Heptilik xewerler (17-dékabirdin 23-dékabirghiche)

Muxbirimiz erkin
2011.12.23
Share on WhatsApp
Share on WhatsApp

Uyghur boksyurchilar almatada ötküzülgen xelq'ara boks musabiqiside zor netijige érishti

Uyghur boksyorchilar qazaqistanning almata shehiride ötküzülgen xelq'ara boks musabiqisige qatniship, zor netije qazandi.

Qazaqistan jumhuriyitining xizmet körsetken trinéri min'géri xeyrudinof xatirisige béghishlan'ghan 10-nöwetlik qazaqistan xelq'ara boks musabiqiside zulpiqar memet éli 69 kilogramlar türide reqiplirini yéngip, chimpyonluqqa érishken. Oxshashla alim hoshur 52 kilogramliqlar türide kümüsh médalgha érishken.

Bu qétimqi musabiqige Uyghur aptonom rayonidin 7 boksyorchi qatnashqan bolup, musabiqige qatnashqan Uyghur boksyorchilarning hemmisi netijige érishken.

Zulpiqar memet éli we alim hoshurlardin bashqa yene qurbanjan chong 56 kilogramliqlar, abduréhim ibrahim bilen eysa qari 81 kilogramliqlar boyiche 3‏-likke, abduréhim bilen aybin 60 we 75 kilogramliqlar boyiche 5 likke érishken.

Min'géri xeyridinof namidiki mezkur musabiqige rusiye, qirghizistan, özbékistan, ukra'iniye qatarliq sabiq sowét ittipaqi jumhuriyetliridin bashqa isra'iliye, kuba qatarliq döletlerning tenheriketchilirimu qatnashqan idi.

Uyghur erzidari nurgül toxti d u q ezasi dégen guman bilen 38 kün qamap qoyulghan

Béyjingdiki Uyghur erzdarlardin nurgül toxti xitay saqchi da'iriliri teripidin dunya Uyghur qurultiyining béyjingda turushluq wekili, dégen guman bilen tutqun qilinip, 38 kün solap qoyulghan.

Ikki yilning aldida, nurgül toxtining 7 yashliq oghli xitay adem bédikliri teripidin epqéchip kétilgen. Bu weqe nurgül toxti tijaret qiliwatqan dalyen shehiride yüz bergen idi. Gerche nurgül xanim oghlini élip qachqan xitay adem bédiklirini tépip oghlini qutquzuwalghan bolsimu, biraq oghlining binormalliqini bayqap saqchigha erz qilghan. Lékin saqchilar adem bédiklirini tutup jazalashtin özini qachurghan.

Buning bilen u béyjinggha bérip erz qilishqa bashlighan idi. U bashqa erzdarlarni teshkillep, b d t ning béyjingda turushluq ishxanisi aldida namayish ötküzgen.

Bu yil 7‏-ayda u dalyende tutqun qilinip, üch turpan'gha élip bérilghan we bu yerde 38 kün qamap qoyulghan. Saqchilar öz waqtida uninggha éytmighan bolsimu, biraq u kéyin saqchilarning özini d u q ning adimi, dégen guman bilen solap qoyghanliqidin xewer tapqan. Nurgül xanim yéqinda yene béyjinggha qaytip kelgen.

Amérikidiki Uyghurlar pa'aliyet merkizi üchün yer sétiwaldi

Uyghur milliy herikitining rehbiri rabiye qadir xanimning teshebbusi we muhajirettiki Uyghurlarning qollishi bilen 2008‏-yildin bashlap amérikida yer sétiwélip, Uyghurlar üchün bir uniwérsal pa'aliyet merkizi qurush seperwerlik herikiti élip bérilghan idi.

Uyghurlarning amérikida pa'aliyet merkizi qurushtin ibaret bu ghayisini emeliyleshtüridighan zor qedem bésildi. 20‏-Dékabir rabiye qadir xanim qanuni resmiyetlerge imza qoyup, amérikining mariland shtati tewesidiki washin'gton shehirige yéqin bir jaydin 109 mo yerni resmiy sétiwalghan.

D u q aldinqi küni bayanat élan qilip, muhajirettiki Uyghurlarning qurmaqchi bolghan Uyghur medeniyet öyi üchün resmiy zémin'gha ige bolghanliqini jakarlidi.

570 Ming dollargha sétiwélin'ghan bu zémin'gha meschit, pa'aliyet merkizi , yataqxana, sinip, kutupxana, tenterbiye, istirahetxana qatarliq uniwérsal pa'aliyet eslihelirining qurulidighanliqi pilan qilin'ghan.

