Heptilik xewerler (18-awghusttin 24-awghustqiche)

Muxbirimiz eziz
2018-08-24
Élxet
Pikir
Share
Print
Erkin asiya radi'osi Uyghur bölümi heptilik xewerliri
Erkin asiya radi'osi Uyghur bölümi heptilik xewerliri
Photo: RFA

Uyghur diyaridiki lagérlar üzlüksiz kéngeymekte

Yéqindin buyan melum boluwatqan resimlik uchurlar we sün'iy hemrahtin tartilghan tekshilik xeritisi Uyghurlar diyaridiki lagérlarning san we kölem jehette tézdin éship bériwatqanliqini ashkara qilmaqta.

Finlandiyediki muhajir xalmurat Uyghurning bildürüshiche, turpanning özide birnechche yéngi lagér peyda bolghan. Bu lagérlar sheherdin yiraq bolghan pinhan jaylargha sélin'ghan bolup, bu rayon'gha sirttikilerning kirishi men'i qilin'ghan.

Muxbirimizning bu toghriliq ehwal igilishi jeryanida onsu nahiyeside töt orunda lagér qurulghanliqi, bu lagérlarda 30 mingche kishining "Terbiyelesh" te ikenliki melum boldi.

Toqsu nahiyeside lagérgha qamalghanlar ahalining on pirsentidin éship ketken

Yéqinda melum bolushqa bashlighan "Yerliktiki on pirsent nopusning lagérlargha qamilishi" heqqidiki melumatlarning rastliqi yene bir qétim delillendi.

Muxbirimizning toqsu nahiyesi tewesidin ehwal igilishi jeryanida mezkur nahiye teweside üch lagérning barliqi, bu jaylarda 22 ming Uyghurning "Terbiye" éliwatqanliqi melum boldi.

Melum bolushiche, bu nahiyening yéza igilik-bankisi saheside xizmet qilidighan jem'iy 154 neper banka xadimning barliqi, bulardin 17 nepirining yighiwélish lagérigha qamalghanliqi ashkarilandi.

Uyghur saqchi emeldari "Térrorchilar bilen hemkarlashqan" dep eyiblendi

Xitay hökümiti ijra qiliwatqan siyasiy basturush jeryanida Uyghur serxillirining köplep qolgha élinishi melum bolghan idi. Yéqinda xitay hökümitining qanun sistémisidiki Uyghur emeldarlarnimu qattiq teqibge éliwatqanliqi ashkara boldi.

Xitay axbaratliridin melum bolushiche, cherchen nahiyelik jama'et xewpsizliki idarisining sabiq siyasiy komissari ghalip tursun'gha "Térrorchilar we üch xil küchlerge yantayaq bolghan shuningdek milliy öchmenlikni terghib qilghan" dégendek jinayetler artilghan.

Igilishimizche, ghalip tursun Uyghur diyaridiki "Ikki yüzlimichilerge zerbe bérish" herikiti bashlan'ghandin buyan jama'et xewpsizlik saheside "Ikki yüzlimichilik" bilen eyiblen'gen eng yuqiri derijilik kadir iken.

Lagérdiki Uyghurlarning uruq-tughqanliri éghir soruqchiliq tartmaqta

Lagérlargha qamalghan Uyghurlarning köpiyishige egiship, bu Uyghurlarning uruq-tughqanliri a'ile boyiche bir-biridin juda bolushqa oxshash éghir paji'elerge giriptar boluwatqanliqi melum boldi.

Bu heqtiki guwahchilar alaqidar ehwallardin melumat bérip, lagérlargha qamalghan perzentliri yaki ata-anisidin héchqandaq xewer élish imkaniyitining bolmaywatqanliqini bildürdi.

Melum bolushiche, bu xildiki a'ililerning guwahliq matériyalliri xelq'arada xitay hökümitige bésim peyda qilishta muhim ehmiyetke ige bolup, d u q izchil herqaysi jaylardiki Uyghur jama'itidin mushu heqtiki delil-ispatlar bilen temin étishni telep qilip kelmekte iken.

Uyghur jem'iyiti duch kéliwatqan basturush gherb dunyasida küchlük diqqet qozghimaqta

Xitay hökümiti özlirining Uyghurlar diyaridiki basturush heriketlirini izchil aqlap kelgen bolsimu, gherb dunyasidiki axbarat wasitiliri we hökümetliri bu ehwalning yéqinqi tereqqiyatigha zor derijide diqqet qilip kelmekte.

Ötken heptidin bashlap gherb dunyasidiki eng nopuzluq gézit-zhurnallarda we téléwiziye qanallirida Uyghurlar hazir duch kéliwatqan ré'alliq tepsiliy xewer qilinip "Uyghurlar 2-dunya urushi mezgilidiki yehudiylarning teqdirige duch kélish aldida turmaqta," dégendek yekünler otturigha chiqmaqta.

Bir qisim analizchilar xitay hökümitining Uyghurlargha qiliwatqan zulumlirigha islam döletlirining süküt qilishigha nisbeten bu yüzlinishni zor ijabiyliq, dep bahalimaqta.

Muhajirettiki Uyghurlar qurban héyt namizida wetendiki zulum qurbanlirigha du'alar qildi

Pütkül Uyghur jem'iyiti éghir siyasiy krizisqa giriptar boluwatqan bir peytte yétip kelgen bu yilqi qurban héyt namizida muhajirette yashawatqan Uyghur jama'iti wetendiki barliq Uyghurlargha özlirining semimiy tileklirini bildürüp du'alar qildi.

Amérika, türkiye we ottura asiya döletliridiki Uyghur jama'iti qurban héytliq namaz üchün jem bolghanda wetendiki zulumning axirlishishi üchün birlikte du'a qildi.

Herqaysi jaylardiki diniy zatlar öz teblighliride Uyghur jama'itini héchqachan azadliq we hörlükke érishishtin ümidini üzmeslikke chaqirdi shundaqla zulumning haman axirlishidighanliqini tekitlidi.

Toluq bet