Идрис һәсәнниң соти йәнә кечиктүрүлди

Ихтиярий мухбиримиз азиғ
2021-09-02
Share
Идрис һәсәнниң 12-авғустики соти үчүн кишилик һоқуқ тәшкилатлири җиддий тәдбир алмақтикән Идрис һәсән маракәшкә меңиштин бир қанчә күн бурун пәрзәнтлири билән биллә чүшкән рәсим. 2021-Йили июл, түркийә.
RFA/Azigh

1-Сентәбир күн ечилған идрис һәсәнниң соти маракәш сот мәһкимиси тәрипидин 22-сентәбр күнигә кечиктүрүлгән.

Идрис һәсән бу йил 19-июл күни бихәтәр бир дөләткә бериш үчүн истанбулдин айрилип, маракәшниң касабланка шәһиригә барған. У хитай һөкүмитиниң тәлипи билән касабиланка айродромида маракәш дөләт хәвпсизлики сақчилири тәрипидин қолға елинған иди.

Идрис һәсәнниң тунҗи соти 12-авғуст күни ечилған болуп, хитай һөкүмити мунасивәтлик әйибнамиләрни маракәш әдлийә тармақлириға йәткүзүп бәрмигәнлики үчүн сот үч қетим кечиктүрүлгән.

"уйғур яр фонди" җиддий қутқузуш түриниң мәсуллиридин батур қарахан әпәндиниң билдүрүшичә, хитай һөкүмити нөвәттә идрис һәсән үстидики әйибнамиләрни маракәш даирилиригә тапшурған болуп, әйибнамиләр маракәш тәптиш тармақлири тәрипидин көрүп чеқилидикән. Әйибнамә маракәш тәптиш даирилириниң тәкшүрүшидин өтүп, сот мәһкимигә тапшурулидикән. Идрис һәсәнниң адвокатлири сот мәһкимисигә тапшурулған әйибнамигә асасән идрис һәсәнни ақлаш үчүн истратигийә бәлгиләйдикән.

Биз идрис һәсәнниң делоси һәққидә тәпсилий мәлумат игиләш үчүн маракәшниң истанбул консулханисиға телефун қилған болсақму, телифунимиз елинмиди.

Нөвәттә уйғур паалийәтчиләр вә хәлқара кишилик һоқуқ органлири идрис һәсәнни қутқузуш үчүн паал һәркәт қилмақта.

"уйғур яр фонди" җиддий қутқузуш түриниң мәсуллири йәнә идрис һәсәнниң адвокатлириниң мәзкур сотта утуп чиқишиға ишәнчисиниң толуқ икәнликини, нөвәттә "уйғур яр фонди" ниң мунасивәтлик органлар билән алақилишип идрис һәсәнниң соти аяқлашқанда, идрис һәсәнни үчинчи бихәтәр бир дөләткә орунлаштуруш үчүн һәркәт қиливатқанлиқини ейтти.

Идрис һәсәнниң аяли бузәйнур ханим зияритимизни қубул қилип, маракәш мәһкимисиниң сотни кечиктүрүш қарариға болған көз қарашлирини оттуриға қойди.

Хитай һөкүмити хәлқара сақчи тәшкилатини қоллинип, муһаҗирәттики уйғур паалийәтчиләрни тутуш үчүн йиллардин буян һәркәт қилип кәлмәктә. Идрис һәсәнниң хәлқара сақчи тәшкилатиниң қизил ташлиқ тутуш буйриқида исми болғанлиқи сәвәплик тутулғанлиқи мәлум. Бирләшкән дөләтләр тәшкилати кишилик һоқуқ комитети вә хәлқара кишилик һоқуқ органлириниң тиришчанлиқи нәтиҗисидә идрис һәсән үстидики тутуш буйруқи әмәлдин қалған иди. Бирақ маракәш мәһкимисиниң идрис һәсән үстидики сотиниң нәтиҗиси чиқмай һазирғичә давамлашмақта.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт