Австиралийәниң аделайд шәһиридә икки җумһурийәтни хатириләш паалийити өткүзүлди

Ихтиярий мухбиримиз учқун
2019-11-14
Елхәт
Пикир
Share
Принт
Австиралийәниң аделайд шәһиридә өткүзүлгән икки қетимлиқ шәрқий түркистан җумһурийитини хатириләш мурасими. 2019-Йили 12-ноябир.
Австиралийәниң аделайд шәһиридә өткүзүлгән икки қетимлиқ шәрқий түркистан җумһурийитини хатириләш мурасими. 2019-Йили 12-ноябир.
RFA/Uchqun

11-Айниң 12-күни австиралийәниң аделайд шәһиридиму 1933-йили вә 1944-йили қурулған икки қетимлиқ шәрқий түркистан җумһурийитини хатириләш мурасими өткүзүлди. Мурасим аделайид шәһиридики «қәдими базар» паалийәт залида өткүзүлгән болуп, игилинишичә бу паалийәткә аделайдта яшаватқан 100 дин артуқ уйғур қатнашқан.

Бу паалийәт австиралийә шәрқий түркистан җәмийитиниң орунлаштуруши билән өткүзүлгән болуп, мәзкур паалийәт алди билән икки җумһурийәт үчүн җенини пида қилған шеһитларниң роһиға атап «қуран» тилавәт қилиш билән башланған. Паалийәттә йәнә җәнубий австралийә уйғур тили мәктипиниң оқуғучилири түрлүк сәнәт номурлирини орундиған.

Биз бу мунасивәт билән австралийә шәрқий түркистан җәмийитиниң рәиси нурмәмәт түркистани әпәндимни зиярәт қилдуқ. У бу тоғрисида мәлумат берип мундақ деди: «12-ноябир сәйшәнбә күни 1933-йили қәшқәрдә қурулған шәрқий түркистан ислам җумһурийитиниң 86 йиллиқини, 1944-йили ғулҗида қурулған шәрқий түркистан җумһурийитиниң 75 йиллиқини хатирилидуқ. Бу мурасим австралийә шәрқий түркистан җәмийитиниң бу йиллиқ муһим паалийитиниң бири һесаблиниду.»

Нурмәмәт әпәнди йәнә тарихтики шәрқий түркистан җумһурийитини хатириләшниң әһмийити һәққидиму тохтилип мундақ деди: «мәзкур паалийәт муһаҗирәттики һаятимизда тарихимизни, әнәнимизни әвладлиримизға йәткүзидиған вә өзимизни вәтән тупрақлириға бағлап туридиған муһим паалийәттур. Униңдин башқа йәнә бу паалийитимиз нуқулла тарихни хатириләш болупла қалмастин, бәлки йәнә барлиқ вәтәндашлиримизға йоқатқан җумһурийитимизни қайтидин қуруп чиқиш үчүн роһи озуқ беридиған сорундур.»

Аделайда яшаватқан пешқәдәм әдиб әхмәт игәмбәрди паалийәт һәққидә тохтилип мундақ деди: «биз өткән әсирниң алдинқи йеримида қурулған икки җумһурийәтимизниң шанлиқ тарихини әслигән вақтимизда рәһбәрлиримизниң, хәлқимизниң батуранә роһини мәдһийәләш билән биргә өз вақтида өткүзүлгән хаталиқлардинму савақ елишни өгинишимиз лазим.»

Әхмәт игәмбәрди йәнә үчинчи қетимлиқ җумһурийәт қуруш үчүн ички җәһәттә иттипақ болушниң муһимлиқиниму тәкитләп мундақ деди: «һазир шәрқий түркистанниң ички вә ташқи вәзийитидә көп өзгиришләр мәйданға кәлди. Ташқи җәһәттә бизгә пайдилиқ шараитларму мәйданға келиватиду. Әмма ички җәһәттә йәнила иттипақлиқ, һәмкарлиқ қатарлиқ тәрәпләрдә йетәрсизликләр көп. Әгәр биз үчинчи қетимлиқ җумһурийәтни қурмақчи болсақ, өзимизни ислаһ қилишимиз, дуня вәзийитигә маслишишимиз лазим.»

Австиралийәниң аделайд шәһиридә йиллардин буян тарихта қурулған икки қетимлиқ шәрқий түркистан җумһурийитини хатириләш паалийити өткүзүлүп келинмәктә.

Пикирләр (0)
Share
Толуқ бәт