш вәқәсидин кейин йеқинда хәлқара малийә мулазимәт ширкити «рефенитив» ниң д у қ ни террорлуқ қара тизимликигә киргүзүп қойғанлиқи мәлум болди.

Мушу сәвәбтин д у қ вә униң рәһбәрлириниң банка һесабатиға әвәтилгән пуллар маңмайдиған, ғайиб болуп кетидиған яки рәт қилинидиған әһвал келип чиққан.

Д у қ ниң рәһбәрлири бу ишниң оттуриға чиқишида хитай һөкүмитиниң қоли бар, дәп қарайдиғанлиқини билдүргән. Шуниңдәк илгири хитай һөкүмитиниң хәлқара сақчи тәшкилатидин пайдилинип долқун әйса һәққидә тутуш буйруқи чиқарғанлиқини әсләткән.

Истанбулда «миллий мәпкурә вә тәшкилатчилиқ» темисида тәрбийәләш курси өткүзүлди

Муһаҗирәттики уйғур яшлирини миллий мәпкурә вә тәшкилатчилиқ билимлири бойичә тәрбийәләш мәқситидә истанбулдики уйғур академийәси түркийәниң һәрқайси җайлирида оқуватқан уйғур яшлири үчүн тәрбийәләш курси өткүзди.

Икки күнлүк бу курста докторлуқ вә магистирлиқ унванлири үчүн оқуватқан 21 оқуғучи охшимиған темилардики лексийәләргә қатнашти һәмдә миллий мәпкурә, тәшкилатчилиқ темиси бойичә тегишлик мәлуматларға игә болди.

Мәлум болушичә, муһаҗирәттики уйғур давасиниң кәлгүси тәрәққияти үчүн бу хилдики курсларни көпләп ечиш зор әһмийәткә игә, дәп қаралмақта икән.

Толуқ бәт