Qeshqerdiki nechche yilliq medeniy miras-mensurxan zeretliri xaniqasi köydürüwétildi

Qeshqerdiki nechche yüz yil yilliq tarixiy makan-mensurxan hezretliri xaniqasi töt etraptin ot quyup köydürüwétilgen. Mezkur xaniqaning bu yil 1‏-dékabir küni namelum kishiler teripidin ot qoyup köydürüwétilgenliki melum boldi.

Weqeni körgüchilerning bildürüshiche, saqchilar ot öchürüsh üchün kelgen kishilerni tosup, otni öchürüshke yol qoymighan. Ot köyüp 24 sa'et bolghanda ot öchürüsh tarmaqlirining su chéchishigha ruxset qilghan.

Ot öchürüsh xadimliri xaniqaning qélip qalghan xam késeklik tamlirigha yuqiri bésimliq su pürküp örüp tashlighan. Xaniqaning yaghach tashlirini bolsa tarixiy eserler süpitide saqlaymiz, dep élip ketken.

Xaniqaning türkiyide yashawatqan warisliri türkiye hökümitige erz sunup, mezkur xaniqani qayturup élishqa türk hökümitining yardem qilishini telep qilghan. Bu weqe derhal bezi türk axbarat wasitilirining diqqitini qozghighan.

“Dunya bülteni” namliq bir tor bétide “Qeshqerning yene bir merwayiti yoq boldi” dégen mawzuluq maqale élan qilinip, xitay da'irilirining bu herikiti tenqid qilin'ghan.

Qeshqerdiki medeniy miraslarni qoghdash qélish üchün unescho qatarliq xelq'ara teshkilat we türkiye qatarliq döletlerni seperwer qilish otturigha qoyulghan.

Diyas séyit yaponiyide ötküzülidighan xelq'ara karaté musabiqisige qatnishidu

Tenheriket qazaqistandiki Uyghurlarning alahide netije qazan'ghan türlirining biridur. Astana shehiride yashaydighan 8 yashliq Uyghur ösmür diyas séyit, yéqinda qazaqistanda ötküzülgen yash ösmürlerning karaté musabiqiside yuqiri netije qazinip, kéler yili yaponiyide ötküzülidighan xelq'ara yash-ösmürler karaté musabiqisige qatnishish salahiyitige érishken.

Almatada chiqidighan “Uyghur awazi” gézitining xewer qilishiche, bu yil 8 yashlardiki Uyghur karaté mahiri yéqinda xelq'ara karaté musabiqisige qatnishish teklipnamisini tapshuruwalghan. Teklipnamige xelq'ara karaté tenheriket birleshmisining prézidéntliri, amérikiliq kino cholpini stiwén sigal we yaponiyilik chémpiyon xusuya ruyuma qatarliq kishiler imza qoyghan.

Diyas séyit 6 yéshida almatada ötküzülgen bir qétimliq karaté musabiqiside chémpiyonluqqa ériship, qazaqistan döletlik mukapati bilen teqdirlen'gen idi.

Diyasning ata -anisi qazaqistan ichki ishlar ministirliqida xizmet qilidu. Ular diyasni kéchikidinla ten heriketning élishish türide chéniqturghan.

Térror gumandari rashiddin muhemmetke 11 yilliq qamaq jazasi telep qilindi

19‏-Dékabir norwégiyide échilghan sotta teptish emeldari térror gumandarliridin maykél dawutqa 11 yilliq, uning qalghan ikki hemrasigha ayrim-ayrim 5 yilliq qamaq jazasi bérishni telep qilghan.

Teptish emeldari ge'ir ewanger maykél dawutni “Norwégiyige xelq'ara térrorluqni import qildi” dep eyibligen. Esli ismi rashiddin muhemmet bolghan norwégiyilik Uyghurlardin maykél dawut, 2010‏-yili daniyidiki bir gézitxanigha qarshi tüzülgen térrorluq pilanining yétekchisi, dégen guman bilen qolgha élin'ghan idi.

Biraq u, gézitxanigha qarshi térrorluq hujumi pilanlighanliqini ret qilip, xitay elchixanisini partiltishni pilanlighanliqini ilgiri sürgen.

Sot mehkimisi teptish emeldarining pikrini mushu ayning axirliri ötküzülidighan yene bir qétimliq sotta qarap chiqidu. Fransiye axbarat agéntliqining xewiride hökümning kéler yilning bashliri élan qilinidighanliqini bildürgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.