Marakeshte qolgha élin'ghan idris hesen üstidiki karantin tedbirliri boshitilghan

Ixtiyariy muxbirimiz azigh
2021-08-05
Share
Marakeshte qolgha élin'ghan idris hesen üstidiki karantin tedbirliri boshitilghan Idris hesen marakeshke méngishtin bir qanche kün burun perzenti bilen bille chüshken resim. 2021-Yili iyul, türkiye.
RFA/Azigh

19-Iyul kasablankida marakesh da'iriliri teripidin qolgha élin'ghan idris hesen koruna wirusi wabasi tedbirliri boyiche karantin'gha ilin'ghan bolup, 5-awghust küni karantin mudditi toshqanliqi üchün waba tedbirliri boshitilghan.

Bügün chüshtin kéyin karantin mudditi toshqan idris hesen türkiyediki a'ile yéqinliri bilen téléfon arqiliq körüshken. Idris hesenning ayali buzeynur xanim ziyaritimizni qobul qilip, idris hesenning nöwettiki ehwali heqqide melumat berdi.

Uningdin bashqa idris hesen yene Uyghur yar fondi jiddiy qutquzush türining mes'ulliri bilenmu körüshken. Uyghur yar fondi jiddiy qutquzush türidin batur qaraxan ependining bildürüshiche, idris hesen ependimning psixik ehwali intayin yaxshi iken.

Idris hesen marakeshke méngishtin bir qanche kün burun perzentliri bilen bille chüshken resim. 2021-Yili iyul, türkiye.
Idris hesen marakeshke méngishtin bir qanche kün burun perzentliri bilen bille chüshken resim. 2021-Yili iyul, türkiye.

Nöwette idris hesenning ikki adwokati bar bolup, biri kishilik hoquqni qoghdighuchilar teshkilati yallighan adwokat milud kandil, yene biri birleshken döletler teshkilati kishilik hoquq aliy komissarliqi teyinligen adwokat el kebir iken.

Kishilik hoquq aliy komissarliqi teyinligen adwokat el kebirning Uyghur yar fondigha yetküzüshiche, 12-awghust küni idris hesen üstidin resmiy sot échilmaqchiken.

Bügün, yeni 5-awghust kechte idris hesenni qutquzush üchün tirishchanliq körsitiwatqan xizmet guruppisi mexsus bu heqte yighin achidighan bolup, bu yighinda idris hesenni qutquzush üchün élip bérilidighan konkrét xizmetler békitilidiken.

Idris hesen heqqidiki resmiy höjjetler erebchige terjime qilinip, munasiwetlik organlargha tapshurup bérilgen bolup, nöwette idris hesenning délosi birleshken döletler teshkilati kishilik hoquqni qoghdighuchilargha mes'ul alahide xadimi teripidin mexsus közitilmektiken.

Biz Uyghur yar fondi jiddiy qutquzush türining mes'ulliridin batur qaraxan ependini ziyaret qilduq. Batur qaraxan ependi idris hesenning délosi heqqidiki eng yéngi melumatlar heqqide tepsiliy toxtaldi.

Biz idris hesenning nöwettiki ehwali heqqide téximu tepsiliy melumat élish üchün marakeshning istanbuldiki bash konsulxanisigha qayta-qayta téléfon qilghan bolsaqmu, téléfon élinmidi.

Idris hesen xitayning telipi bilen marakesh da'iriliri teripidin qolgha élin'ghandin kiyin kishilik hoquq pa'aliyetchiliri teripidin qattiq bésimgha duch kelmekte. Nöwette idris hesenni qutquzush herikiti kishilik hoquqni qoghdighuchilar teshkilati, xelq'ara kechürüm teshkilati, chégrasiz muxbirlar teshkilati we birleshken döletler teshkilati kishilik hoquq aliy komissarliqi qatarliq organlarning hemkarliqida jiddiy élip bérilmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet