Marakeshtiki kishilik hoquq pa'aliyetchiliri marakesh da'irilirini idris hesenni qoyup bérishke chaqirdi

Ixtiyariy muxbirimiz azigh
2021-08-04
Share
Marakeshtiki kishilik hoquq pa'aliyetchiliri marakesh da'irilirini idris hesenni qoyup bérishke chaqirdi Idris hesen marakeshke méngishtin bir qanche kün burun perzentliri bilen bille chüshken resim. 2021-Yili iyul, türkiye.
RFA/Azigh

Idris hesen marakeshte qolgha élin'ghandin buyan dunyaning herqaysi jayliridiki kishilik hoquq pa'aliyetchiliri we xelq'ara kishilik hoquq organliri idris hesenning qoyup bérilishi üchün marakesh hökümitige chaqiriq qilmaqta.

Roytérs agéntliqining 3-awghust xewirige qarighanda, marakeshtiki kishilik hoquq pa'aliyetchiliri marakesh da'irilirini idris hesenni xitaygha qayturup bermeslikke chaqirghan.

Marakeshtiki AMDH hoquq teshkilatidin xedije xanim roytérs agéntliqining ziyaritini qobul qilip mundaq dégen: "Biz marakesh hökümitini özliri imzalighan xelq'ara qiyin-qistaqqa qarshi turush ehdinamisige ri'aye qélishqa we idris hesenni xitaygha tapshurup bérishtin saqlinishqa chaqirimiz. Xitayda idris hesenning qiynashqa uchrash xewpi bar".

Firansiyediki Uyghur ziyaliysi doktor dilnur reyhan xanim marakeshtiki kishilik hoquq teshkilatliri we pa'aliyetchilirige idris hesen mesilisini anglitishta muhim rol oynap kelmekte. Doktor dilnur reyhan xanim ziyaritimizni qobul qilip, marakeshtiki kishilik hoquq pa'aliyetchilirining idris hesen délosi heqqide élip bériwatqan qutquzush heriketliri toghrisida tepsiliy toxtaldi.

Idris hesenning ayali buzeynur xanim ziyaritimizni qobul qilip, marakeshtiki kishilik hoquq pa'aliyetchilirige we yawropa Uyghur institutigha köp rehmet éytidighanliqini, marakesh hökümitining yoldishini tézrek qoyup bérishini ümid qilidighanliqini éytti.

Idris hesen 19-iyul küni marakesh xewpsizlik da'iriliri teripidin xitay hökümitining telipi bilen qolgha élin'ghan bolup, marakesh da'iriliri idris hesenni xelq'ara saqchi teshkilatining "Qizil tashliq tutush buyruqi" seweblik qolgha alghanliqi toghrisida bayanat élan qilghanidi. 2-Awghust küni xelq'ara saqchi teshkilati idris hesen délosigha qaytidin qarap chiqidighanliqini jakarlap, "Qizil tashliq tutush buyruqi" ni tonglitip qoyghan.

Idris hesen türkiye xewpsizlik tarmaqliri teripidin bir qanche qétim qolgha ilin'ghan bolsimu, edliye tarmaqliri teripidin aqlinip qoyup bérilgen. Idris hesenning adwokati maril kandil roytérs agéntliqigha bu heqte söz qilip mundaq dégen: "Xitayning eyiblishide pakit yoq, türkiye edliye tarmaqliri uni üch qétim aqlidi we türkiye idris hesenni ötküzüp bérishini ret qildi".

Nöwette idris hesen téxiche karantin tedbirliri astida tutup turuluwatqan bolup, uning adwokati bizge idris hesenning délosini heqqide yéngi bir ilgirileshning bolmighanliqini bildürdi.

Idris hesenning nöwettiki ehwali dunyadiki dangliq axbarat wasitiliri teripidin xewer qilin'ghandin kiyin, xelq'ara kishilik hoquq teshkilatliri we bezi gherb döletliri siyasetchilirining diqqitini qozghighan. Közetküchilerning qarishiche, marakesh hökümiti idris hesen délosi seweblik qattiq bésimgha duch kéliwatqan bolup, bu xil ehwalda marakesh hökümitining idris hesenni xitaygha qayturuwétish éhtimalliqni töwen dep qarashqa bolidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet