Uyghur yézilirigha quruluwatqan baqmichiliq karxanilirining déhqanlarni mejburiy ishlitiwatqanliqi melum bolmaqta

Muxbirimiz gülchéhre
2020-10-13
Share
hualing-kala-permisi.jpg Xu'aling soda-sana'et guruhining charwichiliq férmisining kala göshlirini bir terep qilish qushxanisi.
Social Media

Uyghur rayonida xitaylar igidarchiliqidiki aldinqi qatardiki karxana - xu'aling soda-sana'et guruhi bay nahiyeside chong kölemlik charwichiliq férmisi qurushqa bashlighan.

"Xitay xewer tori" ning-1 öktebir xewiride kürsitishiche, shu küni sayram bazirida ötküzülgen bu férmining ul sélish murasimda bay nahiyilik partiye komitétining sékrétari péng gang sözlep: "Xu'aling guruhining 4 milyard 500 milyon yüen meblegh salghan chong tiptiki charwichiliq murekkep türi, bay nahiyesidiki déhqanchiliqni sana'etleshtürüsh tarixidiki eng chong meblegh sélish. Bu qurulush tamamlan'ghandin kéyin, béqilidighan gösh kalisi 60 ming tuyaqtin kem bolmaydu. Hemde 10 mingdin artuq a'ilini yéqin etrapta xizmet tépishqa yétekleydu," dégen.

Bay nahiyelik partiye komitétining sékrétari péng gang, xu'aling guruhi we bay nahiyesi üch aygha yetmigen waqit ichide hemkarliqni axirlashturup, türning yolgha qoyulushini emelge ashurghanliqini bildürgen. Uning sözliri xu'aling guruhining bu nahiyediki kala férmisi qurulushining arqisida hökümetning zor qollishi bilen élip bériwatqanliqini körsitip béridu, elwette.

Bay nahiyelik partiye komitétining sékrétari péng gang yene: "Biz hemishe meblegh salghuchilar üchün meblegh salghuchilarning paydigha érishishige yardem bérip, meblegh salghuchilarning muweppeqiyitini ilgiri sürimiz" dégen. U yene "Karxanilarni eng yaxshi supa, eng yaxshi muhit we eng yaxshi mulazimet bilen teminleymiz," dep tekitligen.

Xuling goruhining bash diréktori jang jün murasimida mundaq dégen: "Xuling guruhi shinjangning ewzel kesiplirini yétishtürüsh we kéngeytish, namratlarni kirim menbesi bilen teminlep, ularning bayliqini ashurushqa yétekleshni özining burchi süpitide qobul qilidu. Nishanimiz shinjangning ijtima'iy muqimliq paydisini igilesh we charwichiliq siyasitining paydisini yuqiri süpet bilen tereqqiy qildurushtur."

Buninggha da'ir munasiwetlik xewerlerde gerche bu qurulushigha xu'aling guruhi meblegh salghan bolsimu, emma bay nahiyesi yer we qattiq-yumshaq esliheler bilen temin etkenliki, bay nahiyesining kopératip arqiliq mal menbesige, yerlik déhqanlar arqiliq bu qurulushqa emgek küchi teminleydighanliqi éniq otturigha qoyulghan.

Sayram bazirining en'eniwi a'ile baqmichiliqi heqqidiki ashkara uchurlardin melum bolushiche, her bir déhqan a'iliside dégüdek kala béqilip kelgen. Kalilar sap nesillik sortluq kalilar bolghachqa süt qaymiqi elwek iken. Yerlik qétiq bolsa sayramning dangliq yerlik mehsulati iken. Emma xu'aling guruhining bu jaygha férma qurushqa meblegh sélishta xam eshya yaki emgek küchi ewzel shara'itlirini küzde tutqanliqi tilgha élinmighan, peqet uni déhqanlargha ish pursiti we pul tépish pursiti yaritip, namratliqtin qutuldurush dep teshwiq qilin'ghan.

"Shinjang géziti" ning bu heqtiki xewiride körsitilishiche, bay nahiyesidiki kala férmisi charwichiliq meydanining birinchi basquchluq qurulush waqti besh yil ichide (2020-2025) ikki basquchta tamamlinidiken. Birinchi basquchning qurulush mudditi 2020-2022-yilliri pütidiken. Bu jeryanda 500 tuyaq buqa béqish ponkiti, 2000 ela süpetlik kalilarni tallash merkizi, 20 ming kala bordash meydani quridiken.

Ikkinchi basquchning qurulush waqti 2023-yildin 2025-yilghiche élip bérilidiken. Kala kala béqish kölimi 60 minggha yetküzülidiken. "Béqish, saqlash we sétish" bir gewdileshtürülgen türler yolgha qoyulup, kelgüside yene 300 ming mo yem-xeshek térish bazisini berpa qilidiken.

Bu uchurlargha asasen biz sayram bazarliq hökümet qatarliq memuriy organlar bilen alaqileshken bolsaqmu, emma téléfonimiz élinmidi. Emma sayram bazarliq déhqanlar baqmichiliq kopératipigha qilghan téléfonimizgha kalilargha qarawatqan bir déhqan boway éhtiyat bilen jawab berdi.

Bu déhqan kopératiptiki kalilarning sanini déyishni xalimighan bolsimu, kalilarning déhqanlar qolidin bazar nerqidin töwen élip kélin'genlikini bildürdi.

Xu'aling guruhi bu kalilarni bosniye, türkiye qatarliq on nechche döletke éksport qilidiken. Emma xu'aling üchün kopératipta kala béqiwatqan bu boway we oghli künige aran 7-8 yüendin ish heqqi alalaydiken.

Bu déhqan bowayning bildürüshiche, bu férmida yerlik déhqanlarni ishlitidiken. Biz uningdin: "Undaqta, terbiyeleshtin chiqqan balilarmu ishlemdu?" dep sorighinimizda, u intayin jiddiy hald: "Mushundaq so'alni sorimisila bolatti, adem bolsila hemmisi ishleydu," diyishigila téléfon yene üzülüp qaldi we kiyin qayta ulanmidi.

Xu'aling guruhining bu xildiki charwichiliq meydani qurush ishi jing nahiyeside bashlan'ghandin kéyin, dawamliq kéngiyip chöchek, altay, xoten, ili we bashqa wilayetler bilenmu munasiwetlik kélishimlerni imzalighan.

Xuling charwichiliq meydani meblegh sélish türliri kala göshi sana'iti topi berpa qilish üchün pütün kesip zenjirsiman meshghulat endizisini qollan'ghan iken.

Bu heqtiki munasiwetlik xewerlerde yéza kentlerde baqmichiliq kespiy hemkarliq kopératipliri qurulup, éshincha emgek küchlirining ishik aldidila ishqa orunlishishigha türtke bolghanliqi teshwiq qilin'ghan. Ilgiri "Éshincha emgek küchliri ishik aldida ishqa orunlashti" dégen xewerler heqqidiki énqlashlirimizdin her qaysi yéza-kent yaki lagérdikilerning xitaylar qurghan mushuninggha oxshash baqmichiliq meydanliri we karxanilarda erzan yaki mejburiy emgek küchi süpitide ishlewatqanliqi ashkarilan'ghan idi.

Xitayning Uyghur rayonidiki eng küchlük soda sana'et guruhining biri bolghan xu'aling guruhi bay nahiyesining sayram bazirida 4 yérim milyard yüen meblegh sélip qurghan bu keng kölemlik charwichiliq férmisi resmiy ishqa kirishse, 10 ming kishining ishqa orunlishidighanliqini bildürgen. Közetküchilerning perez qilishiche, bu kala férmisimu hökümet bilen birliship, Uyghur déqanlarni "Qul emgiki" ge sélishi mumkin iken.

Bu heqtiki énqlashlirimiz heqqidekéyinki programmilirimizda dawamliq melumat bérimiz.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.