Мутәхәссисләр: "һиндистан келәчәктә хитайға қарши тибәт вә уйғур мәсилисини козир қилип қоллиниши мумкин"

Ихтиярий мухбиримиз әркин тарим
2020-06-26
Share
yipek-yoli-we-uyghurlar-erkin-ekrem.jpg Мәркизи әнқәрәгә җайлашқан уйғур тәтқиқат институтиниң уюштуруши билән ечилған 2-нөвәтлик "йипәк йоли вә уйғурлар" темида юмилақ үстәл йиғинида мәзкур институтиниң рәиси доктор әркин әкрәм риясәтчилик қилди. 2019-Йили 27-январ, түркийә.
RFA/Arslan

Қарақурум тағлириға җайлашқан һиндистан-хитай чеграсида йүз бәргән маҗирада һиндистан әскәрлири өлгәндин кейин, асиядики бу икки чоң дөләт оттурисидики мунасивәт җиддийлишишқа башланғаниди. Шуниң билән икки дөләт оттурисидики мунасивәт дуняниң диққитини тартишқа башлиди. Бу мунасивәт билән әнқәрәдики уйғур тәтқиқат институти син көрүнүш арқилиқ "һиндистан хитай мунасивәтлири вә америка" темисида доклат бериш йиғини өткүзди. Йиғинға уйғур институти баш катипи адил әруйғур риясәтчилиқ қилди. Мәзкур институтниң мудири доктор әркин әкрәм әпәнди, түркийә истанбулдики қоч университети хәлқара мунасивәтләр факултетиниң докторанти яқуп муһаммәт әпәнди вә шиветсийәдики уйғур зиялийси ниҗат турсун әпәндиләр һиндистан билән хитай мунасивити вә америка, һиндистан-хитай мунасивитиниң шәрқий түркистан мәсилисигә болған тәсири дегән темиларни чөридигән һалда көз қарашлирини оттуриға қоюп өтти. Мутәхәссисләр, һиндистанниң келәчәктә хитайға қарши тибәт вә уйғур мәсилисини козир қилип қоллиниш еһтимали мәвҗутлуқини илгири сүрүшти.

Алди билән адилҗан әруйғур әпәнди йиғинниң башланғанлиқини җакарлиди.

Алди билән доктор әркин әкрәм әпәнди сөз қилип, һиндистан билән хитай оттурисидики әң чоң мәсилиниң чегра мәсилиси икәнликини оттуриға қойди.

Доктор әркин әкрәм әпәнди доклатида һиндистан билән хитай гәрчә шаңхәй һәмкарлиқ тәшкилатиниң әзаси болсиму хәлқарада икки чоң рәқиб икәнликини шуңа нурғун мәсилиләрдә келишәлмәйватқанлиқини илгири сүрди.

Доктор әркин әкрәм әпәнди икки дөләт оттурисидики тоқунушниң давамлишидиғанлиқини оттуриға қойди.

Доктор әркин әкрәм әпәнди һиндистанниң хитай билән болған тоқунушта тибәт мәсилиси билән шәрқий түркистан мәсилисини козир қилип ишлитиш еһтималлиқи барлиқини илгири сүрди.

Уйғур зиялийси ниҗат турсун әпәнди һиндистан һөкүмити хитайға қандақ позитсийә билдүрүватиду? һиндистан немә мәқсәткә еришмәкчи? дегән мәзмунларда көз қаришини оттуриға қоюп өтти. У, һиндистан һөкүмити вә һиндистан хәлқиниң хитайға қарита үч хил көз қарашта икәнликини оттуриға қойди.

Истанбулдики қоч университети хәлқара мунасивәтләр кәспи докторанти яқуп муһәммәт әпәнди һиндистан билән хитай оттурисидики тоқунушта америка қошма штатлири вә явропа әллириниң һиндистанни қоллаш иһтималиниң юқири икәнликини оттуриға қойди.

Бу син көрүнүш арқилиқ елип берилған паалийәтни уюштурған әнқәрәдики уйғур тәтқиқат институти мудири доктор әркин әкрәм әпәнди зияритимизни қобул қилип дуня вәзийитиниң барғансери мурәккәплишиватқанлиқини, бу вәзийәтни яхши чүшәнмәй туруп дәва елип барғили болмайдиғанлиқини шуңа уйғур институтиниң бундақ паалийәтләрни уюштуруватқанлиқини илгири сүрди.

Әнқәрәдики уйғур институти 2018-йили 4-айда қурулған болуп, бүгүнгичә болған қисқиғинә вақит ичидә 20 қетимдин көпрәк бу хил илмий йиғин чақирған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт