Heptilik xewerler (26-maydin 01-iyun'ghiche)

Rabiye qadir xanim: weten bedelsiz qolgha kelmeydu

Xitay da'iriliri Uyghur milliy herikiti rehbiri rabiye qadir xanimning türmidiki oghullirigha bésim ishlitip, “Rabiye qadir soda sariyi” we “Eqide soda sariyi” ning ikki hepte ichide chéqilidighanliqini bildürgen we ularni bu binalarning igidarliq hoquqini ötküzüp bérishke mejburlighan.

Bu rabiye qadir xanimning qattiq eyiblishige uchridi.

Rabiye qadir xanim ziyaritimizni qobul qilip, bu qétim özining dunya Uyghur qurultiyigha qayta re'is bolup saylinishi bilen teng xitayning yene öch élish herikiti bashlighanliqini körsetti.

“Jandin kechmigüche janan'gha yetkili bolmaydighan” liqini tekitligen rabiye qadir xanim axirida: weten bedelsiz qolgha kelmeydu, dédi we weten dewasi üchün shexsen özi emes belki pütkül Uyghur xelqning bedel tölewatqanliqini bildürdi.

Rabiye qadir xanim 2006-yili dunya Uyghur qurultiyigha re'is bolup saylinip uzun ötmey, xitay da'iriliri uning ikki oghlini türmige tashlighan idi.

“5-Iyul” din kéyin iz-déreksiz ghayib bolghanlar

“5-Iyul” din kéyin iz-déreksiz ghayib bolghanlardin biri eysajan emet. U, 2009-yili 5-iyul ayali toxtigül bilen birlikte namayish meydanida tutqun qilin'ghan, toxtigül éghir boy bolghachqa shu küni qoyuwétilgen.

Eysajan türmige kirip ketkendin kéyin tughulghan balisining didarini körüshkimu muyesser bolalmighan bolup, nöwette uning balisi ikki yérim yashqa kirgen.

Eysajan emet 1984-yili qeshqerde tughulghan we qeshqerning örük baziri mehelliside chong bolghan. U 2008-yili toy qilip, ürümchige köchüp kelgen iken.

Bir Uyghur déhqanning shikayiti: “Uchturpanda yer döletning, su bingtu'enning”

Melum bolushiche, uchturpanliq abduréhim rozi bay bolush arzusida 190 mo boz yerni 50 yilliq toxtam bilen hödde alghan.

Halbuki zira'etliri emdi maysa bolushqa bashlighanda suni igiliwalghan bingtu'en da'iriliri su heqqini 30 yüendin birdinla 300 yüen'ge östürüwalghan.

U su heqqini waqtida hazirlashqa imkansiz qalghachqa, zira'itining 2-qétimliq süyi kéchikken, üchinchi qétimliqi bérilmigen. Netijide uning zira'etliri tunji yilila qurghaqchiliq apitige uchrighan.

Nöwette abduréhim rozi, nechche ewlad bowiliri térip bashqurup kelgen bu yerlerni xitay dölitidin ijarige élip térimaqta, tebi'etning némiti bolghan suni bingtu'endin sétiwalmaqta.

Kanadadiki saylamda qéyum mesimuf kanada Uyghur jem'iyitining re'islikige saylandi

27-May kanadadiki Uyghurlar saylam ötküzüp, qéyum mesimufni kanada Uyghur jem'iyitining re'islikige saylidi.

Saylam kanadaning démokratik prinsiplirigha uyghun halda, Uyghurlar topliship yashawatqan sheherlerning hemmiside bilet tashlash sanduqi tesis qilish shekli bilen élip bérildi.

Bu qétimqi saylamda hashimjan turaq bilen qéyum mesimuf kanada Uyghur jem'iyitining re'islikini talishish riqabitige qatnashqan .Axirida qéyum mesimuf utup chiqti. Kanada Uyghur jem'iyitining sabiq re'isi ruqiye turdush qéyum mesimufni qutluqlidi.

Oghlining xun dewasi üchün muraji'etname tarqatqan ata shixenze jama'iti teripidin qoghdaldi

Ghazi aka oghlining xun dewasi üchün 27-may béyjinggha yene kelgen. Ghazi akining bildürüshiche, u béyjinggha kélishtin ilgiri 2001-yili xitay gézitige bésilghan oghlining ölümi heqqidiki xewerni 200 nusxa köpeytip tarqatqan.

Gerche u xitay saqchilirining parakendichilikige uchrighan bolsimu, etraptiki Uyghur we xitay jama'iti uni saqchilarning tutqun qilishidin qoghdap qalghan.

Ghazi akining oghli 2001-yili xitaylar teripidin öltürülgen. Shixenze qanun organliri déloni adil bir terep qilmighan bolghachqa ghazi aka 11 yildin buyan erz qilip kelmekte.

Finlandiye sherqiy türkistan jem'iyiti dunya kültür féstiwaligha qatnashti

Finlandiye sherqiy türkistan jem'iyiti finlandiyining paytexti xélsinkida ötküzülgen dunya kültür kürikige qatniship, Uyghur qul-hüner sen'et buyumlirini körgezme qildi we kürekke kelgen méhmanlargha xitayning Uyghurlargha qaratqan bésim siyasitini anglatqan.

Mezkur körekke, finlandiye diplomatiye ministirliqi, yawropa birliki teshwiqat bölümi qatarliq 450 siyasiy we ijtima'iy teshkilatlar qatnashqan.

Körekke qatnashqan seydi obulqasim hajimning éytishiche, ular körek jeryanida Uyghurlarni peqet bilmeydighan nurghun kishilerge, sherqiy türkistanning xitay ölkisi emes, belki mustemlikisi ikenlikini bildürgen.