Heptilik xewerler (20-awghusttin 26-awghustqiche)

Muxbirimiz jüme
2011.08.26

Rabiye qadir xanim “Haffington pochta géziti” de xitay xelqige qarita chaqiriqname élan qildi

Uyghur milliy herikiti rehbiri rabiye qadir xanim xitay xelqige qarita chaqiriqname élan qilip, xitay xelqini sherqi türkistan mesiliside heqiqetni yaqlashqa we zulumgha yantayaq bolmasliqqa chaqirdi.

Rabiye qadir xanimning mezkur chaqiriqnamisi amérika we en'gliye qatarliq döletlerde chiqidighan xelq'araliq axbarat wasitiliridin “Haffington pochta géziti” de 20-awghust élan qilindi.

Chaqiriqnamide, bir qisim xitay puqralirining “5‏-Iyul weqesi” din kéyin hökümet bilen bir septe turup, Uyghurlargha qarshi ashkara zorawanliq yürgüzgenliki, yene bir qisim xitay puqralirining Uyghur mesiliside hökümetning teshwiqatigha egiship kétiwatqanliqi, buning her ikki millet kelgüsi ewladlirining menpe'iti üchün tehdit ikenliki otturigha qoyulghan.

Gumidiki zeherlinish weqesi téxiche sir péti turmaqta

Xotenning guma nahiyiside zeherlinish weqesi yüz bérip, 13 etrapida Uyghurning ölgenliki ilgiri sürülüp aridin bir hepte ötti, halbuki yerlik da'iriler weqening tepsilati heqqidiki uchurlarni ashkarilimidi.

Xitay da'iriliri zeherlinishning aptomobillargha ishlitilidighan tonglashning aldini élish suyuqluqi qachilan'ghan baklarda toshulghan achchiqsuni istémal qilghanliqtin kélip chiqqanliqini ilgiri sürgen idi.

Emma achchiqsuni qaysi shirketning satqanliqi, Uyghur lengpungchining achchiqsuni qeyerdin alghanliqi we qalghan achchiqsuni qandaq bir terep qilghanliqigha da'ir tepsilatlar hazirghiche mexpiy tutulmaqta.

Yawro-asiya yermenkisi” harpisida ürümchi weziyitining jiddiylishishi sheher ahalisini bi'aram qildi

Radi'omiz igiligen uchurlardin melum bolushiche, 1-séntebirdin 5-séntebirgiche ürümchide ötküzülidighan “Yawro-asiya yermenkisi” harpisida ürümchide qattiq bixeterlik tedbirliri élin'ghan, bu xil tedbirler yerlik ammini bi'aram qilghan.

Ürümchi shehiridin ziyaritimizni qobul qilghan bir xanimning bildürüshiche, ürümchi kochilirida qoralliq saqchilar we Uyghurlar toplashqan jaylarda puqrache kiyin'gen saqchilar köpeytilgen, bu sheher puqralirida wehime peyda qilghan.

Bu xanim yene, 25-awghusttin bashlap meschitlerdiki kolléktip iptar pa'aliyitige cheklime qoyulidighanliqi heqqidiki xewerlerning naraziliq qozghighanliqini bildürdi.

Golland tili grammatikisi neshrdin chiqish aldida

Gollandiyide yashawatqan Uyghur qizi rizwan'gül mexsum yéqinda yene “Golland tili grammatikisi” namliq ikkinchi kitabini neshrge sun'ghan.

U, gollandiyige 2008-yili 10-ayda kelgen bolup, shu yildin bashlap golland tilini özlükidin öginip hazir aliy téxnikom derijilik bir mektepke oqushqa kirgen.

Rizwan'gül mexsum 2011-yili 1-ayda “Gollandche-Uyghurche lughet” ni tüzüp, neshr qildurghan idi. U yéqinda neshrge sun'ghan “Golland tili grammatikisi” gollandiyidiki Uyghur tili tetqiqatigha töhpe qoshqusi.

Uyghur bokschi memettursun 69 kilogramliqlar boyiche asiya chémpiyoni boldi

Bu yil 8-ayda qeshqerlik Uyghur bokschi memet tursun chong koriyide, qirghizistanliq Uyghur éghirliq kötürüsh mahiri sabirjan grétsiyide chémpiyon boldi.

Uyghur bokschi memet tursun chong 8-ayning 23-küni koriyide ötküzülgen xelq'araliq musabiqide 69 kilogramliqlar boyiche asiya chémpiyoni bolghan.

Memet tursun chong deslepte, koriyilik, filippinliq we mongghuliyilik reqiblirini yenggendin kéyin, axirida qazaqistanliq reqibi bilen hel qilghuch musabiqige chüshken. U bu musabiqide, 19 ge qarshi 24 nomur bilen reqibini yéngip chémpiyon bolghan.

Uningdin bashqa grétsiye paytexti afinada ötküzülgen tenheriket musabiqiside qirghizistandin barghan Uyghur éghirliq kötürüsh mahiri sabirjan altun médalgha ériship, qirghizistan'gha we Uyghurlargha shan-sherep keltürgen. Uyghurlar bu chémpiyon oghlanlardin pexirlinish tuyghulirini ipadileshmekte.

2003-Yildiki qirghizistan aptobus weqeside éri we baliliridin ayrilghan 11 ayal naheqchilik üstidin erz qilmaqta

2003-Yili qirghizistanda yüz bergen aptobus bulash weqeside éri we baliliridin ayrilghan 11 Uyghur ayal 8 yildin béri erz qilmaqta.

2003-Yili 26-mart qeshqer we atushluq Uyghur sodigerlerni asas qilghan bir aptobus, qirghizistandin qeshqerge qaytish sepiride bulangchiliqqa uchrighandin kéyin, köydürüwétilgen idi.

Bu aptobusta köyüp ölgenler arisida Uyghurlardin bashqa 4 xitaymu bar bolup, xitay da'iriliri bu xitaylarning a'ile tawabi'atlirigha tölem puli bergen bolsimu, Uyghurlargha héchnéme bermigen.

Weqesidin kéyin, héchqandaq tölemge érishelmigen tursun'gül qatarliq 11 neper Uyghur ayal ötken 8 yildin béri bu heqte erz qiliwatqan bolsimu, erzini anglaydighan adem tapalmighan. Bular hazir béyjingda bolup, yerlik da'iriler bularni qayturup kétishke adem ewetken.

Béyjingdiki Uyghur erzdarlar “Los anjilis waqti” gézitige xitay hökümitining Uyghurlargha qiliwatqan zorawanliqlirini pash qildi

Béyjingdiki tonulghan erzdarlardin tursun ghopur, aygül toxti we nurdun tuniyaz qatarliqlar, 21-awghust béyjingda, “Los anjilis waqti” gézitining ziyaritini qobul qilip, xitay hökümitining yillardin béri Uyghurlargha qiliwatqan heqsizliri we nöwette ramzan mezgilide yolgha qoyuwatqan cheklimiliri heqqide melumat bergen.

Xewerde bildürülüshiche, erzdar aygül toxti Uyghur rayonidiki xitay köchmenlirining dölet yaritip bergen ewzelliklerdin paydilinip, Uyghurlarning ilikidiki qoru-jay we térilghu yerlirini tartiwéliwatqanliqini, erzdar nurdun tuniyaz xitayda Uyghurlarning awazigha qulaq salidighan héchbir bir organning yoqluqini, erzdar tursun ghopur bolsa, xitayning ramzan mezgilidiki cheklimilirini nuqtiliq halda pash qilghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.