19 Yashliq ibrahim qasimning lagérgha ekitilish xewpige duch kelgende özini öltüriwalghanliqi delillendi

Buningdin 6 ayche ilgiri yéngisarliq muhajirlardin biri yéngisarning sétil yézisida 19 yashliq bir yigitning yéshi seweplik lagérgha ekitilmekchi bolghanda özini öltüriwalghanliqini inkas qilghan idi. Bu yil 9‏-aygha kelgende kanadaliq yotubchi güly mexsus yéngisar sétilliq 19 yashliq ibrahim qasim isimlik bir yashning özini öltüriwalghanliqini xewer qildi. Muxbirimizning bu yip uchlirigha asasen élip barghan bir qatar éniqlashliri dawamida, 19 yashliq ibrahim qasimning lagérgha ekitilish xewpige duch kelgende özini öltüriwalghanliqi delillendi.

Hörmetlik radiyo anglighuchilar, yéngisarliq muhajirning eyni chaghda inkas qilishiche, yéngisarning sétil yézsida olturushluq 19 yashliq bir yigit, 2000‏-yili tughulghanliqi üchün xitayning xeterlik ewlad katigoriyesige kirgüzülüp, lagérgha ekitilish üchün saqchixanigha chaqirtilghan. Yigit saqchixanining bu uqturushini tapshuriwalghandin kéyin, özini öltüriwalghan.

Biz shu chaghda yéngisar nahiyesige téléfon qilip, bu weqe heqqide ehwal sürüshte qilghinimizda, alaqidar xadimlar yéngisarda bundaq bir weqening yüz bergenlikini inkar qilghan idi. Bu yil9 ‏-ayghan kelgende kanadaliq yotubchi güly mexsut özining mexsus programmsida yéngisarning sétil yézisidiki 19 yashliq ibrahim qasimning bu yil5 ‏-ayda özini öltüriwalghanliqi heqqide uchur alghanliqini xewer qildi. Biz shuningdin kéyin yéngisarda özini öltüriwalghan yash heqqide qaytidin éniqlash élip barduq. Güly mexsutning bayan qilishiche, xitayning fujyen ölkiside ushshaq tijaret bilen shughulliniwatqan ibrahim qasim intérnétta tamdin atlash arqiliq güliy mexsut bilen alaqilashqan. U güly mexsutqa özi xitay ölkiliride duch kelgen milliy kemsitishler we Uyghur weziyiti heqqide melumat bergen. U bu jeryanda kompyotér melumatidin paydilinip güliy mexsut bilen alaqisining izini öchürüp mangghan. U2019 ‏-yili 12‏-aygha kelgende özining yéngisardiki saqchilar teripidin chaqirtilghanliqi we lagérgha solinidighanliqini bildürüp, güliy mexsuttin özining iz-dérikini qilip turushni telep qilghan. Güly mexsut uninggha ündidardiki bash süritini almashturup turush arqiliq özining bixeterlikidin isharet bérip turushni telep qilghan. Ishlar deslepki 6 ayda déyishkendek dawam qilghan. Peqet5 ‏-ayning otturlirigha kelgende ibrahim qasimning ündidaridiki bash sürette özgirish bolmighan؛ buningdin endishige chüshken güliy mexsut bir qatar éniqlashlarni élip barghan bolsimu, emma ibrahim qasim heqqide hichqandaq uchur alamighan. Axiri ibrahim qasim qaldurup qoyghan bir téléfon nomuri arqiliq uning özini öltüriwalghanliqi heqqide uchur alghan.

Téléfonimizni qobul qilghan yéngisar sétil yézisidiki bir saqchi xadimi, bu yil5 ‏-ayda bu yézida 19 yashliq bir yigitning özini öltüriwélish weqesi yüz bergenlikini ashkarilidi. U gerche ölüwalghuchining ismi we ölüwélish sewebi heqqide melumat bermigen bolsimu, emma uning ésli'ip ülüwalghanliqini delillidi.

Sétil yéziliq edliye xadimi bu yézida bu yil5 ‏-ayda ölüwalghan yashning ismining ibrahim, familisining qasim ikenlikini bildürgen bolsimu, emma umu oxshashla uning ölüwélish sewebi heqqide melumat bermidi. Güly mexsutning bayan qilishiche, ibrahim qasim sétil yézisida özi bilen teng démetlik yashlarning saqchixanigha chaqirtilghandin kéyin saqchixanigha barghinida béshigha qara xalta keydürülüpla lagérgha ekitilgenliki we lagérgha ekitilgenlerning héch birining qaytip chiqmaywatqanliqi heqqide shikayet qilghan. Biz radiyomizgha kelgen eng deslepki uchurdiki yip uchigha asasen, uning saqchixanigha chaqirtilishida yéshining sewep bolghan-bolmighanliqi, yeni xeterlik ewladlarni terbiyelesh tüzümi boyiche chaqirtilghanliq éhtimalliqi heqqide melumat soriduq. Sétil yézisidiki bir saqchi xadimi yéngisarda 16 yash bilen 45 yash arisidiki kishilerge qarita omumiyüzlük halda atalmish terbiyelesh élip bériliwatqanliqini delillidi.