Маракәштики кишилик һоқуқ паалийәтчилири маракәш даирилирини идрис һәсәнни қоюп беришкә чақирди

Ихтиярий мухбиримиз азиғ
2021.08.04
Маракәштики кишилик һоқуқ паалийәтчилири маракәш даирилирини идрис һәсәнни қоюп беришкә чақирди Идрис һәсән маракәшкә меңиштин бир қанчә күн бурун пәрзәнтлири билән биллә чүшкән рәсим. 2021-Йили июл, түркийә.
RFA/Azigh

Идрис һәсән маракәштә қолға елинғандин буян дуняниң һәрқайси җайлиридики кишилик һоқуқ паалийәтчилири вә хәлқара кишилик һоқуқ органлири идрис һәсәнниң қоюп берилиши үчүн маракәш һөкүмитигә чақириқ қилмақта.

Ройтерс агентлиқиниң 3-авғуст хәвиригә қариғанда, маракәштики кишилик һоқуқ паалийәтчилири маракәш даирилирини идрис һәсәнни хитайға қайтуруп бәрмәсликкә чақирған.

Маракәштики AMDH һоқуқ тәшкилатидин хәдиҗә ханим ройтерс агентлиқиниң зияритини қобул қилип мундақ дегән: “биз маракәш һөкүмитини өзлири имзалиған хәлқара қийин-қистаққа қарши туруш әһдинамисигә риайә қелишқа вә идрис һәсәнни хитайға тапшуруп бериштин сақлинишқа чақиримиз. Хитайда идрис һәсәнниң қийнашқа учраш хәвпи бар”.

Фирансийәдики уйғур зиялийси доктор дилнур рәйһан ханим маракәштики кишилик һоқуқ тәшкилатлири вә паалийәтчилиригә идрис һәсән мәсилисини аңлитишта муһим рол ойнап кәлмәктә. Доктор дилнур рәйһан ханим зияритимизни қобул қилип, маракәштики кишилик һоқуқ паалийәтчилириниң идрис һәсән делоси һәққидә елип бериватқан қутқузуш һәрикәтлири тоғрисида тәпсилий тохталди.

Идрис һәсәнниң аяли бузәйнур ханим зияритимизни қобул қилип, маракәштики кишилик һоқуқ паалийәтчилиригә вә явропа уйғур институтиға көп рәһмәт ейтидиғанлиқини, маракәш һөкүмитиниң йолдишини тезрәк қоюп беришини үмид қилидиғанлиқини ейтти.

Идрис һәсән 19-июл күни маракәш хәвпсизлик даирилири тәрипидин хитай һөкүмитиниң тәлипи билән қолға елинған болуп, маракәш даирилири идрис һәсәнни хәлқара сақчи тәшкилатиниң “қизил ташлиқ тутуш буйруқи” сәвәблик қолға алғанлиқи тоғрисида баянат елан қилғаниди. 2-Авғуст күни хәлқара сақчи тәшкилати идрис һәсән делосиға қайтидин қарап чиқидиғанлиқини җакарлап, “қизил ташлиқ тутуш буйруқи” ни тоңлитип қойған.

Идрис һәсән түркийә хәвпсизлик тармақлири тәрипидин бир қанчә қетим қолға илинған болсиму, әдлийә тармақлири тәрипидин ақлинип қоюп берилгән. Идрис һәсәнниң адвокати марил кандил ройтерс агентлиқиға бу һәқтә сөз қилип мундақ дегән: “хитайниң әйиблишидә пакит йоқ, түркийә әдлийә тармақлири уни үч қетим ақлиди вә түркийә идрис һәсәнни өткүзүп беришини рәт қилди”.

Нөвәттә идрис һәсән техичә карантин тәдбирлири астида тутуп турулуватқан болуп, униң адвокати бизгә идрис һәсәнниң делосини һәққидә йеңи бир илгириләшниң болмиғанлиқини билдүрди.

Идрис һәсәнниң нөвәттики әһвали дунядики даңлиқ ахбарат васитилири тәрипидин хәвәр қилинғандин кийин, хәлқара кишилик һоқуқ тәшкилатлири вә бәзи ғәрб дөләтлири сиясәтчилириниң диққитини қозғиған. Көзәткүчиләрниң қаришичә, маракәш һөкүмити идрис һәсән делоси сәвәблик қаттиқ бесимға дуч келиватқан болуп, бу хил әһвалда маракәш һөкүмитиниң идрис һәсәнни хитайға қайтуруветиш еһтималлиқни төвән дәп қарашқа болидикән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.