Һәптилик хәвәрләр (9-ноябирдин 15-ноябирғичә)

Мухбиримиз әзиз
2019-11-15
Елхәт
Пикир
Share
Принт
Һәптилик хәвәрләр (9-ноябирдин 15-ноябирғичә)
Һәптилик хәвәрләр (9-ноябирдин 15-ноябирғичә)
Photo: RFA

Дуняниң һәрқайси җайлиридики уйғурлар «шәрқий түркистан җумһурийити» ни хатирилиди

1933-Йили вә 1944-йилиниң 12-ноябир күнлири қурулған «шәрқий түркистан җумһурийити» ниң дуняға кәлгән хатирә күнини хатириләш мурасими дуняниң һәрқайси җайлиридики уйғур муһаҗирлири арисида дағдуғилиқ өткүзүлди.

Хатириләш паалийитидә уйғурларниң дөләт қуруш тарихи йәнә бир қетим әсләнди. Шуниң билән биргә тарихтики аччиқ савақлар вә тәҗрибиләр хуласиләнди. Бу хил паалийәтләр арқилиқ муһаҗирәттики уйғур өсмүрлириниң миллий кимлик вә тарих чүшәнчилиригә йеңи мәзмунлар қошулди.

Уйғур мойсипитлири бу һәқтә пикир қилип, бу хил паалийәтниң өзи уйғурларға уларниң кимликини әслитидиған муһим әскәртмә икәнликини, мушуниң өзи уйғурларниң һаман өз-өзигә хоҗа болидиғанлиқиниң бешарити икәнликини билдүрди.

Лагер тутқунлириниң қәшқәрдики тоқумичилиқ завутида ишләватқанлиқи ашкариланди


Йеқиндин буян хәлқараниң зор диққитидә болуватқан лагерлардики милйонлиған тутқунларниң лагерларға қошна җайлардики завутларда мәҗбурий әмгәккә селиниватқанлиқи һәққидә көплигән учурлар оттуриға чиқишқа башлиди.

Буниңға мас һалда мушу хилдики тутқунларниң әмгики бәдилигә ишләпчиқирилған зор миқдардики йеник санаәт буюмлири америка таможнасида тохтитип қоюлди. Әмма хитай һөкүмити өзлириниң лагер тутқунлирини мәҗбурий әмгәккә селиватқанлиқини қәтий инкар қилди.

Мухбиримизниң бу һәқтики әһвал ениқлиши җәрянида қәшқәрниң йеңишәһәр вә йеңисар наһийәлиридики лагер тутқунлириниң шу җайдики қомушкөл тоқумичилиқ фабрикисида ишлитиливатқанлиқи ашкариланди.

Хитай пойизиниң түркийәдин өтүши зор ғулғула қозғиди

Хитай һөкүмити зор мәбләғ аҗратқан «бир бәлвағ бир йол» қурулушиниң явропаға баридиған тунҗи йүк пойизи өткән һәптә түркийә пайтәхти әнқәрәдин өтти.

Түркийә вә хитайниң юқири дәриҗилик әмәлдарлири бу мунасивәт билән буниң қандақ зор әһмийәткә игә икәнлики һәққидә сөз қиливатқанда иҗтимаий таратқуларда бу һәқтә көплигән муназириләр пәйда болди.

Анализчилар бу һәқтә пикир қилип, хитайниң бу хилдики «һәмкарлиқ» тәсири давамлиқ кеңәйсә униң түркийәгә еғир сәлбий ақивәт елип келидиғанлиқини көрсәтти.

Д у қ хәлқаралиқ мунбәрләрдә уйғурлар мәсилисини паал аңлатти

Уйғурлар учраватқан зулумға қарита дуняниң техиму зор қоллишини қолға кәлтүрүш үчүн дуня уйғур қурултийиниң рәиси долқун әйса хәлқаралиқ мунбәрләрдә паал һәрикәтләрдә болмақта.

«Берлин теми» йиқилғанлиқиниң 30 йиллиқ хатириси үчүн берлинда чақирилған «корбер дуня лидерлири диялоги» йиғинида долқун әйса америка ташқи ишлар министири майк помпейо вә германийәниң сабиқ президенти кристян волф қатарлиқ кишиләр билән учрашти.

14-Өктәбир күни җәнвә шәһиридә чақирилған «2019-йиллиқ җәнвә мунбири» дә долқун әйса хитайниң җаза лагери вә юқири техникилиқ тәқиблири мәсилисини нуқтилиқ оттуриға қойди.

Бостон шәһиридә шәрқий түркистан байриқи чиқирилди

12-Ноябир күни америкадики чоң шәһәрләрдин бири болған бостонда шәрқий түркистан байриқи чиқириш мурасими болуп өтти.

Шу күни массачусеттис, вирҗинийә вә башқа шитатлардин кәлгән уйғур җамаити һаваниң соғуқ вә ямғурлуқ болушиға қаримай бостон шәһәрлик һөкүмәт бинаси алдида «шәрқий түркистан марши» ниң җөр болуши билән шәрқий түркистанниң ай-юлтузлуқ көк байриқини шәһәрлик һөкүмәтниң байрақ хадисиға чиқарди.

Мәзкур паалийәтниң икки қетимлиқ «шәрқий түркистан җумһурийити» қурулған хатирә күнгә тоғра келиши муһаҗирәттики уйғур җамаитини толиму хурсән қилди. Шундақла бу хил паалийәтни американиң башқа чоң шәһәрлиридиму вуҗудқа кәлтүрүш чақириқлири оттуриға қоюлди.

Түркийә сәпиридә ғайиб болған йопурғалиқ тиҗарәтчи ибраһим қурбанниң қамақханида өлгәнлики дәлилләнди

Буниңдин үч йил илгири, йәни 2016-йили йопурға наһийәсидин түркийә сәпиригә атланған тиҗарәтчи ибраһим қурбан үрүмчидин айропиланға чиқиш алдида из-дерәксиз ғайиб болған иди. Йеқинда униң йопурғадики бир қамақханида буниңдин икки йил илгири җан үзгәнлики ашкара болди.

Мәлум болушичә, ибраһим қурбан әйни вақитта түркийәдә икки һәптә саяһәттә болғандин кейин йопурғаға қайтип кәлгән һәмдә қайта түркийә сәпиригә атланғанда үрүмчидә қолға елинған. Кейинчә йопурғада сорақ қилинип, еғир қийнақта җан үзгән.

Гәрчә ибраһим қурбанниң қамақханида өлгәнлики дәлилләнгән болсиму, әмма униң немә сәвәбтин тутқун қилинғанлиқи намәлум һалда турмақта.

Пикирләр (0)
Share
Толуқ бәт