Idris hesenning soti yene kéchiktürüldi

Ixtiyariy muxbirimiz azigh
2021-09-02
Share
Idris hesenning 12-awghustiki soti üchün kishilik hoquq teshkilatliri jiddiy tedbir almaqtiken Idris hesen marakeshke méngishtin bir qanche kün burun perzentliri bilen bille chüshken resim. 2021-Yili iyul, türkiye.
RFA/Azigh

1-Séntebir kün échilghan idris hesenning soti marakesh sot mehkimisi teripidin 22-séntebr künige kéchiktürülgen.

Idris hesen bu yil 19-iyul küni bixeter bir döletke bérish üchün istanbuldin ayrilip, marakeshning kasablanka shehirige barghan. U xitay hökümitining telipi bilen kasabilanka ayrodromida marakesh dölet xewpsizliki saqchiliri teripidin qolgha élin'ghan idi.

Idris hesenning tunji soti 12-awghust küni échilghan bolup, xitay hökümiti munasiwetlik eyibnamilerni marakesh edliye tarmaqlirigha yetküzüp bermigenliki üchün sot üch qétim kéchiktürülgen.

"Uyghur yar fondi" jiddiy qutquzush türining mes'ulliridin batur qaraxan ependining bildürüshiche, xitay hökümiti nöwette idris hesen üstidiki eyibnamilerni marakesh da'irilirige tapshurghan bolup, eyibnamiler marakesh teptish tarmaqliri teripidin körüp chéqilidiken. Eyibname marakesh teptish da'irilirining tekshürüshidin ötüp, sot mehkimige tapshurulidiken. Idris hesenning adwokatliri sot mehkimisige tapshurulghan eyibnamige asasen idris hesenni aqlash üchün istratigiye belgileydiken.

Biz idris hesenning délosi heqqide tepsiliy melumat igilesh üchün marakeshning istanbul konsulxanisigha téléfun qilghan bolsaqmu, télifunimiz élinmidi.

Nöwette Uyghur pa'aliyetchiler we xelq'ara kishilik hoquq organliri idris hesenni qutquzush üchün pa'al herket qilmaqta.

"Uyghur yar fondi" jiddiy qutquzush türining mes'ulliri yene idris hesenning adwokatlirining mezkur sotta utup chiqishigha ishenchisining toluq ikenlikini, nöwette "Uyghur yar fondi" ning munasiwetlik organlar bilen alaqiliship idris hesenning soti ayaqlashqanda, idris hesenni üchinchi bixeter bir döletke orunlashturush üchün herket qiliwatqanliqini éytti.

Idris hesenning ayali buzeynur xanim ziyaritimizni qubul qilip, marakesh mehkimisining sotni kéchiktürüsh qararigha bolghan köz qarashlirini otturigha qoydi.

Xitay hökümiti xelq'ara saqchi teshkilatini qollinip, muhajirettiki Uyghur pa'aliyetchilerni tutush üchün yillardin buyan herket qilip kelmekte. Idris hesenning xelq'ara saqchi teshkilatining qizil tashliq tutush buyriqida ismi bolghanliqi seweplik tutulghanliqi melum. Birleshken döletler teshkilati kishilik hoquq komitéti we xelq'ara kishilik hoquq organlirining tirishchanliqi netijiside idris hesen üstidiki tutush buyruqi emeldin qalghan idi. Biraq marakesh mehkimisining idris hesen üstidiki sotining netijisi chiqmay hazirghiche dawamlashmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet